An musika maopay nga regalo tikang kan Jehova. Mahimo ito makaapekto han aton panhunahuna, han aton emosyon, ngan makadasig ha aton. Ini an nahihimo han aton orihinal nga mga kanta. Ngani, may dugang pa ini nga nahihimo: Nakakabulig ini nga magin mas duok kita kan Jehova.

 Tikang han 2014, sobra 70 nga orihinal nga mga kanta an nahimo, ngan yana, diri maminos ha usa hito nga mga kanta an may-ada ha sobra 500 nga linggwahe! Pero bangin maghunahuna ka, ‘Hin-o an naghihimo hito nga mga kanta, ngan paonan-o ito ginhihimo?’

 An orihinal nga mga kanta ginhihimo han music team ha Audio/Video Services, nga gindudumara han Teaching Committee han Nagmamando nga Lawas. An music team may-ada 13 nga kabugtoan nga nabulig ha pagkomposo, ha music engineering, ha pag-eskedyol, ngan ha iba pa nga ginkikinahanglan nga buruhaton. Dugang pa, may gin-aprobaran an Teaching Committee nga mga remote volunteer ha bug-os nga kalibotan basi bumulig hini nga buruhaton, upod na an mga paragkomposo, musikero, ngan mga parakanta. Mapainubsanon nga ginagamit hini nga kabugtoan an ira mga talento ngan diri hira naghihingyap nga dayawon hira.

 Paonan-o ginhihimo an usa nga orihinal nga kanta? Siyahan, nagpipili an Teaching Committee han mga teksto nga pagbabasihan han kanta ngan kon ano an dapat abaton han mga makakabati. Katapos, magtutoka an music team han magkukomposo han musika ngan han magsusurat han liriko. Usa nga sampol nga rekording an ig-aandam. Pamamatian han Teaching Committee an sampol nga rekording ngan maghahatag hira hin dugang pa nga instruksyon. Katapos, ig-a-adjust han music team an kanta ngan magrirekord han ultimo nga bersyon. Iginrirekord ini nga mga kanta ha iba-iba nga lokasyon, upod na ha mga pasilidad han branch ngan ha mga balay nga may gamit ha pagrekord.

 Basi makagkomposo ngan makagrekord hin orihinal nga mga kanta, an aton kabugtoan nagamit hin iba-iba nga klase hin computer program. Ginkikinahanglan liwat nga gumamit hin mga equipment sugad han mga instrumento ha musika, mixing console, amplifier, speaker, ngan mikropono. An usa nga mikropono nagkakantidad tikang ha $100 tubtob ha sobra $1,000 (U.S.). Han 2020, naggasto kita hin $116,000 (U.S.) para ha mga equipment ha pagrekord hin musika.

 Ano an ginhihimo basi makatipid? Imbes nga magkaada daku nga music team ha Bethel, damu nga remote volunteer an gin-gagamit. Dugang pa, imbes nga magtarampo an damu nga musikero basi aktuwal nga magrekord hin musika, kaurogan na nga an aton kabugtoan nagkukomposo ngan naghihimo hin musika pinaagi hin usa nga computer program.

 Naruruyag gud an kabugtoan ha pagpamati han orihinal nga mga kanta. Hi Tara nga taga-Germany, nagsiring: “An mga kanta nabulig ha akon nga magin kalmado kon nababaraka ako. Samtang namamati ako hito ha akon kalugaringon nga yinaknan, inaabat ko nga pariho hin ginhahangkopan ako ni Jehova.” An brother nga taga-Kazakhstan nga hi Dmitry nagsiring: “Naruruyag ako pagpinamati han mga kanta nga diri nababaraka kon supak ito ha mga prinsipyo ha Biblia. Dugang pa, an mga kanta nabulig ha akon nga padayon nga makapokus ha espirituwal nga mga butang.”

 Hi Delia, nga taga-South Africa, nagsumat han iya inaabat mahitungod han orihinal nga mga kanta: “Napaparig-on gud hini an akon pagtoo. Kon nasusubo ako o kon may-ada ako problema, pirme may usa nga kanta nga haom gud ha akon sitwasyon. Kaurogan na, bisan an tono pa la han mga kanta nakakapabag-o na han akon inaabat!”

 May pipira nga orihinal nga mga kanta nga nagigin paborito. Hi Lerato, nga taga-South Africa liwat, nagsiring: “An mga kanta nga ‘Hirani Na Gud Matuman’ ngan ‘Ha Bag-o nga Tuna’ nabulig ha akon nga maimadyin an panahon nga gintatapo ko na an akon hinigugma nga nanay. Ha kada panahon nga ginpapamatian ko ito nga mga kanta, naiimadyin ko nga nagdadalagan hiya tidaop ha akon basi hangkopan ako.”

 Usa nga orihinal nga kanta an nakabulig gud ha usa nga tin-edyer ha Sri Lanka. Hiya nagsiring: “Gin-isgan ako han akon titser ha science ha atubangan han akon mga kaklase tungod kay usa ako han mga Saksi ni Jehova. Nahadlok ako ngan diri ako maaram han akon iyayakan. Pag-uli ko, ginsidngan ako ni Nanay nga pamatian an kanta nga ‘Ikaw ay Tatatag.’ Ini nga kanta nakabulig ha akon nga masantop ko nga kinahanglan ko mag-research ngan mangandam hin baton. Kinabuwasan, nakiistorya ako ha akon titser. Namati hiya ha akon ngan nagsiring nga yana mas nasasabtan na niya an mga gintotoohan han mga Saksi ni Jehova. Nagpapasalamat ako ha organisasyon ni Jehova kay gintataganahan kita hin sugad hito nga makapadasig nga mga kanta.”

 Diin kita nakuha hin panggasto ha paghimo hini nga mga kanta? Ha mga donasyon ha bug-os-kalibotan nga buruhaton, nga damu hito an ginhahatag gamit an iba-iba nga pamaagi ha donate.pr418.com. Salamat ha iyo pagin mahinatagon.