Natawo ako ha syudad han Calgary ha Alberta, Canada. Han minasus-an pa ako, nagbulag an akon mga kag-anak, ngan kami ni Nanay binalhin ngadto ha balay han akon lolo ngan lola. Hinigugma kami nira Lolo ngan Lola, ngan malipayon gud ako nga bata. Nahinunumdoman ko pa nga hito nga mga panahon, malipayon ngan murayaw an akon kinabuhi.

 Han syete anyos ako, nagbag-o gud an akon kinabuhi han hi Nanay ngan hi Tatay nag-asawa utro ngan binalhin kami ngadto ha St. Louis, Missouri ha United States. Waray pag-iha, nahibaro ako nga hi Tatay bayolente ngay-an. Pananglitan, pag-uli ko tikang ha eskwelahan han siyahan pa la nga adlaw han amon klase, nahibaroan niya nga gin-bully ako ngan waray ako umato. Nasina gud hiya ngan ginsuntok niya ako hin mas makusog pa kay han mga suntok han akon mga kaeskwela! Tungod hito, nahibaro ako makig-away. Salit han syete anyos pa la ako, nagtikang na ako makig-away.

 Madagmit masina hi Tatay, salit diri malipayon hi Nanay, ngan agsob hira magrasonay ngan mag-away. Nagtikang ako magdroga ngan mag-inom hin de-alkohol nga irimnon han 11 anyos ako. Nagin mas agresibo ako ngan pirme may iginkakaaway ha kalye. Paggradwar ko ha hayskul, nagin bayolente na gud ako.

 Han 18 anyos ako, inapi ako ha U.S. Marine Corps. Tungod han akon training didto, nahibaro ako pagpatay hin tawo. Paglabay hin lima ka tuig, binaya ako ha militar basi mag-aram hin psychology kay karuyag ko makatrabaho ha Federal Bureau of Investigation. Nagtikang ako pag-eskwela ha unibersidad ha United States ngan han binalik kami ha Canada, iginpadayon ko ito didto.

 Han nakadto ako ha unibersidad, nawad-an gud ako hin paglaom nga magbabag-o pa an mga tawo ngan an kahimtang han kalibotan. Nakita ko nga an mga tawo makikalugaringon gud, an ngatanan nga butang ha kalibotan baga hin waray pulos, ngan an mga problema han mga tawo baga hin waray solusyon. Waray na gud ako maglaom nga may mahihimo pa an mga tawo basi magin maopay an kahimtang ha kalibotan.

 Tungod kay waray katuyoan an akon kinabuhi, nagpatakas ako ha de-alkohol nga irimnon, droga, sex, ngan an akon na la ginhihinunahuna amo an pagkaada damu nga kwarta. Pirme ako adto ha mga parti ngan nakikig-sex ha iba-iba nga babaye. Tungod han akon training ha militar, nagin makusog an akon kompyansa, salit pirme ako nakikiaway. Naghunahuna ako nga ako an magdidesisyon kon ano an tama ngan kon ano an sayop ngan ginkukompronta ko an bisan hin-o nga ginhuhunahuna ko nga nagraraugdaog ha iba. Pero ha pagkamatuod, kontrolado na ako han akon pagin bayolente.

 Usa ka adlaw, ako ngan an akon sangkay nakadto ha basement han akon balay ngan nag-aandam kami han amon ibaraligya nga marijuana. Pariho kami high ha droga. Ginpakianhan ako han akon sangkay kon natoo ako ha Dios. Binaton ako, “Kon an Dios an hinungdan han mga pag-antos ha kalibotan, diri ko karuyag nga makilala hiya.” Kinabuwasan, ha siyahan nga adlaw han akon bag-o nga trabaho, ginpakianhan ako han akon katrabaho nga Saksi ni Jehova, “Pagkita mo, an Dios ba an hinungdan han mga pag-antos ha kalibotan?” Nahipausa gud ako ha iya pakiana kay pariho ito han amon naistoryahan han akon sangkay, salit nainteres ako. Han sumunod nga unom ka bulan, damu an amon naistoryahan mahitungod ha Biblia, ngan iya iginpakita ha akon an baton han Biblia ha pipira han akon pinakamakuri nga mga pakiana mahitungod ha kinabuhi.

 Hito nga panahon, may ka-live-in ako, ngan nadiri hiya kon iginsusumat ko ha iya an akon mga nahibabaroan. Usa ka Domingo, ginsidngan ko hiya nga gin-imbitar ko an mga Saksi ha balay basi pag-adman namon an Biblia kaupod nira. Kinabuwasan, pag-uli ko tikang ha trabaho, waray na hiya ha balay ngan gindara niya an ngatanan namon nga gamit. Ginawas ako ngan nagtinangis. Nag-ampo liwat ako ha Dios; nakimalooy ako ha iya nga buligan ako. Ito an siyahan nga higayon nga gin-gamit ko an personal nga ngaran han Dios, nga Jehova, ha pag-ampo.—Salmo 83:18.

 Paglabay hin duha ka adlaw, nagpa-Bible study ako ha siyahan nga higayon ha mag-asawa nga Saksi. Pagbaya nira, padayon nga ginbinasa ko an amon gin-aadman nga libro nga Mahimo Ka Mabuhi ha Waray Kataposan ha Paraiso nga Tuna, ngan natapos ko ito hito nga gab-i. a Nabantad gud an akon kasingkasing ha akon mga nahibaroan mahitungod kan Jehova nga Dios ngan ha iya Anak nga hi Jesu-Kristo. Nakita ko nga mapinairon hi Jehova ngan nasasakit hiya kon nag-aantos kita. (Isaias 63:9) Labi nga nabantad ako han gugma han Dios para ha akon ngan han halad nga ginhatag han iya Anak para ha akon. (1 Juan 4:10) Nakasiring ako nga nagpailob gud ha akon hi Jehova “kay diri niya karuyag nga mabungkag an bisan hin-o, lugod karuyag niya nga magbasol an ngatanan.” (2 Pedro 3:9) Inabat ko nga karuyag ni Jehova nga magin sangkay niya ako.—Juan 6:44.

 Hito mismo nga semana, nagtikang ako pag-atender ha mga katirok ha kongregasyon. Hilaba an akon buhok, nakaariyos ako, ngan makaharadlok an akon hitsura. Pero gintratar ako han mga Saksi nga sugad hin ira ako kapamilya nga maiha na nira nga waray makita. Tinuod gud hira nga mga Kristiano. Inabat ko nga baga hin nakauli ako kanda Lolo ngan Lola, pero hito nga takna, mas malipayon pa gud ako.

 Waray pag-iha, hinay-hinay nga ginbag-o han Biblia an akon kinabuhi. Nagpaarot ako, gin-undang ko an ngatanan nga imoral nga buhat, ngan waray na ako magdroga ngan maghinubog. (1 Corinto 6:9, 10; 11:14) Karuyag ko mapalipay hi Jehova. Salit kon nahibabaroan ko nga diri niya naruruyagan an usa nga butang nga akon ginbubuhat, diri ko ito ginpapakamatadong. Lugod, kaurogan na nga nakukonsensya ako. ‘Diri ko na ini puydi himoon,’ nasiring ako ha akon kalugaringon. Ngan naniningkamot ako nga bag-uhon dayon an akon panhunahuna ngan mga ginbubuhat. Sugad nga resulta, nagin mas maopay an akon kinabuhi kay ginbuhat ko an karuyag ni Jehova nga buhaton ko. Han Hulyo 29, 1989—unom ka bulan tikang han nagpa-Bible study ako—nabawtismohan ako sugad nga Saksi ni Jehova.

 Ginbag-o han Biblia an akon personalidad. Hadto, kaurogan na nga nagigin bayolente ako kon may nagtatratar ha akon hin diri maopay. Pero yana, naniningkamot gud ako nga ‘makigmurayaw ha ngatanan nga tawo.’ (Roma 12:18) Nahimo ko ini diri tungod han akon la pangalimbasog, kondi tungod han bulig han Pulong ngan baraan nga espiritu ni Jehova.—Galacia 5:22, 23; Hebreo 4:12.

 Imbes nga magin uripon han droga, kamadarahog, ngan imoral nga mga hingyap, nangangalimbasog na ako yana nga mapalipay hi Jehova nga Dios ngan ihatag ha iya an akon pinakamaopay. Kaapi na hito an pagbulig ha iba nga makilala hiya. Paglabay hin pipira ka tuig tikang han nabawtismohan ako, binalhin ako ha iba nga nasud basi bumulig ha pagsangyaw ha mga lugar nga nanginginahanglan gud hin mga magwarali. Ha naglabay nga mga tuig, nalipay gud ako nga matutdoan an damu nga tawo ngan makita kon paonan-o nagin maopay liwat an ira kinabuhi tungod han Biblia. Nalilipay liwat ako nga nagin Saksi ni Jehova hi Nanay. An usa nga nakabulig ha iya amo an iya nakita nga mga pagbag-o ha akon batasan ngan panggawi.

 Han 1999, ha El Salvador, naggradwar ako ha gintatawag yana nga School for Kingdom Evangelizers. Ginbansay ngan gintutdoan ako hito nga eskwelahan basi mahibaro ako ha pagpanguna ha pagsangyaw nga buruhaton ngan ha pagtutdo ngan pag-ataman han kongregasyon. Hito liwat nga tuig, nagpakasal kami han akon mahusay nga asawa nga hi Eugenia. Magkaupod nga nag-aalagad kami sugad nga bug-os-panahon nga mga parasangyaw ha Guatemala.

 Yana, diri na ako nawawad-an hin paglaom ha kinabuhi, lugod malipayon gud ako. Tungod han akon pag-aplikar han mga katutdoan han Biblia, diri na ako uripon han seksuwal nga imoralidad ngan kamadarahog ngan an akon kinabuhi napuno hin tinuod nga gugma ngan kamurayawan.