An mga video ha aton regional nga mga kombensyon nakakabantad han aton kasingkasing ngan nakakabulig ha aton nga mas masabtan an igintututdo han Biblia. May-ada 114 nga video para ha 2020 ‘Magrayhak Pirme’! Regional nga Kombensyon. Upod hito an 43 nga pahayag han mga membro han Nagmamando nga Lawas ngan han ira mga kabulig. Nahunahuna mo na ba kon ano kadaku ito nga trabaho ngan kon pira an nagasto ha paghimo hito nga mga video?

 Haros 900 nga kabugtoan tikang ha iba-iba nga nasud an naggamit han ira panahon ngan abilidad basi bumulig ha paghimo han programa. Ha kabug-osan, naggamit hira hin haros 100,000 ka oras ha duha ka tuig nga pagtrabaho hini nga proyekto. Upod hito an 70,000 ka oras nga ginkinahanglan basi matapos an 76 ka minuto nga drama nga basado ha Biblia nga Nehemias: “An Kalipay nga Iginhahatag ni Jehova Amo an Iyo Balwarte.”

 Syempre, daku an gasto ha pag-ataman hinin nagsasakripisyo nga mga boluntaryo, ngan ha paghatag ha ira han technical support, mga garamiton, ngan mga pasilidad nga ginkinahanglan basi matapos ini nga proyekto.

 “Karuyag gud han Teaching Committee han Nagmamando nga Lawas nga makita ha aton mga video an iba-iba nga kultura ngan lugar. Pinaagi hini, maipapakita naton nga bug-os-kalibotan an aton pagminagburugto,” siring ni Jared Gossman, nga nagtatrabaho ha Audio/Video Services. “Basi mahimo ito, 24 nga team ha 11 nga nasud an nagburublig ha paghimo hini nga proyekto. Ginkinahanglan an daku nga kwarta, maopay nga pagplano, ngan koordinasyon basi urosa nga makagtrabaho an mga boluntaryo ha bug-os nga kalibotan.”

 Damu han aton mga video an nagkikinahanglan liwat hin mga garamiton ngan set nga para gud la hito. Pananglitan, an mga set para ha Nehemias: “An Kalipay nga Iginhahatag ni Jehova Amo an Iyo Balwarte” ginhimo ha sulod han studio ha Mt. Ebo hirani ha Patterson, New York, U.S.A. Basi magamit ha pinakamaopay nga paagi an mga donasyon ngan magin husto liwat ha kasaysayan an video, an kabugtoan naghimo hin magaan nga mga props nga ginsubad tikang ha mga pader han kadaan nga Jerusalem. An tagsa hini nga mga “pader” unom ka metro an kahitaas. Hinimo ini ha kahoy nga ginhaklapan hin foam ngan ginpintaran basi magin bato pagkit-on. Ini nga mga “pader” nabuburobalhin basi umangay ha iba-iba nga eksena, salit naibanan an kadamu han set nga ginkinahanglan. Bisan pa hito, an paghimo pa la hin mga set para hito nga drama inabot hin haros $100,000 (U.S.). a

 An paghibaro hini nga mga detalye nakakabulig ha aton nga mas maapresyar an programa han regional nga kombensyon yana nga tuig. Nasarig kami nga an mga sakripisyo nga ginhimo para hini nga programa magriresulta hin daku nga kadayawan kan Jehova ha bug-os nga kalibotan. Salamat han imo kinasingkasing nga donasyon para ha bug-os-kalibotan nga buruhaton gamit an donate.pr418.com ngan iba pa nga paagi.