Ha sulod hin sobra napulo ka tuig, an mga cart bahin han aton pagministeryo nga nakakakuha hin atensyon han mga tawo. Ha bug-os nga kalibotan, nakikita han mga tawo ini nga mga cart ngan maaram hira kon hin-o an nagtatag-iya hito. Mahusay an disenyo hito ngan masayon liwat gamiton. Bangin umuyon ka kan Asenata, usa nga sister nga taga-Poland, nga nagsiring: “Simple la kitaon an mga cart pero mahusay ito. Masayon la an pag-asembol ngan pagdara hito.”

 Nahunahuna mo na ba kon paonan-o gindisenyo ngan ginhimo an mga cart?

 Han 2001, gin-aprobaran han Nagmamando nga Lawas an aton kabugtoan ha France nga magtesting hin iba-iba nga pamaagi han pagsangyaw ha publiko, upod na an paggamit han mga cart. Nagtesting hira hin iba-iba nga disenyo hin cart. Pananglitan, gumamit hira hin pinatuyo nga mga cart nga an disenyo sugad han de-kaliding nga maleta o cart nga pan-groseri basi displeyhan o butangan hin mga literatura. Ha urhi, nagpili an sanga nga opisina han France hin usa nga standard nga disenyo, nga gin-gamit han mga magwarali hin damu ka tuig.

 Nalipay an kabugtoan ha France han mga resulta han ira gintestingan nga pamaagi ha pagsangyaw ha publiko. Salit han 2011, gin-aprobaran han Nagmamando nga Lawas nga testingan an usa nga bag-o nga pamaagi ha pagsangyaw ha publiko ha New York City, U.S.A., gamit an mga cart ngan mga lamesa. Nasantop dayon han mga payunir nga nakigbahin hito nga damu an bentaha han mga cart, upod na an pagin masayon hito dad-on. Naghatag liwat an mga payunir hin praktikal nga mga suhestyon kon paonan-o mapapaopay an disenyo han mga cart. Medyo mabug-at an nauna nga mga cart nga hinimo ha kahoy, salit makuri ito guyuron ha mga dapit nga tipasagka ngan tipalugsad. Tungod hito, gin-utro an disenyo hito basi magin mas magaan, pero diri sobra kagaan nga igpapalid ito han hangin. An bag-o nga disenyo may-ada liwat mas dagku ngan mas marig-on nga mga kaliding, salit mas masayon ito dad-on bisan ha lubak-lubak nga dalan. Dugang pa, an bag-o nga mga cart may gutiay nga kahon basi butangan hin ekstra nga mga literatura.

 Nagin malampuson ito nga pagtesting! Salit han 2012, gin-aprobaran han Nagmamando nga Lawas an paggamit hin mga cart ha bug-os nga kalibotan. An kabugtoan nakabiling hin usa nga kompanya nga maghihimo hin binulto nga mga cart nga magamit hin magaan pero marig-on nga mga materyales.

 Ha sulod hin katuigan, may-ada gudtiay nga pagbag-o nga ginhimo ha mga cart. Pananglitan, han 2015, an prente han cart ginbutangan hin kobre nga masilhag nga plastik basi diri mahulos han uran. Hi Dina, nga taga-Georgia, naopayan hinin bag-o nga disenyo. Hiya nagsiring, “An cart may-ada kalugaringon nga ‘kapote’ para diri mahulos an mga publikasyon.” Han 2017, nagkaada magnetic nga mga poster ha pipira nga linggwahe. Hi Tomasz, nga taga-Poland, nagsiring: “Han an amon pa gin-gagamit an iginpapadukot la nga mga poster, makuri an pagliwan hito. Salit an magnetic nga mga poster maopay gud nga ideya.” Han 2019, may ginbag-o pa ha mga materyales ngan ha paghimo han mga cart basi magin mas marig-on ito.

 Usa la nga kompanya an naghihimo han mga cart ngan nagpapadara ha mga kongregasyon ha bug-os nga kalibotan. Yana, an usa nga cart nagkakantidad hin $43 U.S., diri pa upod an bayad han pagpadara ngan iba pa nga kagarastohan. Tubtob yana, sobra 16 milyon ka dolyar (U.S.) an nagasto para ha mga cart, ngan sobra 420,000 nga cart an naipadara ha mga kongregasyon ha bug-os nga kalibotan.

 Basi magamit ha pinakamaopay an mga donasyon, bultohay an pag-order han mga cart. Dugang pa, an mga kongregasyon mahimo na yana mag-order hin mga piyesa ngan mag-ayad han mga cart imbes nga liwanan ito hin bag-o.

 An mga magwarali ha bug-os nga kalibotan nag-i-enjoy ha paggamit han mga cart. Hi Martina, nga taga-Ghana, nagsiring: “Ha kadam-an nga paagi han aton ministeryo, kita an nadaop ha mga tawo. An naruruyagan ko ha pagsangyaw gamit an cart kay an mga tawo an nadaop ha aton. Bisan an mga tawo nga nalabay la ha aton cart, nasasangyawan.”

 Ha usa nga nasud ha Africa, may lalaki nga dumaop ha cart ngan nagkuha hin mga publikasyon ha iya linggwahe. Paglabay hin usa ka semana, bumalik hiya ngan nagsiring: “Ginbasa ko an ngatanan nga literatura. Importante gud an mga impormasyon hito. Isusumat ko ito ha akon pamilya didto ha amon baryo,” nga mga 500 ka kilometro an kahirayo. Paglabay hin duha ka bulan, bumalik hiya ngan nagsiring: “Ginbasa han mga tawo ha amon baryo an ngatanan nga literatura, ngan nalipay gud hira ha ira nabasa. Karuyag nira magin Saksi ni Jehova. Pero may-ada hira mga pakiana. Pananglitan, nasasabtan nira nga basi mabawtismohan, kinahanglan an ira bug-os nga lawas ipailarom ha tubig. Pero, waray hirani nga salog ha amon baryo. Kinahanglan ba namon kumanhi basi mabawtismohan?” Ginhikay han mga magwarali nga makontak ini nga lalaki hin usa nga payunir nga nagyayakan han iya linggwahe. Tikang hito, an payunir ngan an lalaki regular na nga naghihisgot parte ha Biblia.

 Eksayting makita nga an mga cart ginagamit basi ‘magsangyaw ha bug-os nga inuukyan nga tuna sugad nga pamatuod ha ngatanan nga nasud.’ (Mateo 24:14) Paonan-o naton natataparan an mga gastos ha paghimo han mga cart? Pinaagi han mga donate.pr418.com ha bug-os-kalibotan nga buruhaton. Damu ito an iginpapadara gamit an donate.pr418.com. Salamat han iyo pagin mahinatagon.