Hi Jesus nagsiring ha iya mga disipulo: “Magigin mga saksi ko kamo . . . ngadto ha pinakahirayo nga bahin han tuna.” (Buhat 1:8) Madasigon nga gintutuman yana han mga Saksi ni Jehova ito nga sugo. Pero may pipira nga lugar nga haluag ngan matawo an waray pa gud masangyawi. Ngan ha pipira naman nga nasud gutiay la an Saksi. (Mateo 9:37, 38) Ano an aton ginhihimo basi damu nga tawo an masangyawan tubtob nga posible?

 Basi mabuligan ha pagtuman han sugo ni Jesus, an Service Committee han Nagmamando nga Lawas han mga Saksi ni Jehova nag-asayn hin mga misyonero ha mga lugar nga may daku nga panginahanglan hin magwarali ha iba-iba nga bahin han kalibotan. Ha pagkayana, may 3,090 nga mga misyonero ha bug-os nga kalibotan. a An kadam-an ha ira nakakarawat hin pagbansay tikang ha usa nga teokratiko nga eskwelahan, sugad han School for Kingdom Evangelizers. Andam bayaan han mga misyonero an ira lugar ngan bumalhin ha iba nga nasud. Tungod han ira pagin hamtong, pagbansay ngan eksperyensya, inin matinumanon nga mga misyonero nabulig nga maipasamwak an maopay nga sumat ngan magin maopay nga ehemplo ha bag-o nga mga disipulo.

 Ha kada sanga nga opisina, an Field Ministers Desk han Service Department nagtatrabaho kaupod han Branch Committee basi maihatag an panginahanglan han mga misyonero, sugad han simple pero komportable nga balay, pag-ataman han ira kahimsog, ngan gutiay nga allowance para ha mga kagarastohan. Han 2020 nga tuig han pag-alagad, haros 27 ka milyon nga dolyar (U.S.) an nagasto han mga Saksi ni Jehova para ha mga misyonero. Tungod hini nga mga probisyon, an mga misyonero nakakapokus ha paghatag han ira panahon ngan kusog ha ministeryo, ngan ha pagparig-on liwat ha ira kongregasyon.

 Paonan-o nakabulig an mga misyonero ha pagsangyaw nga buruhaton? Hi Frank Madsen, nga membro han Branch Committee ha Malawi, nagsiring: “Tungod ha pagin maisugon ngan pagin eksperyensyado han mga misyonero, nabuligan an mga kongregasyon nga masangyawan an magkuri nga teritoryo, sugad han gwardyado nga komunidad ngan mga lugar nga iba an linggwahe. Nakadasig liwat ha iba an ira pangalimbasog nga mahibaro han linggwahe ngan kultura han ira teritoryo, ngan nakabulig hira ha mga batan-on nga maghunahuna nga sumulod ha bug-os-panahon nga pag-alagad. Mapasalamaton kami kan Jehova tungod hini nga mga misyonero.”

 Usa nga membro han Branch Committee ha iba nga nasud an nagsiring: “Ginpapamatud-an han mga misyonero nga an katawohan ni Jehova nagkakaurosa ha bug-os nga kalibotan. Bisan an diri mga Saksi, klaro nga nakakakita nga diri kita nagkakabahin-bahin tungod han pagkaiba-iba han kultura, lugod nagkakaurosa kita tungod ha bulig han mga katutdoan ha Biblia.”

 Paonan-o nabubuligan han mga misyonero an mga magwarali? Hi Paulo, nga taga-Timor-Leste, mapasalamaton ha mga misyonero nga naasayn ha ira kongregasyon. Hiya nagsiring: “Mapaso gud hinduro ha amon lugar. Pero bisan kon tikang ha mahagkot nga lugar an mga misyonero, waray nira tuguti nga makapugong ha ira pagsangyaw an mapaso nga klima. Pirme hira naupod ha katirok para ha pagsangyaw ha aga. Agsob ko hira makita nga nabalik-bisita ha udto bisan mapaso gud, ngan ha gab-i liwat. Damu an ira nabuligan nga mahibaro han kamatuoran, upod na ako. Ira gin-gamit an ira bug-os nga kinabuhi ha pag-alagad kan Jehova nga madasigon ngan aktibo, ngan nakadasig ito ha bug-os nga kongregasyon nga mag-alagad ha Iya hin mas bug-os pa.”

 Hi Ketti nga regular payunir ha Malawi, nagsumat kon paonan-o nakabulig ha iya pamilya an usa nga mag-asawa nga misyonero: “Han may naasayn nga mag-asawa nga misyonero ha amon kongregasyon, ako la an Saksi ha amon pamilya. Pero ginbuligan ako hini nga mag-asawa, ngan nagin duok gud hira ha amon pamilya. An ira maopay nga ehemplo nakabulig ha akon mga anak nga makita nga an pag-alagad kan Jehova nagriresulta hin malipayon nga kinabuhi. Tungod han maopay nga impluwensya han mga misyonero, an akon tulo nga anak nga babaye mga regular payunir na ngan an akon bana naatender na ha mga katirok.”

 Paonan-o ginsusuportaran an mga kagarastohan para ha pag-ataman ha mga misyonero? Pinaagi ha mga donasyon para ha bug-os-kalibotan nga buruhaton, nga an kadam-an hito igindudonar gamit an donate.pr418.com. Gin-aapresyar gud ini nga mga donasyon.