An International Bible Students, nga ha urhi ginkilala sugad nga mga Saksi ni Jehova, nagtikang han ira organisado nga pagsangyaw ha maabiabihon nga mga tawo han Mexico han 1917. Ginatos nga sinsero nga mga tawo an nagtikang magsingba kan Jehova ha sumunod nga mga dekada. Kondi han World War II, waray umuyon an gobyerno han Mexico ha mga lokasyon ngan mga bilding diin kita nagsasangyaw ngan nagkakatirok.

 Hito nga panahon, an balaud han Mexico nagsusugo nga an ngatanan nga pagsingba ha publiko kinahanglan himoon ha mga bilding nga gintatag-iya han gobyerno. Nagin problema ito kay an aton mga kombensyon ginhihimo ha panpubliko nga mga bilding, an aton sinemana nga mga katirok ginhihimo ha balay han mga Saksi ni Jehova, ngan nagsasangyaw kita ha mga kalye ngan ha balay-balay.

 Para masunod an balaud, han 1943 nagparehistro kita sugad nga nonprofit nga civil ngan cultural association nga nabulig ha pagtutdo ha mga tawo basi magin maopay an ira kinabuhi. Nagkaada kita katungod sugad nga cultural organization imbes nga relihiyon. Sugad nga resulta, makakagkatirok na kita ngan makakagsangyaw bisan ha mga bilding nga diri gintatag-iya han gobyerno.

 An aton mga buruhaton nag-uupod han mga programa parte ha kultura ngan edukasyon. Salit nasusunod naton an balaud han gobyerno para ha civil ngan cultural organization. (Roma 13:1) Syempre, an aton hingyap nga buligan an mga tawo pinaagi ha pagtutdo ha ira han mga kamatuoran ha Biblia waray magbag-o. (Isaias 48:17, 18) Waray pag-iha, nakita naton nga ginbibendisyonan ni Jehova ini nga bag-o nga kahikayan. Tungod hito nagin posible para ha damu nga tawo nga mabilngan an kamatuoran, sugad han nahinunumdoman han damu nga mga Saksi yana.

 Tikang pa hadto, an aton nangunguna nga buruhaton ha Mexico amo an pagsangyaw han maopay nga sumat han Ginhadian han Dios. Kondi pariho kan apostol Pablo, ginbabag-o naton an aton paagi ha ministeryo depende ha kahimtang. (1 Corinto 9:20-23) Pananglitan, han hi Pablo nakiistorya ha mga tawo han Atenas ha Areopago, waray niya direkta nga unabiha an Kasuratan. (Buhat 17:22-31) Ha pariho nga paagi, kon nagsasangyaw, diri kami nagdadara hin Biblia o nag-uunabi hito kon nakikiistorya ha mga tawo.

 “Nagpapakilala kami sugad nga mga representante hin cultural ngan educational society,” siring ni Isabel. “Kasagaran, nagpupokus ako ha mga artikulo han Pagpamata! nga diri direkta nga naghihisgot hin mga topiko ha Biblia.” Ano man kon an tagbalay karuyag mahibaro hin dugang mahitungod ha Dios? Hito nga higayon, nagtututdo kami hin kamatuoran ha Biblia ha ira. “Tungod kay diri kami nagdadara hin Biblia,” siring ni Aurora, “kinahanglan namon magmemorya hin damu nga teksto.” Nalilipay liwat an mga tagbalay kon gin-gagamit namon an ira mismo Biblia.

 Andam kami isaysay an pagin legal han aton buruhaton ha bisan hin-o nga nagkukwestyon hito. (Filipos 1:7) Daku nga bulig an mga ID nga gintagana han gobyerno. a “Pirme namon gindadara an ID nga pinirmahan han Secretary of Foreign Affairs,” siring ni María. “Kon ginpapaundang kami han mga awtoridad ngan ginpapakianhan kon ano an amon ginbubuhat,” siring ni Samuel, “iginpapakita namon ha ira an amon ID.”

 Nakabulig an amon ID ha panahon nga may pagkontra. Pananglitan, hi Jesús, nga nag-alagad ha Jalisco State, nagsiring: “Han 1974, gindara ako ngan an usa nga mag-asawa nga Saksi han usa nga grupo nga ginpapangunahan han padi ngadto ha lokal nga mga awtoridad basi kami paundangon ha amon buruhaton. Ginpakita namon ha mga awtoridad an amon ID, ngan nagin kalmado an ngatanan. Nakarawat namon an legal nga bulig salit nakapadayon kami pagbulig ha mga interesado hito nga lugar. Yana, damu na an kongregasyon hito nga syudad.”

 Tungod kay usa kami nga civil association nga nagpu-promote hin edukasyon, nag-offer kami ha mga tawo hin libre nga pagtutdo ha pagbasa ngan pagsurat. b “Tayming gud ito nga kahikayan hito nga panahon,” siring ni Ariel. “Damu nga tawo hito nga panahon an waray mag-eskwela, pero daku an ira hingyap nga makabasa ha Biblia. Gintututdoan namon hira ha pagbasa ngan pagsurat, ngan diri nag-iiha, damu ha ira an nagpapa-Bible study ha amon.”

 “Kon nahibabaro na hira pag-spell han mga letra,” siring ni Ruth, “waray na nakakapugong ha ira. Tungod kay nahibaro hira pagbasa ngan pagsurat naabat hira nga may nahimo hira nga importante ngan nalilipay hira. Katapos hito, nakita gud namon an ira pag-uswag ha espirituwal.”

 An mga Saksi ni Jehova nakarehistro sugad nga civil ngan cultural association tikang han 1943 tubtob han 1993. Hito nga panahon, nabuligan namon an sobra 127,000 ka tawo nga mahibaro magbasa ngan magsurat ngan sobra 37,000 an nag-uswag ha ira pagbasa ngan pagsurat. Tungod hito nga aton naibulig gindayaw kita han mga opisyal han gobyerno. (Roma 13:3) Pananglitan, han 2010, gintagan kita hin espesyal nga award tungod han aton “maopay gud nga pangalimbasog nga buligan an mga tawo ha pagbasa ngan pagsurat ha sulod hin mga dekada, nga nakabulig ha yinukot nga mga Mexicano nga mapauswag an ira kinabuhi ha state han Mexico ngan ha bug-os nga nasud.”

 Tungod han klase han amon pagkarehistro, an aton mga katirokan naka-set up pariho hin mga klasrum nga gintatawag nga mga Hall for Cultural Studies. Ginhihimo namon didto an mga katirok ngan mga pagtutdo ha pagbasa ngan pagsurat.

 “Ini nga mga katirokan agsob nga ha mga balay la han kabugtoan,” siring ni Ángel, “ngan damu hini nga mga pamilya an pobre. Pirme ako naiimpres ha ira. Andam hira maghuruot ha usa nga parte han ira balay basi magin katirokan an usa nga parte han balay.”

 Kinahanglan gud an sugad nga mga pagsakripisyo. Mahitungod ha mga katirok han kongregasyon, nagsiring hi Ángel: “Usahay, damu gud an naatender salit damu ha amon an naninindog na la ha gawas. Kinahanglan namon magpakita ha mga bintana basi la makakomento. Pero pirme kami nag-i-enjoy ha mga katirok.”

 Basi malikyan an mga problema, diri namon gindadaku an amon tingog kon nagkakanta o nag-aampo ha mga katirok. Nagsiring hi Edmundo: “Ha panahon han Cultural Talk, nga gintatawag na yana nga pahayag publiko, ginpapabug-atan han mga speaker an praktikal nga mga aspekto han sagdon han Biblia basi mabuligan an mga naatender nga mapauswag an ira kultura ngan magkinabuhi hin mas maopay.” Inabot pa ngani an panahon nga waray na kami gumamit han mga ngaran han mga libro han Biblia. Paonan-o namon ginsisiring an teksto? Naghatag hin sampol hi Manuel: “Imbes nga magsiring, Pahayag kapitulo 21, bersikulo 3 ngan 4, nasiring kami, ‘Libro 66, 21, 3 ngan 4.’” Hi Moises, nga usa liwat nga Saksi, nagsiring: “Nagpapasabot ito nga dapat namon mahibaroan an mga numero nga katugbang han mga libro han Biblia basi mabilngan an mga teksto.”

 Ha kabug-osan, an ginbubuhat han aton organisasyon ha Mexico pariho ha iba nga mga nasud. Bisan kon may mga restriksyon an aton pagsingba, klaro nga ginbibendisyonan ito ni Jehova. Han nagparehistro kita sugad nga civil association han 1943, may 1,565 nga magwarali ha Mexico. Legal nga ginkilala kita sugad nga relihiyon han 1993. Hito nga tuig, an aberids nga kadamu han magwarali inabot hin 366,177. Ngan an ginbuhat hini nga mga magwarali nagresulta hin mas daku pa gud nga pag-uswag. Han 2021, an aberids han kadamu han magwarali ha Mexico inabot hin 864,633. Ano an pipira nga leksyon nga aton mahibabaroan tikang hini nga bahin han kasaysayan?

 Pag-adjust kon may mga ulang. Tungod kay ginbuhat naton ito, legal nga ginkilala kita ha Mexico ha sulod hin 50 ka tuig. “Danay nahuhunahuna ko kon kay ano nga an pipira han amon kahikayan diri pariho ha iba nga nasud,” siring ni Mario. “Pero waray gud ako nabatian nga bisan usa nga nagkwestyon ha instruksyon han organisasyon. Pirme kami natoo nga gin-gigiyahan ni Jehova an iya katawohan. Salit nagin masinugtanon gud kami.”

 Pagpokus ha buruhaton ni Jehova. “Busy gud kami ha panhimo hin disipulo nga buruhaton, tungod hito diri kami sobra nga nababaraka ha iba nga butang,” siring ni Guadalupe. “Basta malipayon la kami ha pag-alagad kan Jehova. Para ha amon, ito an pinakaimportante.”

 Pagpabilin nga duok ha mga igkasi-tumuroo. “An diri namon nahihimo ha Hall for Cultural Studies, sugad han pagkanta han Kingdom song, ginbubuhat namon ha amon mga balay,” siring ni Anita. “Nagpabilin kami nga urosa ngan pirme kami naggagahin hin panahon nga magturotarampo. Ha amon pagturotarampo, pirme namon gin-iiristoryahan an espirituwal nga mga butang.”

 Ini naman an ginsiring ni Florentino: “Kon ginhihinumdom ko an naglabay, kombinsido ako nga an ngatanan nga nahitabo may katuyoan ngan may makukuha kita nga mga leksyon. Klaro ha akon nga ito ngatanan, bisan pa han pagkontra ha aton buruhaton, gin-gigiyahan kami ni Jehova.”