Han natapos an Girra ha Kalibotan II han 1945, ruba an kadak-an han Germany. Bungkag an mga syudad, waray sulod an mga eskwelahan, diri nagagamit an mga hospital, ngan nagsasarang la ha bisan diin an mga bomba nga waray bumuto. Dugang pa, kulang na an suplay han pagkaon, salit nagmahal an mga paraliton. Pananglitan, ha black market, an presyo han 500 ka gramo nga butter katugbang han unom ka semana nga sweldo!

 Upod ha mga naapektohan an ginatos nga mga Saksi ni Jehova nga napriso hin damu ka tuig ha mga prisohan ngan concentration camp tungod han ira pagtoo. Han 1945, ginpagawas hira nga waray man la dara nga bisan ano kondi an ira la sul-ot nga panpriso nga mga bado. An iba nga mga Saksi nawad-an hin propyedad ngan mga panag-iya. An pipira nag-antos hin grabe nga kagutom salit nadismayo hira ha panahon han mga katirok.

 An mga Saksi ni Jehova ha iba nga bahin han kalibotan ginios dayon basi makagpadara hin pagkaon ngan bado. An kabugtoan ha world headquarters ha United States naghangyo ha sanga nga opisina ha Bern, Switzerland, nga buligan an kabugtoan ha Germany. Hi Nathan H. Knorr, usa nga representante tikang ha headquarters, binisita ha Europe para organisahon ngan palaksihon an mga relief operation.

 An mga Saksi ha Switzerland naghatag hin damu gud nga pagkaon, bado, ngan kwarta. An mga donasyon iginpadara anay ha Bern, diin ginlain-lain ngan ginpamutos ito antes ipadara ha Germany. Binulig liwat an mga Saksi ha iba nga nasud sugad han Sweden, Canada, ngan United States. Tungod hito, diri la an kabugtoan ha Germany an nabuligan kondi pati an kabugtoan ha Europe ngan Asia nga naapektohan han girra.

 Ha sulod hin pipira la ka bulan, an sanga nga opisina ha Switzerland nakagpadara hin kape, gatas, asukar, cereal, ginpamara nga mga prutas, mga utanon, ngan mga de lata nga karne ngan isda. Nagdonar liwat hira hin kwarta.

 Dugang pa, an mga Saksi ha Switzerland nagpadara hin lima ka tonilada nga bado, upod na an mga coat, bado nga panbabaye, ngan amerikana. An Enero 15, 1946 nga isyu han The Watchtower nagsiring: “Diri an pinakamalain nga klase an iginhatag han kabugtoan, kondi an ira pinakamaopay. Nagsakripisyo gud hira basi buligan an kabugtoan ha Germany.”

 Nagdonar liwat an mga Saksi ha Switzerland hin haros 1,000 ka padis nga sapatos, ngan ginsiguro nga tuhay ito antes ipadara. An kabugtoan ha Wiesbaden, Germany, nga nangabri hito nga mga donasyon nahipausa ha kalidad ngan pagkaiba-iba hito. Nagsurat an usa nga Saksi: “Sigurado ako nga waray tindahan ha Germany nga may sugad kadamu nga de-kalidad nga mga bado ngan sapatos.”

 An pagpadara hin mga donasyon nagpadayon tubtob han Agosto 1948. Ha kabug-osan, an mga Saksi ha Switzerland nakagpadara ha kabugtoan ha Germany hin 444 nga dagku nga kahon hin donasyon, nga 25 ka tonilada an kabug-osan nga kabug-aton. Sugad han gin-unabi na, diri la an mga Saksi ha Switzerland an binulig hini nga relief work. Pero usa hira han pinakagutiay nga grupo nga nakigbahin hini. Hito nga panahon 1,600 la an mga Saksi ha Switzerland!

 Hi Jesu-Kristo nagsiring: “Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.” (Juan 13:34, 35) Gugma an nagpagios ha katawohan ni Jehova nga maghatag diri la han ira sobra kondi han ira pinakamaopay. (2 Corinto 8:1-4) Usa nga surat tikang ha Zurich an nag-unabi nga “damu han kabugtoan an pobre, pero karuyag nira bumulig, salit iginhatag nira an [ira] kwarta ngan kard para ha rasyon.”

 An katawohan ni Jehova ha Germany madagmit nga nakarekober tikang ha pagtimaraot ngan mga epekto han girra. An usa nga rason amo an pagin organisado ngan mahinatagon han kabugtoan nga nagpakita hin tinuod ngan nagsasakripisyo nga gugma.