Han 2020, nagkaada damu nga kalamidad ngan nagtikang an COVID-19 nga pandemya ha bug-os nga kalibotan. Paonan-o ginbuligan han mga Saksi ni Jehova an mga naapektohan hito?

 Han 2020 nga tuig han pag-alagad, a gin-aprobaran han Coordinators’ Committee han Nagmamando nga Lawas an paggamit hin 28 milyon ka dolyar b para ha disaster relief. Nakabulig ini ha mga biktima han sobra 200 nga kalamidad—upod na an COVID-19 nga pandemya, damu nga bagyo, pagbaha ha Aprika, kakulang hin pagkaon ha Venezuela, ngan huraw ha Zimbabwe. An mga donasyon nakabulig ha pagbayad han pagkaon, tubig, urukyan, bado, ngan pagtambal, sugad man han ginkikinahanglan nga mga suplay para ha paglimpyo, pag-ayad, ngan pagtukod utro. Aadi an pipira nga ehemplo han relief work.

 COVID-19. Ha bug-os nga kalibotan, an pandemya nakaapekto ha aton kabugtoan ha pisikal, emosyonal, ngan pinansyal. Basi mabuligan hira, sobra 800 nga Disaster Relief Committee (DRC) an ginporma ha bug-os nga kalibotan. Ini nga mga committee an nanginano ha mga panginahanglan han aton kabugtoan ngan naghatag dayon hin mga report nga nakabulig ha Coordinators’ Committee nga mahibaroan kon paonan-o gigiyahan ha pinakamaopay nga paagi an relief work.

 Ha bug-os nga tuig, damu an ginbuligan han mga DRC nga magkaada pagkaon, tubig, mga gamit para ha panlimpyo, ngan kinahanglanon nga medisina. Ha pipira nga lugar, an mga DRC nag-asister liwat ha mga tigurang basi buligan an kabugtoan nga makakarawat hin ayuda tikang ha gobyerno.

 Napansin han mga diri Saksi an aton relief work. Pananglitan, hi Field Simwinga, an district commissioner han Nakonde, Zambia, nagsiring ha aton kabugtoan: “Mapasalamaton kami ha iyo napapanahon nga pagtagana han ginkikinahanglan gud nga bulig ha naapektohan nga mga pamilya.”

 Kakulang hin Pagkaon ha Angola. Tungod han COVID-19 nga pandemya, naapektohan an mga suplay hin pagkaon ha Angola ngan nagmahal gud an mga presyo hito. Damu han aton kabugtoan an mas nakurian na nga makapalit hin pagkaon.

 An branch ha Brazil ginhangyo nga bumulig pinaagi ha pagpadara hin mga package hin pagkaon ha aton kabugtoan ha Angola. Basi magamit ha pinakamaopay nga paagi an mga pundo para ha relief, gin-research hin maopay kon paonan-o papaliton ngan ipapadara an pagkaon, ngan bultohan an pagpalit hito. Salit 22 ka dolyar la an aberids nga gasto ha pagpalit ngan pagpadara han tagsa nga package, pero an sulod hito haros 20 ka kilo nga pagkaon sugad han bugas, beans, ngan asyete. Ha pagkayana, 33,544 na nga package an naipadara—nga may kabug-aton nga 654 ka metriko tonilada. Upod han mga pagkaon nga ginpalit ha Angola mismo, ini nga mga suplay nakabulig ha pagpakaon hin sobra 50,000 ka tawo!

 Ano an inaabat han kabugtoan mahitungod hini nga bulig? Hi Alexandre, nga naukoy ha nahibubulag nga bahin han Angola, nagsiring: “Para ha akon, ebidensya ini nga hinigugma ako ni Jehova ngan diri ako nag-uusahan. Ginpapabilhan ako han organisasyon ni Jehova!” Hi Mariza, nga nagsusolo nga nanay, nagsiring: “Nabatian ni Jehova an akon pangaraba. Ginpapasalamatan ko hiya ngan an iya organisasyon!”

 Bulig ha Panahon han Huraw ha Zimbabwe. Han 2020 nga tuig han pag-alagad, nagkaada duro nga huraw ha Zimbabwe, salit minilyon an nag-antos hin sobra nga gutom. Yinukot nga Saksi ha Zimbabwe an waray igo nga pagkaon.

 Lima nga DRC an ginporma basi bumulig ha pagtagana hin pagkaon ha aton kabugtoan. Ginatos nga magwarali an bumulig pinaagi ha pagputos hin pagkaon, pagkarga hin mga suplay, o pagpahuram han ira mga sarakyan. c Han 2020 nga tuig han pag-alagad, 691,561 ka dolyar an gin-gamit basi bumulig ha pagpakaon hin sobra 22,700 ka tawo!

 Ha pipira nga kahimtang, naubos na an pagkaon han kabugtoan han inabot an relief. Han inabot an pagkaon, gindayaw han aton kabugtoan hi Jehova. An iba nagkanta pa ngani hin mga Kingdom song.

 Ha usa nga lugar, duha nga balo nga Saksi an inatender ha usa nga miting nga gin-organisar basi hisgotan an iginpapanhatag nga pagkaon han usa nga nongovernmental organization (NGO). Pero an miting hinay-hinay nga ginhaloan hin pamolitika, salit an mga sister nagdesisyon nga diri hira mauyon han mga kondisyon para makakarawat han ayuda. Samtang nabaya hira ha miting, gin-insulto hira ngan ginsidngan, “Ayaw gud kamo pag-aro hin pagkaon ha amon!” Pero paglabay la hin duha ka semana, may kabugtoan nga inabot ha ira lugar ngan naghatag ha aton mga sister hin pagkaon—nga mas nauna pa ha relief han NGO!

 An disaster relief ha Zimbabwe nagresulta liwat hin maopay nga pamatuod. Pananglitan, ini an eksperyensya ni Prisca, nga naukoy ha gutiay nga baryo. Bisan pa han mga kakurian nga resulta han huraw, nagmiministeryo hiya kada Mierkoles ngan Biernes bisan kon panahon ito ha pangandam han tuna para ha pananom. Gintinawaan hiya han mga tawo ha ira lugar, ngan nasiring: “Gugutumon an imo pamilya tungod han imo pagsinangyaw.” Ini an ginbabaton ni Prisca: “Diri gud ginpapabay-an ni Jehova an iya mga surugoon.” Waray pag-iha katapos hito, nakakarawat hiya hin relief tikang ha aton organisasyon. Bumilib an iba niya nga amyaw ngan nagsiring hira kan Prisca: “Waray ka gud pabay-i han Dios salit karuyag namon nga mahibaro pa mahitungod ha iya.” Yana, pito nga iya amyaw an namamati ha mga katirok han kongregasyon nga ginbubrodkast ha radyo.

 Samtang nagtitikahirani kita ha kataposan, padayon kita nga makakaeksperyensya hin mga kalamidad. (Mateo 24:3, 7) Ginpapasalamatan gud an iyo mga donasyon nga iginhahatag gamit an iba-iba nga paagi ha donate.pr418.com. Napapanahon ito ngan daku gud nga bulig.