Waray ko laumi nga grabe ngay-an an nagin injury ha akon sparring partner. Aksidente nga nabanyakan ko hiya ha irong. Nakonsensya ako ngan naghunahuna kon angay pa ba ako magpadayon ha martial arts. Kay ano nga nakahunahuna ako pag-undang nga damu ka tuig ko na man ito nga ginpupokusan? Antes ko ito batunon, isaysay ko anay kon kay ano nga naruyag ako ha martial arts.

 Nagdaku ako hirani ha Buffalo, New York, U.S.A., ha usa nga pamilya nga murayaw ngan debotado nga Katoliko. Nag-eskwela ako ha Katoliko nga mga eskwelahan ngan nagin sakristan. Karuyag han akon mga kag-anak nga kami han akon bugto nga babaye magin malampuson ha kinabuhi. Salit gintugotan nira ako nga umapi ha mga isport katapos han klase o magtrabaho hin part-time, basta hitaas an akon mga grado. Tungod hini napiritan ako nga magkaada disiplina ha kalugaringon samtang bata pa.

 Han 17 anyos ako, nagtikang ako pag-aram hin martial arts. Damu ka tuig nga nagpraktis ako hin tulo ka oras ha usa ka adlaw, unom ka adlaw ha usa ka semana. Kada semana, damu ka oras nga ginpapraktis ko ha akon hunahuna an mga teknik ngan paggios ngan nagkikita ako hin mga video kon paonan-o mag-uuswag. Nag-ienjoy ako pagpraktis samtang may tabon an mata, bisan kon nagti-training nga may mga armas. Kaya ko dugmukon an mga board o mga briks ha usa la ka pagbunal han akon kamot. Nagtikahitaas an akon ranggo ngan nakadaog ako hin mga trophy ha kompetisyon. An martial arts nagin pinakaimportante ha akon kinabuhi.

 Naghunahuna ako nga malampuson an akon kinabuhi. Naggradwar ako ha unibersidad nga may higtaas nga honor. Nagtrabaho ako ha usa nga daku nga kompanya sugad nga computer systems engineer. Nakakarawat ako hin mga benepisyo ha kompanya, ngan nagkaada balay ngan uyab. Baga maopay gud pagkit-on an akon kinabuhi, pero may-ada ako nakakagupong nga mga pakiana mahitungod ha kinabuhi.

 Basi makabiling hin mga baton ha akon mga pakiana, nagtikang ako pagsingba hin duha ka beses kada semana ngan pag-ampo ha Dios para hin bulig. Katapos, usa ka adlaw nabag-o an akon kinabuhi tungod ha pakiistorya ha usa nga sangkay. Nagpakiana ako: “Nahunahuna mo na ba kon ano an katuyoan han kinabuhi?” ngan nagsiring pa: “Damu gud an mga problema ngan duro an kawaray-hustisya!” Nagsiring hiya ha akon nga pariho ito han iya mga pakiana hadto ngan nakabiling hiya hin makakombinse nga mga baton ha Biblia. Gintagan niya ako han libro nga Mahimo Ka Mabuhi ha Waray Kataposan ha Paraiso ha Tuna. a Nagsiring hiya nga nag-aaram hiya han Biblia upod ha mga Saksi ni Jehova. Ha siyahan, nag-alang ako kay naghunahuna ako nga diri ako angay magbasa hin literatura tikang ha iba nga relihiyon. Pero tungod han akon hingyap nga mahibaroan an mga baton ha akon mga pakiana, naaghat ako nga usisahon kon lohikal ba an igintututdo han mga Saksi.

 Naimpres ako nga mahibaroan kon ano gud an igintututdo han Biblia. Nahibaroan ko nga an orihinal nga katuyoan han Dios para ha mga tawo amo an mag-ukoy ha kadayonan ha paraiso nga tuna ngan ito nga katuyoan han Dios waray magbag-o. (Genesis 1:28) Nahipausa ako nga makita an ngaran han Dios nga Jehova ha akon mismo kopya han King James nga bersyon han Biblia ngan mahibaroan nga ito ngay-an an ngaran han akon gin-iinampo kon nangangadi ako han Pag-ampo han Ginoo. (Salmo 83:18; Mateo 6:9) Nasabtan ko liwat kon kay ano nga temporaryo nga gintutugotan han Dios an pag-antos han tawo. Makakombinse gud an akon mga nahibaroan! Nalipay gud ako.

 Diri ko gud mangangalimtan an akon inabat han siyahan nga nag-atender ako ha mga katirok han mga Saksi ni Jehova. An ngatanan makisangkayon ngan karuyag ako makilala. Ha akon siyahan nga pag-atender, usa nga espesyal nga pahayag publiko an iginpresenta mahitungod ha mga pag-ampo nga ginpapamatian han Dios. Nakapainteres ha akon ito nga tema, kay maiha na ako nga nag-iinampo ha Dios para hin bulig. Sunod, inatender ako ha Memoryal han kamatayon ni Jesus. Hini nga mga katirok naimpres ako nga makita nga ginsusundan bisan han kabataan an mga teksto nga ginbabasa ha Biblia. Ha siyahan, diri ako maaram magbiling han mga teksto, pero mabinuligon gud an mga Saksi ngan gintutdoan nira ako ha paggamit han Biblia.

 Han padayon ako nga nag-inatender ha mga katirok, nagkaada ako hilarom nga apresasyon ha maopay gud nga kalidad han pagtutdo han mga Saksi. Damu an akon nahibaroan ha tagsa nga katirok, ngan nauli ako pirme nga naparig-on ngan narepreskohan. Katapos, gin-aghat ako nga magpa-Bible study.

 An akon nakita ha mga Saksi Jehova iba gud ha akon nakita ha akon relihiyon. An mga Saksi nagkakaurosa ngan sinsero nga grupo han mga tawo nga nangangalimbasog gud nga lipayon an Dios. Nakombinse ako nga iginpapakita nira an pangirilal-an han tinuod nga mga Kristiano, nga amo an gugma ha usa kag usa.—Juan 13:35.

 Samtang mas gin-aadman ko an Biblia mas damu nga pagbag-o an akon ginhimo basi magkinabuhi uyon ha mga suruklan han Biblia. Pero inabat ko nga diri ko gud mababayaan an martial arts. Nag-ienjoy ako ha pagpraktis ngan pag-api ha mga kompetisyon. Han ginsumat ko ini ha Saksi nga nagba-Bible study ha akon, mahigugmaon nga ginpasarig niya ako, “Padayon la ha pag-aram, ngan maaram ako nga mahihimo mo an tama nga desisyon.” Ito gud an akon kinahanglan mabatian. Samtang padayon ako nga nag-aaram, mas karuyag ko nga lipayon hi Jehova nga Dios.

 Nagbag-o an akon kinabuhi tungod han panhitabo nga akon gin-unabi ha tinikangan, han aksidente nga nabanyakan ko ha irong an akon sparring partner. Tungod hito nga aksidente nakahunahuna ako kon puydi ba ako magin mamurayawon nga sumurunod han Kristo kon ipapadayon ko an pag-martial arts. Nahibaroan ko ha tagna ha Isaias 2:3, 4 nga adton nasunod ha mga instruksyon ni Jehova diri na “mag-aaram hin pakiggirra.” Ngan hi Jesus nagtutdo ha iba nga diri magin bayolente, bisan kon diri patas an pagtratar ha ira han iba. (Mateo 26:52) Salit ginbayaan ko an isport nga akon gud naruruyagan.

 Katapos hito, ginsunod ko an sagdon han Biblia nga ‘bansayon an imo kalugaringon nga an imo tumong amo an pagpakita hin debosyon ha Dios.’ (1 Timoteo 4:7) An tanan nga panahon ngan pangalimbasog nga akon gin-gahin hadto ha martial arts, gin-gamit ko na yana para ha espirituwal nga rutina. An akon uyab waray umuyon ha akon nahibabaroan tikang ha Biblia, salit nagbulag kami. Nabawtismohan ako sugad nga usa han mga Saksi ni Jehova han Enero 24, 1987. Waray la pag-iha, nagtikang ako pag-alagad sugad nga bug-os-panahon nga ministro, nga kinaburut-on nga ginagamit an akon panahon ha pagtutdo ha iba mahitungod ha Biblia. Tikang hadto nagpadayon ako ha bug-os-panahon nga ministeryo, ngan may panahon nga nag-alagad ako ha world headquarters han mga Saksi ni Jehova ha New York, U.S.A.

 Yana nga maaram na ako han kamatuoran mahitungod ha Dios, nabilngan ko na kon ano an kulang ha akon kinabuhi. May katuyoan an akon kinabuhi, may tinuod ako nga paglaom para ha tiarabot, ngan malipayon na gud ako. Nag-ienjoy la gihapon ako ha regular nga pag-ehersisyo, pero diri na ito an pinakaimportante ha akon. An akon prayoridad ha kinabuhi amo an pag-alagad kan Jehova nga Dios.

 Han nagpupokus pa ako ha martial arts, pirme ako alerto ha mga tawo ha akon palibot ngan pirme naghuhunahuna kon paonan-o didepensahan an akon kalugaringon kon may umatake ha akon. Yana alerto la gihapon ako ha mga tawo ha akon palibot, pero ha iba na nga katuyoan—basi buligan hira. An Biblia nakabulig ha akon nga magin mahinatagon ngan mas maopay nga bana ha akon mahusay nga asawa nga hi Brenda.

 Hilig ko gud hadto an martial arts. Pero ginsaliwnan ko ito hin mas maopay nga butang. Maopay gud an pagkasiring han Biblia mahitungod hito: “An pagbansay ha lawas may gutiay nga kapulsanan, pero an debosyon ha Dios mapulsanon ha ngatanan nga butang, kay nag-uupod ito han saad nga kinabuhi yana ngan kinabuhi ha tiarabot.”—1 Timoteo 4:8.