May mga tawo nga maiha mahibaro tikang ha ira masakit nga mga eksperyensya. Usa na ako hito. Natawo ako ngan nagdaku ha Barcelona, an ikaduha han pinakadaku nga syudad ha Spain. An akon pamilya nag-ukoy ha lugar nga gintatawag nga Somorrostro, ngan sakop hini an daku nga bahin han baybayon han syudad. An Somorrostro kilala ha krimen ngan pagbaligya hin droga.

 Siyam kami nga magburugto, ngan ako an suhag. Tungod kay pobre gud kami, ginpatrabaho ako ni Tatay ha usa nga tennis club sugad nga parapurot hin bola. Dyes anyos ako hadto ngan napulo ka oras ako nga nagtatrabaho kada adlaw. Tungod hito, waray ako makaeskwela diri pariho han mga bata nga kaedad ko. Han 14 anyos ako, nagtrabaho ako sugad nga makinista ha usa nga metal shop.

 Han 1975, gintawag ako basi magsundalo, kay igin-oobligar ito hadto ha Spain. Karuyag ko magbuhat hin kakaiba ha akon kinabuhi, salit nagboluntaryo ako nga umapi ha Spanish Foreign Legion ha Melilla, usa nga teritoryo han Spain ha North Africa. Hito nga panahon, naadik ako ha droga ngan nagin parahubog.

 Pagbaya ko ha Legion, binalik ako ha Barcelona ngan nagporma hin gang. Bisan ano na la an amon ginkakawat. Katapos, ginbabaligya namon an amon mga kinawat para ipalit hin droga. Natikang ako pag-inom hin LSD ngan amphetamine, ngan naadik ako ha sex, makahurubog nga irimnon, ngan paghuygo. Tungod hinin maraot gud nga pagkinabuhi, nagin mas madarahog pa ako. Pirme ako may dara nga kutsilyo, parakol, o sundang, ngan diri ako nag-aalang paggamit hito kon ginkikinahanglan.

 Usa ka beses, kami han akon gang nangawat hin awto ngan ginlanat kami han mga pulis. Sugad-sugad ito hin eksena ha usa nga salida. Han nakahirayo na kami hin mga 30 ka kilometro, ginratratan kami han mga pulis. Ha urhi, iginbunggo han amon drayber an awto, ngan nandadlagan kami pahirayo. Han nahibaroan ito ni Tatay, ginpalayas niya ako.

 Ha sumunod nga lima ka tuig, bisan diin na la ako nakaturog—ha mga purtahan, ha mga trak, ha mga lingkoran ha parke, ngan ha mga sementeryo. Inukoy pa ngani ako ha lungib. Waray direksyon an akon kinabuhi, ngan waray na ako labot mabuhi man ako o mamatay. Nahinumdoman ko nga ginlaslas ko an akon mga pulso han nakadroga ako. Ngan tubtob yana aadi pa ito nga mga ulat.

 Han 28 anyos ako, ginbiling ako ni Nanay kay ginpapauli na niya ako. Namati ako ha iya ngan nagsaad nga magbabag-o na ako, pero nag-iha anay antes ko ito matuman.

 Usa ka kulop, duha nga Saksi ni Jehova an nagtuktok ha amon purtahan. Samtang namamati ako ha ira, sininggit hi Tatay nga sadhan ko kuno an purtahan. Tungod kay nadiri gud ako nga ginmamandaran, waray ko hiya pansina. Gintanyagan nira ako hin tulo nga gutiay nga libro, ngan nalipay ako ha pagkarawat hito. Ginpakianhan ko hira kon diin hira nagkakatirok, ngan paglabay hin pipira ka adlaw, kinadto ako ha Kingdom Hall pero ha gawas la.

 An siyahan ko nga naobserbaran amo an ira malimpyo nga pamado. Pero ako naman, hilaba an buhok, bunguton, ngan diri pormal an pamado. Klaro nga diri ako nabagay didto, salit waray ako sumulod. Pero nasurprisa ako kay nakita ko didto an kaupod-upod ko hadto ha gang nga hi Juan, nga naka-amerikana. Ha urhi, nahibaroan ko nga nagin Saksi ni Jehova na ngay-an hiya usa ka tuig na an naglabay. An iya presensya nakabulig ha akon nga diri maawod pagsulod ha Kingdom Hall ngan umatender ha katirok. Ito an tinikangan han akon pagbag-o.

 Ginkarawat ko an pag-aram ha Biblia ngan nasantop ko dayon nga kon karuyag ko makarawat an pag-uyon han Dios, kinahanglan ko bag-uhon an akon pagin masisinahon ngan imoral nga pagkinabuhi. An pagbuhat hito nga mga pagbag-o diri masayon. Nahibaroan ko nga basi mapalipay hi Jehova nga Dios, kinahanglan ko ‘bag-uhon an akon panhunahuna.’ (Roma 12:2) Nabantad gud ako han kalooy han Dios. Bisan pa han akon mga sayop, nasantop ko nga gintatagan niya ako hin higayon nga bug-os nga magbag-o. Dinulot gud ha akon kasingkasing an akon nahibaroan mahitungod kan Jehova nga Dios. Nagin klaro ha akon nga may-ada Maglalarang nga nahigugma ha akon.—1 Pedro 5:6, 7.

 Nagpagios ini ha akon nga maghimo hin mga pagbag-o. Pananglitan, han nahisgotan namon ha amon pag-Bible study an mahitungod ha tabako, nagsiring ako ha akon kalugaringon, ‘Kon karuyag ni Jehova nga Dios nga magin malimpyo ako ha ngatanan nga aspekto, karuyag sidngon, kinahanglan ko na ig-undang an pagsigarilyo!’ (2 Corinto 7:1) Salit iginlabog ko ito ha basurahan!

 Kinahanglan ko liwat ig-undang an paggamit ngan pagbaligya hin droga. Nagkinahanglan ito hin daku nga panahon ngan pangalimbasog. Basi mahimo ito, kinahanglan diri na ako makig-upod ha akon mga barkada hadto. An ira impluwensya diri nakakabulig ha akon nga mag-uswag ha espirituwal. Pero paglabay han panahon, mas sinarig ako ha Dios ngan ha bulig han akon bag-o nga kasangkayan ha kongregasyon. Waray ko pa gud maabat hadto an sugad nga gugma ngan personal nga interes nga iginpakita nira ha akon. Paglabay hin mga bulan, bug-os nga naiundang ko na an pagdroga ngan ‘naisul-ot an bag-o nga personalidad,’ nga nakabulig ha akon nga makarawat an pag-uyon han Dios. (Efeso 4:24) Han Agosto 1985, nabawtismohan ako sugad nga usa han mga Saksi ni Jehova.

 Ginbag-o han Biblia an akon kinabuhi. Nakagawas ako ha maraot nga pagkinabuhi nga nagdadaot ha akon lawas ngan dignidad. Ngani, sobra 30 han akon mga barkada hadto an namatay hin bata pa tungod han AIDS o han iba pa nga sakit nga nakukuha ha pagdroga. Mapasalamaton gud ako nga pinaagi ha pag-aplikar ha mga prinsipyo ha Biblia, nalikyan ko an sugad nga magraot nga resulta.

 An kutsilyo ngan parakol nga akon dara-dara hadto sugad nga bayolente nga tawo parte na la han akon naglabay. Waray ko gud maimadyin nga usa ka adlaw Biblia na an akon dara-dara ngan gin-gagamit ito ha pagbulig ha mga tawo. Yana, kami han akon asawa nag-aalagad sugad nga bug-os-panahon nga mga ministro han mga Saksi ni Jehova.

 An akon mga kag-anak waray magin Saksi ni Jehova, pero gin-aapresyar nira an mag-opay nga epekto han akon pag-aram ha Biblia. Gindepensahan pa ngani ni Tatay an mga Saksi ha atubangan han iya mga katrabaho. Nakita niya nga an akon bag-o nga gintotoohan nakabulig ha akon nga magin mas maopay nga tawo. Hi Nanay agsob magsiring nga dapat hadto pa ako nag-aram han Biblia. Tama gud hiya!

 An akon mga eksperyensya nagtutdo ha akon nga an pagdroga ngan an iba pa nga mga bisyo diri naghahatag hin tinuod nga kalipay. Yana, nabilngan ko na an tinuod nga kalipay pinaagi ha pagsumat ha iba han mga katutdoan nga akon nahibaroan tikang ha Pulong han Dios—katutdoan nga nakatalwas han akon kinabuhi.