Natawo ako ha Uganda ha distrito han Gomba. Pobre gud an kadam-an nga tawo didto. Waray koryente ha amon bungto, salit nagamit kami hin lampara kon gab-i.

 An akon mga kag-anak, nga mga parauma, binalhin tikang ha Rwanda ngadto ha Uganda. Nagtatanom hira hin kape ngan saging, ngan tikang ha saging naghihimo hira hin kilala nga irimnon nga gintatawag nga waragi. Nag-aataman liwat an akon mga kag-anak hin mga manok, kanding, baboy, ngan baka. Tungod han amon kultura ngan gindak-an, tinoo ako nga an asawa kinahanglan sumugot ha iya bana ha ngatanan nga panahon ngan diri gud puydi magpahayag han iya opinyon.

 Han 23 anyos ako, kumadto ako ha Rwanda, diin napakadto ako ha mga disko kaupod han akon mga kaedad. Pirme ako napakadto salit gintagan ako han management hin card basi makasulod ako nga waray bayad. Nag-i-enjoy liwat ako pagkita hin mga salida nga may mga araway ngan duro nga kamadarahog. An akon palibot ngan an ginpipili nga kaliawan nakaimpluwensya ha akon nga magin bayolente, imoral, ngan parahubog.

 Han 2000, nag-live-in kami han batan-on nga babaye nga hi Skolastique Kabagwira, ngan nagkaada kami tulo nga anak. Sugad han akon hinbaroan han bata pa ako, ginlalaoman ko nga maluhod hiya ha akon atubangan kon nahatag hiya hin katalahoran o kon may ginhahangyo. Nagsiring liwat ako nga an tanan nga gamit han amon pamilya kalugaringon ko nga panag-iya, ngan puydi ko buhaton hito an anoman nga karuyag ko. Agsob nga nagawas ako ha gab-i ngan nabalik mga alas-3 han kaagahon, kaurogan na nga hubog. Natuktok ako ha purtahan, ngan kon diri dayon ako maabrihan ni Skolastique, ginkakastigo ko hiya.

 Hito nga panahon, nagtatrabaho ako sugad nga supervisor ha usa nga private security company, ngan maopay an akon sweldo. Ha balay, ginkukombinse ako ni Skolastique nga umapi ha iya relihiyon nga Pentecostal, kay natoo hiya nga makakagbag-o ito ha akon. Pero diri ako interesado. Lugod, nakigrelasyon ako ha iba nga babaye. Tungod han akon pagin bayolente ngan imoral, gindara ni Skolastique an tulo namon nga anak ngan binalhin ha iya mga kag-anak.

 Usa nga edaran namon nga sangkay an nakiistorya ha akon parte ha akon pagkinabuhi. Gin-aghat niya ako nga makigbalik kan Skolastique. Siring niya nga diri dapat mahibulag an amon buotan nga mga anak ha ira tatay. Salit han 2005, inundang ako ha pag-inom, ginbayaan ko an akon karelasyon, ngan nakigbalik kan Skolastique. Han 2006 nagpakasal kami. Pero, bayolente la gihapon ako ngan ginkakastigo ko an akon asawa.

 Han 2008, usa han mga Saksi ni Jehova nga hi Joël an binisita ha amon balay, ngan namati ako ha iya mensahe. Ha sulod hin pipira ka bulan hiya ngan an usa pa nga Saksi, hi Bonaventure, regular nga nabisita ha amon, ngan seryoso gud an amon paghisgot parte ha Biblia. Damu an akon mga pakiana, labi ha libro nga Pahayag. Pero ha tinuod karuyag ko la pamatud-an nga sayop an mga Saksi. Pananglitan, ginpakianhan ko hira kon kay ano nga nasiring hira nga an “daku nga grupo” nga gin-unabi ha Pahayag 7:9 maukoy ha tuna, samtang an bersikulo nasiring nga “natindog hira ha atubangan han trono [han Dios] ngan ha atubangan han Kordero,” hi Jesu-Kristo. Pasensyoso nga ginbaton ni Joël an akon mga pakiana. Pananglitan, iginpakita niya ha akon an Isaias 66:1, diin gintawag han Dios an tuna nga ‘tungtongan han iya mga tiil.’ Salit an daku nga grupo natindog ha tuna ha atubangan han trono han Dios. Ngan ginbasa ko an Salmo 37:29, diin nasiring nga an magtadong maukoy ha tuna hin waray kataposan.

 Ha urhi, inuyon ako nga magpa-Bible study. Salit hi Bonaventure an nag-Bible study ha amon ni Skolastique. Samtang nag-aaram kami han Biblia, nagkaada ako hingyap nga bag-uhon an akon kinabuhi. Nahibaro ako nga trataron hin may respeto an akon asawa. Nadiri na ako nga lumuhod hiya ha akon atubangan kon nahatag hin katalahoran o kon may ginhahangyo, ngan diri na ako nasiring nga an tanan nga gamit han amon pamilya kalugaringon ko nga panag-iya. Inundang na gihap ako pagkita hin bayolente nga mga salida. Diri masayon an paghimo hini nga mga pagbag-o ngan nagkikinahanglan ini hin daku nga pagpugong ha kalugaringon ngan pagpaubos.

 Pipira ka tuig na an naglabay, gindara ko an akon suhag nga anak nga hi Christian, basi umukoy kaupod han amon mga paryente ha Uganda. Pero katapos ko mabasa an Deuteronomio 6:4-7, nasantop ko nga kami han akon asawa an may responsabilidad ha atubangan han Dios ha pag-ataman han amon mga anak, nga nag-uupod han pagtutdo ha ira han mga prinsipyo ha Biblia. Nalipay gud kami ngan an amon anak han iginbalik namon hiya ha balay.

 Nahibaroan ko nga hi Jehova usa nga maloloy-on nga Dios, ngan natoo ako nga napasaylo na niya an akon batasan ngan panggawi hadto. Nalipay ako nga nagpa-Bible study liwat hi Skolastique kaupod ko. Igindedikar namon an amon kinabuhi kan Jehova ngan dungan nga nagpabawtismo han Disyembre 4, 2010. Yana may pagtapod na kami ha usa kag usa, ngan nalilipay kami nga iaplikar an mga prinsipyo han Biblia ha amon pamilya. Nalilipay gud an akon asawa nga nauli dayon ako ha balay katapos han trabaho. Nalilipay liwat hiya nga gintatratar ko hiya nga may dignidad ngan respeto, nga naghimo ako hin personal nga desisyon nga diri na uminom hin de-alkohol nga irimnon, ngan diri na ako bayolente nga tawo. Han 2015, ginpili ako sugad nga tigurang basi makabulig ha pag-ataman han amon kongregasyon. Ha lima namon nga anak, tulo na an bawtismado.

 Han nagtikang ako pag-aram han Biblia kaupod han mga Saksi ni Jehova, waray ko la basta karawata an ira igintutdo ha akon. Pero naimpres ako kay gin-gamit nira an Biblia ha pagbaton han akon mga pakiana. Nasabtan namon ni Skolastique nga adton nasiring nga nag-aalagad ha tinuod nga Dios kinahanglan sumugot ha tanan nga iya ginsisiring, ngan diri la ha mga butang nga ira karuyag. Mapasalamaton gud ako kan Jehova nga iya ako iginpahirani ngan bahin na ako yana han iya espirituwal nga pamilya. Kon gindudumdom ko an akon naglabay, kombinsido ako nga ha bulig han Dios, an bisan hin-o nga sinsero nga tawo, makakahimo hin mga pagbag-o basi mapalipay hiya.