Ha damu nga nasud, tungod han pagtikamahal han mga paraliton, damu an nagkukuri nga mga tawo pati na an mga Saksi ni Jehova. Pero imbes nga sobra nga mabaraka, an mga Saksi naliliaw tungod kay maaram hira nga ‘diri gud papabay-an’ ni Jehova an iya mga surugoon. (Hebreo 13:5) Pirme niya gintutuman ito nga saad. Ginbuhat niya ito ha Pilipinas, usa nga nasud nga damu an pobre. Pero ito nga nasud nagkaada duro nga kakurian ha dekada han 1970 ngan 1980.

 “Danay nagtatangis ako kay gutiay na la an amon pagkaon,” siring han sister nga hi Vicky. a “May mga panahon nga an aada na la bugas, asin, ngan tubig.” An brother naman nga hi Florencio diri nakakabiling hin trabaho. Siring niya: “May-ada na la ako tulo nga bado ngan tulo nga saruwal, nga pauroutro ko nga gin-gagamit kon naatender ha mga katirok ngan mga asembleya.” Paonan-o ito nakaya han katawohan ni Jehova? Ano an nakabulig ha ira nga magpabilin nga marig-on ha espirituwal? Ngan paonan-o an ira ehemplo makakabulig ha aton yana kon tigda nga mahitabo liwat ito ha aton?

 An mga Saksi ha Pilipinas nasarig nga aatamanon hira ni Jehova hito nga makuri nga panahon. (Hebreo 13:6) Ngan ginbuhat niya ito, agsob ha diri ginlalaoman nga mga paagi. Pananglitan, an sister nga hi Cecille nagsiring: “Katapos namon lutoon an ultimo nga usa ka baso nga bugas para ha amon pamahaw, kami nga upat ha pamilya waray na maluluto para ha sunod. Salit nag-ampo kami para ha amon panginahanglan hito nga adlaw. Samtang namamahaw pa kami, may brother nga inabot nga may dara nga lima ka kilo nga bugas. Nagtangis kami tungod ha kalipay hito nga bendisyon ni Jehova. Damu pa an amon eksperyensya pariho hini.”

 Gin-aplikar liwat han katawohan han Dios an praktikal nga kinaadman nga mababasa ha Biblia. (Proberbios 2:6, 7) Pananglitan, an bag-o nga bawtismado nga sister nga hi Arcelita, nga solo hito nga panahon ngan makuri an panginabuhi, sinsero nga nag-ampo kan Jehova. Katapos, ginhunahuna niya an Proberbios 10:4, nga nasiring: “An hubya nga mga kamot magriresulta hin kapobre, pero an maduruto nga mga kamot nagpapariko.” Sugad nga pag-aplikar hito nga mga pulong nag-garden hiya. “Ginbendisyonan gud ni Jehova an akon mga paningkamot,” siring niya. “Ngani, naka-harvest ako nga maeksakto ha akon panginahanglan ha pagkaon ngan makakasuporta ha akon mga iparasahe.”

 An kabugtoan kulang liwat hin pundo para ha pagpalit hin tuna ngan paghimo hin mga Kingdom Hall. Pero waray ito makaulang ha ira nga tumanon an sugo nga magkatirok basi magdinasigay ha usa kag usa. (Hebreo 10:24, 25) Salit ginhimo nira an ira la makakaya. Pananglitan an sister nga hi Deborah nagsiring: “Mga unom kami nga naatender ha mga katirok ha usa nga gutiay nga payag nga ginhimo namon han akon partner nga payunir. An dahon han nipa an amon gin-gamit para ha atop, ngan an mga dahon han lubi para ha mga bungbong, ngan an mga lawas hito ginhimo nga mga lingkoran.”

 Pero an mga balay han kabugtoan an kaurogan nga ginagamit para magin mga katirokan. “An amon gutiay nga balay hinimo ha banwa ngan kawayan,” siring han sister nga hi Virginia. “Kinahanglan namon ibalhin kada Sabado an amon furniture basi magkaada lugar para ha katirok ha sunod nga adlaw.” Ha iba naman nga balay, naturo an atop. Siring han brother nga hi Noel, “Kon nauran iginsasalod namon an mga balde. Pero diri gud namon napapansin nga makuri ito nga mga sitwasyon kay kaupod namon an amon espirituwal nga pamilya.”

 Bisan pa han kakurian, waray maibani an kadasig han mga Saksi ha ministeryo. Hi Lindina nga taga-Negros, nagsiring: “Tungod kay daku an amon pamilya ngan hi Tatay la an nagtatrabaho, danay waray kami kwarta nga iparasahe. Salit agsob nga nagbabaktas kami ngadto ha teritoryo. Pero ma-enjoy la kay damu kami. Maaram liwat kami nga an amon mga paningkamot nakakapalipay kan Jehova.”

 An usa han pinakamakuri amo an pagkadto ha hirayo nga mga teritoryo ha kabukiran basi magsangyaw, kay gutiay la o waray ngani sarakyan nga pampasahero. Hi Esther, nga taga-Luzon, nagsiring: “An amon grupo nga may-ada 6 tubtob 12 nga Saksi temprano pa nga nalarga kay magbabaktas kami hin damu ka kilometro. Bug-os nga adlaw kami nga nagsasangyaw. Nagbabalon kami hin ginluto na nga mga pagkaon, ngan nangangaon kami ha ilarom han mga kahoy. An iba han amon kabugtoan waray balon, pero naupod la gihap hira. ‘Ayaw kabaraka,’ nasiring kami. ‘Maeksakto ha aton ngatanan an aton balon.’”

 Hura nga ginbendisyonan ni Jehova ito nga nagsasakripisyo ha kalugaringon nga disposisyon. Pananglitan, han 1970 may-ada 54,789 nga magwarali ha Pilipinas. Han 1989, ito nga kadamu haros nadoble nga nagin 102,487. Han 2023, an kadamu han parasamwak han Ginhadian ha Pilipinas inabot hin 253,876.

 Bisan pa han makuri gud nga sitwasyon ha ekonomiya, malipayon nga nag-alagad an mga Saksi. “An pagin pobre waray makaulang ha amon nga higugmaon hi Jehova,” siring han brother nga hi Antonio. Hi Sister Fe Abad nagsiring liwat: “Han nagkuri kami han akon bana, nagpabilin kami nga duok kan Jehova ngan naeksperyensyahan namon an mga kalipay ha pagkinabuhi nga simple. Sugad nga resulta, an amon mga anak nahibaro liwat pagsarig ha iya.”

 “An pagin pobre diri problema kon nag-aalagad kita kan Jehova,” siring ni Lucila, nga taga-Samar. Nagsiring pa hiya nga “kon uunahon naton an Dios, magigin kontento kita ngan magpapabilin nga positibo. Ngani, nalilipay ako kon nakikilala han akon mga Bible study hi Jehova ngan ha urhi nakakaupod ko ha pagpayunir.”

 Tungod kay diri kita maaram han mahitatabo ha sunod nga mga adlaw, tigamnan naton an ginsiring han tigurang nga hi Rodolfo, nga nagsurat: “Tungod kay nabuhi ako ha makuri nga mga panahon han dekada han 1970 ngan 1980, inabat ko an kamot ni Jehova ha akon kinabuhi. Bisan pa kon haros waray ako kwarta, waray ko abata nga pobre ako. Gin-ataman ako ni Jehova. Nai-enjoy ko gud an gimaopayi nga kinabuhi yana, ngan ginpapamulat ko an ‘tinuod nga kinabuhi’ ha tiarabot nga Paraiso.”—1 Timoteo 6:19.