Hinin kataposan nga mga adlaw, ‘makakabati kita hin mga girra ngan hin mga sumat mahitungod han mga girra.’ (Mateo 24:6) Pero kon an aton kabugtoan naatubang hin mga problema tungod hini nga mga girra, nakakakarawat hira han bulig nga ira ginkikinahanglan. An 2022 nga Update Tikang ha Nagmamando nga Lawas #3 naghatag hin makaparig-on nga impormasyon mahitungod ha nagpapadayon nga relief work ha Eastern Europe para ha mga naapektohan han girra ha Ukraine. Paonan-o nahihimo han kabugtoan ini nga pagbulig bisan pa han nagpapadayon nga girra? Ano an nagin epekto ha kabugtoan ha Ukraine ha ira nakarawat nga mga relief?

 Han Pebrero 24, 2022, an adlaw nga nagtikang an girra ha Ukraine, gin-aprobaran han Coordinators’ Committee an usa nga badyet ha panhatag hin relief basi mabuligan an aton kabugtoan ha Ukraine. An Ukraine branch nagtikang dayon pamalit han mga ginkikinahanglan han kabugtoan ngan iginpanhatag ito pinaagi han 27 nga Disaster Relief Committee.

 Labot la han bulig han Ukraine branch, an kabugtoan ha World Headquarters han mga Saksi ni Jehova nagtikang dayon paghunahuna kon ano nga praktikal nga bulig an ira maihahatag. An Coordinators’ committee ngan Publishing committee han Nagmamando nga Lawas naghangyo ha Global Purchasing Department nga makig-coordinate ha mga representante han Ukraine ngan Poland branch basi maitagana ini nga panginahanglan ngan makahimo hin plano han mga bubuhaton. An mga kabugtoan tikang ha Purchasing, Shipping, ngan Legal department han tagsa nga branch, usa nga membro han Ukraine Branch Committee, ngan mga membro han Global Purchasing Department nagmiting kada adlaw para pag-iristoryahan an ira hihimoon.

 “Siyahan, kinahanglan namon hibaroan kon ano an mga ginkikinahanglan,” siring ni Jay Swinney han Global Purchasing Department. “Karuyag namon magtagana hin pagkaon ngan mga gamit ha kalimpyo nga nahiaraan han lokal nga mga kabugtoan. Pero an paghibaro ha kon ano gud an ginkikinahanglan diri la amo an problema. Kinahanglan liwat namon hibaroan kon paonan-o idideliber ini nga mga relief ngadto ha Ukraine ha panahon han girra ha pinakatalwas ngan pinakamadagmit nga paagi tubtob nga posible.”

 Han Marso 9, 2022, nahibaroan kon ano gud an ginkikinahanglan han kabugtoan. Magtatagana hin kinahon nga mga pagkaon, sugad han de-lata nga karne ngan isda, lugas, bugas, ngan beans, pati na hin mga gamit ha kalimpyo sugad han sabon ngan tisyu. Hito nga panahon, ginbabanabana nga an upat ka semana nga suplay hini nga mga relief para ha usa ka tawo maabot hin mga $65 (U.S.). Tungod kay yinukot han aton kabugtoan an posible nga nanginginahanglan, gin-aprobaran han Coordinators’ Committee an daku nga badyet basi maitagana ini. Pero paonan-o maidideliber ini nga mga relief nga diri maibubutang ha peligro an aton kabugtoan?

 Han Marso 13, duha nga brother tikang ha Poland an nagtesting pagdeliber tikang ha sanga nga opisina han Poland ngadto ha usa nga bodega hirani ha Lviv, Ukraine. Ha mga adlaw antes hira lumakat, ginbuligan han kabugtoan ha branch ha Poland ngan Ukraine inin duha nga boluntaryo ha pag-andam para ha ira biyahe. Ginkompleto han branch an legal nga papeles nga ginkikinahanglan ha pagtabok ha border basi maideliber an relief, ginsiguro nga an awto han mga brother may klaro nga karatola nga nagpapakita nga nagdideliber hira hin relief, ngan nakig-coordinate ha lokal nga kabugtoan ha Ukraine basi mahibaroan an pinakamadagmit nga ruta kon makaabot na an mga brother ha border. Tungod han maopay nga pagpangandam ngan han bendisyon ni Jehova, naideliber an mga relief ha mga Disaster Relief Committe ha Lviv ha sulod hin 24 ka oras, ngan an aton kabugtoan nakabalik ha Poland nga talwas.

 Bisan kon an siyahan nga pagtesting ha pagdeliber hin mga relief nagin malampuson, an naideliber la han mga brother waray mag-usa ka metriko tonilada nga mga relief. Kinahanglan pa magdeliber hin mga 200 ka metriko tonilada! Paonan-o iton sugad kadamu hin relief maidideliber ngan maipapanhatag ha pinakamadagmit nga paagi?

 Katapos mabasa an mga report ha jw.org kon paonan-o naapektohan an mga kabugtoan han mga panhitabo ha Ukraine, may mga indibiduwal tikang ha iba-iba nga bahin han kalibotan nga karuyag bumulig. Damu nga tikang ha hirayo nga mga lugar an naghatag hin mga donasyon nga kwarta ha bug-os-kalibotan nga buruhaton han mga Saksi ni Jehova tungod kay maaram hira nga an ira mga donasyon magagamit ha pinakamaopay nga paagi. An iba nga nag-uukoy ha mga nasud nga hirani ha border naghatag han ira panahon, kusog, ngan mga panag-iya basi makabulig. Kitaa an pipira nga ehemplo.

 Ha Poland, an mga boluntaryo nag-andam hin yinukot ka karton nga mga relief, ngan an kabataan naghimo hin mga kard. “Damu ka beses nga nabasa ko na an teksto ha Salmo 110:3, diin nasiring ito nga an kan Jehova ‘katawohan kinaburut-on nga magpipresentar han ira kalugaringon,’” siring ni Bartosz Kościelniak, usa nga membro han Purchasing Department ha Poland branch. “Pero han nakita ko mismo an damu hinduro nga suporta, ginatos nga mga boluntaryo nga andam bumulig dayon ngan magtrabaho, nakita ko gud an pagkatinuod hini nga mga pulong.”

 Usa nga Saksi ni Jehova nga tag-iya hin international logistics company ngan nagpagamit han iya mga trak ngan nagdonar hin mga krudo para hito, an nagsiring: “Para ha akon, usa ito nga oportunidad nga ipakita ko an akon gugma ha akon kabugtoan ngan kan Jehova. Malipayon gud ako nga nagboluntaryo ako pagbulig.” Ginbabanabana nga sobra 7,700 ka litro nga krudo an igindonar, ngan gin-gamit han kabugtoan an ira panahon ngan kusog ha pagdrayb hin haros 48,000 ka kilometro basi maideliber ini nga mga relief!

 Tungod han kinaburut-on ngan mahigugmaon nga pagtrabaho han aton kabugtoan, han Marso 28—paglabay la hin 15 ka adlaw tikang han siyahan nga pagtesting ha pagdeliber hin mga relief—100 ka metriko tonilada nga pagkaon, mga gamit ha kalimpyo, ngan medikal nga mga suplay an naideliber na ha Ukraine! Ngan tungod kay nagdonar an kabugtoan ngan mga supplier hin damu nga butang ngan iba pa nga panginahanglan, daku gud an natipid ha badyet para hini nga mga relief. Ha pagkayana, an mga Saksi ni Jehova nakagpadara na hin sobra 190 ka metriko tonilada nga relief ha Ukraine. Ano an nagin epekto ha kabugtoan hini nga mga relief?

 Kon naabot na ini nga mga relief ha Lviv, iginpapanhatag dayon ito han mga Disaster Relief Committee ha Ukraine ha mga nanginginahanglan. An mga relief igindideliber ha iba-iba nga syudad nga an pipira sobra 1,300 ka kilometro an kahirayo tikang ha Lviv. Bisan kon ini nga buruhaton ginhimo ha organisado nga paagi, nagkinahanglan la gihapon ini hin panahon. a

 Hi Markus Reinhardt, usa nga membro han Ukraine Branch Committee, nagsiring: “Hini nga panahon han krisis, nakita mismo han damu nga kabugtoan an gugma ni Jehova ngan an mga kapulsanan ha pagsunod han giya han iya organisasyon—bisan antes pa mahitabo an usa nga trahedya. Pananglitan, gin-aghat an ngatanan nga magkaada pirme suplay hin pagkaon ngan tubig ha ira mga balay nga maabot hin pipira ka semana. May kalabotan hini nga giya, an tigurang nga hi Anton nga nag-aalagad ha Kyiv nagsiring: ‘Igin-andam kami han organisasyon ni Jehova para ha makuri nga mga sitwasyon, ngan mapasalamaton kami tungod hito. An pagkaada suplay hin pagkaon ngan tubig pati an pagkaada hin radyo nakatalwas han amon kinabuhi.’ Mapasalamaton gud kami nga ginsunod han kabugtoan ini nga giya tungod kay nakaghatag ini hin panahon ha sanga nga opisina nga maorganisar an ginkikinahanglan nga bulig han kabugtoan.”

 Ano an gin-abat han kabugtoan han nakarawat nira an mga relief? Hira Mykola ngan Zinaida, nga nag-uukoy ha Kharkiv, nagsiring: “Nabantad gud kami han iyo gugma. Damu gud nga salamat ha pagkaon ngan medisina. Nakita gud namon nga gin-aataman kami ni Jehova.” Hi Valentyna nga naukoy liwat ha Kharkiv nagsiring: “Tikang han nagtikang an girra, pirme hilaba an pila ha mga tindahan. Salit diri pirme masayon an pagpalit han mga kinahanglanon. Pero maaram hi Jehova hini nga problema. Nagtoka hiya hin kabugtoan nga manhatag hin mga relief ha mga balay, ngan an mga sulod hito amo gud an amon ginkikinahanglan. Ha sugad nga makuri nga mga kahimtang, kon an sitwasyon baga hin waray na paglaom, inaabat han usa an pag-ataman ni Jehova ngan han iya organisasyon ha espesyal nga paagi. . . . Makalilipay gud makita an iya napapanahon ngan ginkikinahanglan gud nga bulig ngan suporta.”

 Hira Yevhen, Iryna, ngan Mykyta, nga pinalagiw tikang ha Mariupol, nagsiring: “Mapasalamaton gud kami han iyo pag-ataman ngan suporta ha amon pamilya. Napapanahon gud ito. Maaram kamo, ha siyahan, naghunahuna kami nga an sulod han mga kahon mga butang la nga amon kinahanglanon, pero han gin-abrihan namon ito, nasantop namon nga nakasulod liwat dida hito an iyo gugma!”

 Sigurado nga nakita niyo kon paonan-o gin-gamit ni Jehova an iya espiritu basi giyahan an iya katawohan nga maideliber an mga relief bisan pa han “mga girra ngan hin mga sumat mahitungod han mga girra.” Daku liwat an naibulig han iyo mga donasyon ha bug-os-kalibotan nga buruhaton, nga an damu hito iginhahatag gamit an donate.pr418.com. Mapasalamaton gud kami han iyo pagin mahinatagon!

Panhatag hin Relief ha Madagmit Ngan Talwas nga Paagi Tubtob nga Posible

1. Pebrero 24, 2022: Gin-aprobaran han Coordinators’ Committee an badyet para ha panhatag hin relief ha Ukraine, nga tungod hito an branch nagtikang panhatag hin mga relief

2. Pebrero 24–Marso 8, 2022: An Ukraine branch namalit hin pipira nga panginahanglan han kabugtoan ngan iginpahatag ito pinaagi han mga Disaster Relief Committee. An branch nag-andam liwat basi kumarawat ngan manhatag hin mga relief nga tikang ha Poland

3. Marso 9, 2022: Gin-aprobaran han Coordinators’ Committee nga magdeliber hin mga relief ngadto ha Ukraine

4. Marso 10–12, 2022: Naghimo hin mga plano para ha pagtesting ha pagdeliber hin mga pagkaon ngan mga suplay tikang ha Poland ngadto Lviv, Ukraine

5. Marso 13, 2022: Nagtesting pagdeliber hin mga pagkaon ngan mga suplay tikang ha Poland ngadto ha Lviv, Ukraine

6. Marso 14–16, 2022: Ha usa nga Assembly Hall hirani ha Poznan, Poland, an mga boluntaryo ha Local Design/Construction nag-andam han mga relief nga mga pagkaon ngan mga gamit ha kalimpyo

7. Marso 17, 2022: Upat ka adlaw katapos han malampuson nga pagtesting ha pagdeliber hin mga relief, 13 ka metriko tonilada nga mga relief an igindeliber ngadto ha border han Ukraine

8. Marso 21–27, 2022: An nabibilin nga mga relief gin-andam ha Poland ngan iginpadara ha Ukraine ngan katapos iginpanhatag ha mga lugar nga nanginginahanglan ha sulod hin 24 ka oras

9. Marso 28, 2022: Ha sulod hin 20 ka adlaw katapos maaprobaran, 100 ka metriko tonilada nga pagkaon, mga gamit ha kalimpyo, ngan medikal nga mga suplay an naideliber ngadto ha Ukraine

 Ha pagkayana, an mga Saksi ni Jehova nakagpadara na hin sobra 190 ka metriko tonilada nga relief ngadto ha Ukraine.