Ha sulod hin sobra 130 ka tuig, an mga Saksi ni Jehova ha moderno nga panahon urosa nga nagkakatirok ha tinuig nga mga kombensyon. Ini nga mga programa may-ada na sobra 40 nga pahayag, ngan may-ada liwat ito musika, mga interbyu, ngan mga video. Basi mapahimulsan an programa ngan mapagios an mga natambong, kinahanglan klaro ito nga ‘mabatian ngan makit-an.’ (Lucas 2:20) Paonan-o ginagamit an imo donasyon basi masiguro nga an ngatanan magpapahimulos hini nga mga kombensyon, diin man hira naukoy?

 Damu nga moderno nga estadyum ngan arena ha mga nasud ha Weste nga bahin han kalibotan an may-ada na mga audio/video system. Salit kon nagpiplete kita hin sugad nga mga venue para ha kombensyon, kay ano nga agsob kita mag-install han aton kalugaringon nga equipment? Hi David, nga nagtatrabaho ha World Headquarters Broadcasting Department, nagsiring: “An pipira nga pasilidad nga aton ginpipletehan gindisenyo basi an mga natambong makapamati hin maopay ha sulod hin sobra unom la ka oras ha programa nga kaurogan mga yakan-yakan la. Pananglitan, an mga venue para ha isport nagamit hin sound system para ha haglipot nga pahibaro ngan pagpatokar hin haglipot nga musika. Ha ira mga video screen, an iginpapakita la an mga iskor han uyag, adbertisment, ngan replay. Ha kabaliktaran, karuyag naton nga an mga natambong makakita hin mas higlaba nga video ngan mabatian ngan masabtan nira hin klaro an tagsa nga pulong nga ginyayakan tikang ha entablado.”

 Iba-iba an tagsa nga venue han kombensyon, salit kinahanglan ipahiuyon an audio/video system. Kon makapili na hin mga venue, an Broadcasting Department ha aton mga branch office magdidesisyon kon diin palilingkuron an mga maatender uyon ha ginbabanabana nga kadamu han matambong ngan kapasidad han pasilidad. Katapos, kakarkulahon han kabugtoan kon diin ig-i-install an mga speaker ngan video screen, aanalisaron kon paonan-o ito ikukonektar, ngan ililista an ngatanan nga equipment nga kinahanglan basi masiguro nga makikita ngan mababatian han ngatanan an programa.

 Nagigin mas komplikado an pag-install hin mga audio/video system ha mga kombensyon nga an programa iginpipresenta ha damu nga yinaknan. Kon an programa ig-iinterpretar ha iba nga yinaknan, dapat makita ngan mabatian han mga nag-iinterpret an programa ngan i-transmit an ira gin-interpretar pinaagi hin channel ha radyo ngadto ha mga nakakaintindi hito nga yinaknan. Tungod han espesyal nga mga media player, an video puydi makita hin durungan han ngatanan nga natambong, bisan kon an audio iginta-transmit ha walo nga yinaknan. “Ini nga mga audio/video system komplikado hinduro,” siring ni David, “ngan an mga boluntaryo nga nag-o-operate hito kinahanglan ig-train hin maopay.”

 Kadam-an nga branch office may suplay nga audio/video equipment nga ginagamit kada tuig. Kon sugad hito an kahimtang, ginhihikay han kabugtoan nga madara an ngatanan nga equipment tikang ha usa nga kombensyon ngadto ha sunod nga magamit hito. An branch ha United States pa la, nagasto na hin sobra $200,000 a kada tuig ha pagpadara pa la hito nga mga equipment. Pero mas barato na ini kay ha pagpalit ngan pagmintinar hin dugang nga equipment. Hi Steven, nga binulig ha pagpanginano ha audio/video ha usa nga kombensyon ha Canada, nagsiring, “Ginsiguro han amon audio/video team nga an ngatanan nga tornilyo, wire, ngan iba pa nga piyesa kompleto, waray guba, gin-impake hin maopay, ngan andam magamit para ha sunod nga kombensyon.”

 An pagplete hin audio/video equipment magasto gud, ngan kaurogan na nga hamubo an kalidad hito o diri maopay an pagkamintinar. Tungod hito, kasagaran nga napalit kita hin equipment nga aton kinahanglan. Ha pagkayana, an usa nga LED video wall nga ginagamit ha sulod han pasilidad nga may sukol nga singko por tres ka metro nagkakantidad hin mga $24,000, ngan bisan an 15 ka metro la nga wire hin mikropono nagkakantidad na hin mga $20. Salit an Broadcasting nakikigkooperar ha Purchasing Department basi ‘kwentahon an magagasto’ antes pumalit hin bisan ano nga equipment. (Lucas 14:28) Pananglitan, pira kadamu an magpapahimulos hito nga equipment? An pagpalit ba hin bag-o nga equipment an pinakamaopay nga paagi basi masolusyonan an panginahanglan? May-ada ba kita maopay nga storage para ha mga equipment, ngan may-ada ba kita mga tool ngan gin-train nga mga boluntaryo para ha pagmintinar hito?

 Basi magamit hin mas maiha an mga audio/video equipment ngan makatipid hin pundo, regular nga ginmimintinar namon ito. Kon iginpapadara namon an mga equipment, ginsusulod namon ito ha magrig-on nga kahon basi diri ito maguba, ngan ito nga mga kahon gin-aayad liwat kon kinahanglan.

 Naimpres an mga diri Saksi ha kalidad han audio/video ha aton mga kombensyon. Pananglitan, ha usa nga kombensyon, may empleyado ha usa han pinakadaku nga broadcasting company ha kalibotan an nagkomento parte ha kalidad han aton mga audio ngan video ngan parte ha mga nanginginano hito. “Nahipausa gud hiya han nahibaroan niya nga boluntaryo ngatanan ngan diri mga propesyonal an mga membro han amon team,” siring ni Jonathan, nga nabulig pag-set up ngan pag-operate han mga audio/video equipment ha mga kombensyon. “Nagsiring hiya nga an amon gin-install hin usa ngan tunga la ka adlaw, kon an ira kompanya an maghihimo hito, maabot ito hin lima ka adlaw.” Ha usa pa nga kombensyon, an manidyer han pasilidad nagsiring, “Damu na an ginamit dinhi nga mga propesyonal ha musika ngan video, pero yana pa gud la ako makakita hin mga tawo nga sugad kapropesyonal ngan kaeksperto magtrabaho!”

 Paonan-o ka nagpahimulos ha mga audio/video system ha kombensyon? Bangin abaton mo an gin-abat ni David, nga taga-England. Hiya nagsiring: “Otsenta-y-otso anyos na ako, ngan tikang pa han akon kabata, pirme ako natambong ha mga kombensyon. Pero mas masayon na gud yana makapokus ha programa. Tungod han mag-opay nga video, baga hin madagmit la matapos an programa ngan parapriho nga mensahe an aton napapahimulosan ngan mas klaro ito.” Hi Micheal, nga taga-Nigeria, nagsiring, “Tungod kay an aton kabugtoan diri na nakukurian pagpamati ha nagpapahayag o pagkita ha mga video, nakakapokus na hira ngan nag-i-enjoy ha programa.”

 Samtang natambong ka ha “Ipasamwak an Maopay nga Sumat!” Regional ngan Espesyal nga mga Kombensyon yana nga tuig, hunahunaa hin madaliay an ngatanan nga ginbuhat basi mabatian ngan makita mo an programa. Mapasalamaton kami nga an imo donasyon, pati na an mga donasyon pinaagi ha donate.pr418.com, nakabulig nga magin posible ito. Salamat.