Ha ginatos ka milyon nga naukoy ha Latin America, may-ada minilyon nga may kalugaringon nga nitibo nga mga linggwahe ngan mga kustomre. Damu hini nga nitibo nga mga tawo an aton kabugtoan ha espirituwal, nga ginpapabilhan an ira kultura. Basi mabuligan ha espirituwal an mga tawo, ira iginhuhubad ngan iginpapanhatag an mga publikasyon han mga Saksi ni Jehova ha sobra 130 nga nitibo nga mga linggwahe ha Latin America. a Pero an pipira ha ira ginkukontra kay nag-aalagad hira kan Jehova ngan nadiri pag-api ha mga kustomre nga komon ha ira mga komunidad nga diri uyon ha Kasuratan. Paonan-o ginagamit an imo mga donasyon basi makabulig ha ira?

 Ha Mexico, an aton kabugtoan ha usa nga komunidad han mga Huichol ha kabukiran han Jalisco State matinalahuron nga nagdumiri pag-api ha relihiyoso nga mga buruhaton nga diri kinakarawat han ira konsensya. b Pero nakapasina ini ha iba ha ira komunidad. Han Disyembre 4, 2017, may bayolente nga mga tawo nga umatake ha usa nga grupo han mga Saksi ngan han mga kaupod nira. Ginpwersa hira nga umiwas ha komunidad, gin-guba an ira mga propyedad, ngan gintarhog nga papatayon an bisan hin-o nga bumalik.

 Ginhatag han mga Saksi ha kahigrani nga mga bungto an nangunguna nga mga panginahanglan han aton kabugtoan. Pero ano an puydi buhaton basi makabalik hira ha ira lugar? “Waray kami igo nga kwarta basi kumuha hin abogado,” siring han brother nga hi Agustín, “ngan diri kami maaram kon diin maaro hin sagdon parte ha amon sitwasyon.”

 Tungod kay gin-aatake an kagawasan ha pagsingba han aton kabugtoan, gumios dayon an sanga nga opisina han Central America. Siyahan, ginhangyo nira an lokal nga mga opisyal nga imbistigaran ini nga krimen. Sunod, nakakarawat hira hin pagtugot tikang ha Coordinators’ Committee han Nagmamando nga Lawas han mga Saksi ni Jehova nga magpabulig ha Legal Department ha world headquarters ngan magpasaka hin kaso tungod han ginbuhat ha aton Huichol nga mga kabugtoan. Ha urhi, an kaso nakaabot ha Supreme Court of Justice of the Nation—an pinakahitaas nga korte ha Mexico.

 Usa nga grupo hin mga abogado tikang ha iba-iba nga nasud an nag-andam hin klaro nga argumento diin iginsaysay nira nga sugad la nga kinahanglan irespeto han iba an kultura han nitibo nga mga komunidad, kinahanglan irespeto ngan proteksyonan liwat han mga komunidad an kagawasan han ngatanan nga ira sakop. An ngatanan nga tawo may-ada katungod diin man hira naukoy.

 Han Hulyo 8, 2020, an Supreme Court of Justice nagkaurosa ha pagdesisyon pabor ha mga Saksi ni Jehova. Iginsugo nira nga an ngatanan nga ginpaiwas kinahanglan tugotan nga bumalik ha ira komunidad. Hi Agustín, nga gin-unabi kanina, nagpahayag han iya pagpasalamat nga amo gihap an inaabat han iba: “Mapasalamaton ngan malipayon gud kami ha ginbuhat han mga kabugtoan para ha amon. Kon waray kami nira buligi, waray gud kami mahihimo.”

 Nakaeksperyensya liwat hin pariho nga pagkontra an aton kabugtoan ha San Juan de Ilumán, usa nga komunidad ha Ecuador diin damu an naukoy nga nitibo han Otavalo Valley. Han 2014, katapos makuha an ngatanan nga ginkikinahanglan nga permit, gintikangan nira an pagtukod hin Kingdom Hall. Pero ha pagpanguna han usa nga padi, ginpwersa hira hin sobra 100 ka tawo nga ig-undang an ira pagtukod. Katapos, ginsugo han komunidad an mga Saksi ni Jehova nga iundang an ira pagkatirok para ha pagsingba.

 An mga legal department ha sanga nga opisina han Ecuador ngan ha world headquarters nagbulig basi depensahan an kongregasyon tikang hini nga pagtalapas han ira kagawasan ha pagsingba. An aton kabugtoan nagpasaka hin kaso parte hini. Tungod hini, igin-undang han komunidad an ira pagkontra ngan gintugotan an kongregasyon nga ibalik an ira mga katirok ngan tapuson an pagtukod han ira Kingdom Hall. Pero basi maprotektaran an katungod han aton mga kabugtoan ha tiarabot, ginhangyo han aton mga representante an mas hitaas nga mga korte nga maghimo hin desisyon ha importante gud nga isyu: Dapat ba irespeto han nitibo nga mga komunidad an mga katungod han tawo nga iginpapatuman ha bug-os nga kalibotan?

 Han Hulyo 16, 2020, ginpamatian an kaso ha Constitutional Court of Ecuador, an pinakahitaas nga korte hito nga nasud. An mga abogado nga kabugtoan ha Ecuador an nagrepresentar para ha kongregasyon. Dugang pa, upat han aton eksperyensyado nga abogado nga kabugtoan nga tikang ha iba-iba nga nasud an inatubang ha korte. Tungod han mga restriksyon may kalabotan ha COVID-19, ginhimo nira ito pinaagi ha videoconference. Ini an siyahan nga higayon nga gintugotan han bisan ano nga korte an usa nga legal team nga nagrirepresentar ha mga Saksi ni Jehova ha bug-os nga kalibotan nga ipresenta an ira mga argumento hini nga paagi. c Gin-unabi han team an mga balaud ha bug-os nga kalibotan nga nagpapakita nga diri nawawara an katungod han nitibo nga mga tawo tungod la kay bahin hira han usa nga nitibo nga komunidad.

 An aton kabugtoan ha Otavalo Valley eksayted nga naghuhulat ha desisyon han Constitutional Court. Samtang waray pa ito, mapasalamaton gud hira ha bulig nga ira nakarawat. Hi César nga nag-aalagad sugad nga tigurang ha Ilumán Quichua Congregation, nagsiring: “Hi Jehova gud la, pinaagi han iya organisasyon, an maghahatag hin daku nga bulig para ha pipira la nga tawo.”

 Mga Saksi ni Jehova an ngatanan nga abogado nga nagdepensa ha kaso, ngan malipayon hira nga gamiton an ira kahibaro ha balaud ngan waray hira magpabayad. Pero an pagpasaka hini nga mga kaso, pagpangandam para hito, ngan pagdepensa ha korte kinahanglan hin panahon ngan kwarta. An aton mga abogado ngan an iba pa nga kabugtoan naggahin hin sobra 380 ka oras ha pagpangandam hin mga argumento ngan hin 240 ka oras ha paghubad han mga dokumento para ha pagbista ha Mexico. Ginatos ka oras naman an gin-gamit han haros 40 nga abogado tikang ha iba-iba nga bahin han kalibotan para ha kaso ha Ecuador. Diin kita nakuha para ha kagarastohan may kalabotan ha pagdepensa ha aton kabugtoan? Pinaagi ha mga donasyon nga iyo iginhahatag gamit an iba-iba nga pamaagi ha donate.pr418.com. Damu nga salamat han iyo pagkamahinatagon.