Han Oktubre 21, 1940, igindeklara han New Zealand nga an mga Saksi ni Jehova usa nga organisasyon nga nag-aaghat hin pagrebelde ha gobyerno ngan peligro ha publiko. Bisan kon ini nga deklarasyon nagresulta hin damu nga kakurian para ha mga Saksi ni Jehova, waray hira mahadlok. Pananglitan, nagpadayon hira ha pagkatirok para ha pagsingba bisan kon nanelikado hira nga i-raid ngan arestuhon han mga awtoridad.

 Hi Andy Clarke, an diri Saksi nga bana han sister nga hi Mary, nakapansin han iya determinasyon nga padayon nga umatender ha mga katirok bisan pa han peligro. Nahadlok hi Andy nga aarestuhon an iya asawa samtang naatender ha mga katirok. Bisan kon waray pa ito buhata ni Andy hadto, nagtikang hiya pag-upod kan Mary ha mga katirok ngan ginsidngan hiya, “Kon aarestuhon ka nira, kinahanglan arestuhon liwat nira ako!” Tikang hito, naupod na hiya ha iya asawa ha kada katirok. Inabot an panahon nga nagin bawtismado liwat hiya nga Saksi. Bisan kon an mga Saksi ha New Zealand gintimaraot han Girra ha Kalibotan II, damu ha ira an pariho kan Mary nga determinado nga magpabilin nga maunungon ha Dios.

 Usa ka adlaw, ginpaundang han mga pulis an 78 anyos nga hi John Murray samtang nag-iistorya hiya mahitungod ha Biblia ha balay-balay. Nagdeklara an korte nga salaan hiya hin pakigbahin ha mga buruhaton han organisasyon nga nag-aaghat hin pagrebelde ha gobyerno. Damu pa nga Saksi an gindara ha korte; an iba ginpamulta, ngan an iba ginpriso hin tubtob tulo ka bulan.

 Nagdumiri an mga Saksi nga magsundalo tungod han ira konsensya nga ginbansay ha Biblia. (Isaias 2:4) Sugad nga resulta, ha panahon han girra nakaeksperyensya hira hin duro nga kakurian han damu ha ira an ginpatawag para magsundalo. Imbes nga i-train ha pagsundalo, mga 80 nga Saksi an ginpriso ha mga detention camp tubtob nga matapos an girra. Bisan didto nga ginmaltrato gud hira ngan duro an kahagkot kon winter, ini nga kabugtoan malipayon nga nagpadayon ha pagsingba kan Jehova.

 An mga Saksi ha mga detention camp nagtikang dayon mag-organisar hin espirituwal nga mga buruhaton. Nagin sugad hira hin kongregasyon, nga may regular nga mga katirok ngan kahikayan ha pagsangyaw ha iba nga priso. Ha pipira nga kampo, gintugotan pa ngani an mga Saksi nga magkaada mga asembleya, nga may nagbabantay nga gwardya. An iba nga priso nahibaro han kamatuoran ha Biblia ha mga kampo ngan nabawtismohan didto.

 Para kan Bruce, nga puto nga anak nira Mary ngan Andy nga gin-unabi na, an iya kapriso usa nga oportunidad ha pagpauswag han iya kahibaro ha Biblia. Nagsiring hiya, “Sugad hin naeskwela ako kay nagkakaada ako higlarom nga pakiistorya ha eksperyensyado nga kabugtoan ha mga kampo ngan nahibabaro tikang ha ira ngatanan.”

 Han 1944 nagplano an gobyerno nga pagawson an pipira nga napriso ha mga detention camp. Pero an mga opisyal han militar nagdumiri kay kombinsido hira nga kon pagawson an mga Saksi, magpapadayon hira ha pakiistorya ha iba mahitungod han ira pagtoo. Ini an siring han report: “Bisan kon an padayon nga pagpriso hini nga mga tawo may posibilidad nga makakontrol ha ira pagkapanatiko, diri gud ito makakagbag-o ha ira.”

 Tungod han publisidad nga resulta han pagdiri, may mga tawo nga karuyag na mahibaro parte ha mga Saksi ni Jehova. Paglabay han panahon, damu an nakahunahuna nga an mga Saksi diri man ngay-an peligro ha publiko. Nahibaroan nira nga an mga Saksi buotan ngan mamurayawon nga mga Kristiano. Sugad nga resulta, nagdamu an mga Saksi ha New Zealand, tikang ha 320 han 1939 ngadto ha 536 han 1945!

 May mga panahon nga ginkilala han patas nga mga opisyal nga an pagdiri ha mga Saksi ni Jehova pagpakita hin kawaray-hustisya. Katapos mapamatian an ebidensya kontra ha usa nga brother nga nagsasangyaw, ginbasura han usa nga huwes an kaso. Hiya nagsiring: “Base ha akon gintotoohan ngan pagsabot han balaud, diri ko makarawat nga huhunahunaon nga kriminal an usa nga tawo tungod la kay nanhatag hiya hin mga Biblia.”

 Han gintanggal na an pagdiri katapos han girra, mas determinado gud an mga Saksi nga buligan an iba nga mahibaro mahitungod ha Ginhadian han Dios. Han 1945 ini an siring han usa nga surat tikang ha sanga nga opisina para ha ngatanan nga kongregasyon ha New Zealand: “An kada tagsa angay magin mataktika, makisangkayon ngan buotan ha ngatanan. Likayi an pakigdiskusyon ngan pakig-away. Hinumdumi nga an aton mga nakakaistorya sinsero nga natoo ngan nasunod ha mga katutdoan han ira relihiyon. . . . Damu ha ira an mga karnero han Ginoo nga kinahanglan naton tugwayan ngadto kan Jehova ngan ha iya ginhadian.”

 Yana, an mga Saksi ni Jehova ha New Zealand padayon nga nagsasangyaw han mensahe han Biblia ha mga residente ngan turista. Usa ka adlaw, ha sulod la hin duha ka oras, 4 nga Saksi ha Turangi an nakiistorya ha 67 nga bisita tikang ha 17 nga nasud!

 Klaro nga ginkikilala han mga tawo ha New Zealand nga an mga Saksi ni Jehova mamurayawon ngan debotado nga mga Kristiano nga may daku nga respeto ha mga kamatuoran ha Biblia. Kada tuig ginatos an nababawtismohan sugad nga mga Saksi ni Jehova. Han 2019, sobra 14,000 nga mga Saksi an malipayon nga nag-aalagad kan Jehova dinhi hinin sur nga bahin han tuna.