Natawo ako ha Montreal, an pinakadaku nga syudad ha probinsya han Quebec, Canada. Ako ngan an akon tulo nga bugto ginpadaku hin mahigugmaon nga mga kag-anak ha maopay nga lugar han Rosemont. Murayaw an amon kinabuhi.

 Bata pa ako, interesado na ako ha Biblia. Nahinunumdoman ko pa han 12 anyos ako, ginbinasa ko ha Bag-o nga Tugon an mahitungod han kinabuhi ni Jesus, ngan nag-enjoy gud ako hito. Nabantad gud ako han iya gugma ngan pagpaid ha mga tawo, salit karuyag ko hiya subaron. Makasurubo, nagluya ini nga akon hingyap samtang nagtitikadaku ako ngan han nagkaada ako mga barkada nga maraot an impluwensya ha akon.

 Hi Tatay paratokar hin saxophone. Iginhatag niya ha akon diri la an iya saxophone kondi pati an gugma ha musika nga amo an nagin pokus han akon kinabuhi. Nag-i-enjoy gud ako ha musika salit waray pag-iha nahibaro ako paggitara. Ha urhi, nagporma ako hin rock band upod han pipira ko nga kasangkayan, ngan nag-perform kami ha iba-iba nga show. Naruyagan kami han pipira nga sikat nga prodyuser ha musika ngan gintanyagan ako nga pasisikaton an akon musika. Nagpirma ako hin kontrata ha usa nga daku nga recording company. An akon musika nagin sikat ngan regular nga ginpapatokar ha mga radyo ha Quebec.

 Baga hin aadi na ha akon an ngatanan. Batan-on ako ngan sikat, ngan may daku nga kità tungod ha pagbuhat han trabaho nga akon naruruyagan. Ha adlaw, napakadto ako ha gym, nagpapainterbyu, napirma hin autograph, ngan naggi-guest ha TV. Ha gab-i, nagpi-perform ako ha mga show ngan napakadto ha mga parti. Basi mawara an akon istres tungod ha mga fans, nagtikang ako pag-inom hin de-alkohol nga irimnon ngan ha urhi nagdroga. Imoral liwat ako ngan waray labot ha iba.

 May pipira nga naaawa ha akon pagkinabuhi kay baga hin malipayon ako. Pero ha tinuod la, naabat ako hin kawaray-pulos, labi na kon nag-uusahan ako. Nadepres ako ngan nagin mabarak-anon. Makasurubo, han sikat na ako hinduro, duha han akon mga prodyuser an namatay ha AIDS. Diri gud ako makatoo! Bisan kon hinigugma ko an musika, nangalas ako ha pagkinabuhi nga iginhahatag hito.

 Bisan pa kon malampuson ako, maaram ako nga may sayop gud ha kalibotan. Kay ano nga kalyap hinduro an kawaray-hustisya? Nahipapausa ako kon kay ano nga diri nagios an Dios. Ngani, agsob ako mag-ampo ha Dios para han baton. Samtang napahuway kami tikang ha amon mga tour, nagtikang ako pagbasa utro han Biblia. Bisan kon diri ko nasasabtan an kadam-an han akon ginbabasa, nakasiring ako nga hirani na gud an kataposan han kalibotan.

 Nabasa ko ha Biblia nga ha usa ka higayon, nagpuasa hi Jesus ha disyerto ha sulod hin 40 ka adlaw. (Mateo 4:1, 2) Nahunahuna ko nga kon buhaton ko liwat ito, bangin magpakilala ha akon an Dios, salit nagpili ako hin petsa. Duha ka semana antes ako magpuasa, may duha nga Saksi ni Jehova nga nagtuktok ha amon purtahan, ngan ginpasulod ko hira nga baga hin naglalaom ako nga maabot hira. Ginkinita ko an mata han usa ha ira, hi Jacques, ngan ginpakianhan, “Paonan-o naton mahibabaroan nga nagkikinabuhi na kita ha kataposan nga mga adlaw hini nga kalibotan?” Ginbaton niya ako gamit an Biblia ngan ginbasa an 2 Timoteo 3:1-5. Ginpauranan ko hira hin pakiana ngan bumilib gud ako han ira lohikal ngan makapatagbaw nga mga baton, nga pirme basado ha Kasuratan. Katapos han ira pipira nga pagbisita, nasantop ko nga diri ko na kinahanglan magpuasa.

 Nagtikang ako pag-aram ha Biblia hin regular upod han mga Saksi. Ha urhi, ginpaarotan ko an akon hilaba nga buhok ngan nagtikang pagtambong ha ngatanan nga katirok ha Kingdom Hall. Tungod han mahigugmaon nga pag-abiabi ha mga katirok, nakombinse ako nga nabilngan ko na an kamatuoran.

 Syempre, basi maiaplikar ko an akon nahibabaroan ha pag-aram ha Biblia, kinahanglan ko maghimo hin dagku nga pagbag-o. Pananglitan, kinahanglan ko umundang pagdroga ngan bumaya ha imoral nga pagkinabuhi. Kinahanglan ko liwat bayaan an akon pagin makikalugaringon ngan magpakita hin mas daku nga pagtagad ha iba. Sugad nga solo nga kag-anak, kinahanglan ako mahibaro ha pag-ataman han emosyonal ngan espirituwal nga panginahanglan han akon duha nga anak. Salit ginbayaan ko an akon pagin musikero ngan nagtrabaho ha usa nga pabrika nga gutiay la an sweldo.

 Diri masayon an paghimo hini nga mga pagbag-o. Samtang nangangalimbasog ako pag-undang ha pagdroga, nakaeksperyensya ako hin mga withdrawal symptom salit may mga panahon nga nabalik ako pagdroga. (Roma 7:19, 21-24) Nakurian gud ako pagbaya labi na ha imoral nga pagkinabuhi. Labot pa, makapoy hinduro an akon bag-o nga trabaho, ngan nakakapanluya an akon gutiay nga sweldo. An akon tulo ka bulan nga sweldo katugbang han akon duha la ka oras nga kità ha pagin musikero.

 An pag-ampo nakabulig ha akon nga makapadayon ha paghimo hinin magkuri nga pagbag-o. Nakita ko nga importante liwat an regular nga pagbasa han Biblia. May mga teksto nga nakadasig gud ha akon. Usa hito an 2 Corinto 7:1, nga nag-aaghat ha mga Kristiano nga “limpyohan [an ira] kalugaringon ha ngatanan nga kahugaw han lawas ngan kasingkasing.” An usa pa nga teksto nga nagpasarig ha akon nga posible an pagbaya ha bisyo amo an Filipos 4:13, nga nasiring: “Kay ha ngatanan nga butang may kusog ako pinaagi ha iya nga naghahatag ha akon hin gahum.” Ginbaton ni Jehova an akon mga pag-ampo ngan ginbuligan niya ako nga masabtan ngan maiaplikar an kamatuoran ha Biblia. Nagpagios ini ha akon nga idedikar an akon kinabuhi ha iya. (1 Pedro 4:1, 2) Han 1997, nabawtismohan ako sugad nga Saksi ni Jehova.

 Sigurado ako nga kon waray ko bag-oha an akon pagkinabuhi, patay na ako. Pero yana, tinuod nga malipayon an akon kinabuhi! An akon hinigugma nga asawa nga hi Elvie bendisyon gud ha akon. Malipayon kami nga magkaupod nga nagtututdo ha iba mahitungod ha Biblia sugad nga bug-os-panahon nga mga ministro. Tungod hini, malipayon ako ngan kontento. Mapasalamaton gud ako kan Jehova nga iginpahirani niya ako ha iya.​—Juan 6:44.