Ginpadaku ako sugad nga Katoliko ha Rochester, New York. An akon mga kag-anak nagbulag han otso anyos ako. Salit kon Lunes tubtob Biernes, naukoy ako kan Nanay ha usa nga pabahay nga para ha mga pobre, ngan kon Sabado ngan Domingo, naukoy naman ako kan Tatay ha mas riko nga komunidad. Han nakita ko nga nakukurian gud hi Nanay ha pagpadaku hin unom nga anak, nag-ambisyon ako nga magin riko basi makabulig ha amon pamilya.

 Karuyag ni Tatay nga magin maopay an akon kinabuhi, salit gin-areglar niya nga bumisita ako ha usa nga kilala nga eskwelahan para ha hotel management. Naruyagan ko gud ito ngan nagpaenrol ako kay naghunahuna ako nga ito an baton han Dios ha akon pag-ampo nga magin riko ngan magin malipayon. Nag-eskwela akon hin hotel administration, business law, ngan corporate finance ha sulod hin lima ka tuig samtang nagtatrabaho ako ha usa nga casino hotel ha Las Vegas, Nevada.

 Han 22 anyos ako, nagin assistant vice president ako han usa nga casino hotel. Para ha mga tawo, riko ngan malampuson ako. Kaurogan nga nakakaon ko an pinakamagrasa nga mga pagkaon ngan naiinom ko an pinakamahal nga mga bino ngan iba pa nga makahurubog nga irimnon. Ginsisidngan ako han akon mga kasangkayan nga negosyante, “Hinumdumi nga an kwarta an pinakaimportante nga butang ha kalibotan.” Para ha ira, kwarta an sekreto basi magin tinuod nga malipayon.

 Kaapi han akon trabaho an pag-asikaso ha riko gud nga mga tawo nga napakadto ha Las Vegas basi maghuygo. Bisan kon riko hira, baga hin diri hira malipayon. Nagin diri malipayon liwat ako. Ngani, samtang mas nagtitikadamu an akon kwarta, mas nagtitikadamu liwat an akon mga kabaraka ngan agsob nga diri ako nakakakaturog hin maopay kon gab-i. Nakahunahuna ako nga mag-unay. Tungod kay dismayado na ako ha akon kinabuhi, dinaop ako ha Dios ngan nagpakiana ha iya, “Diin ako makakabiling hin tinuod nga kalipay?”

 Hito nga panahon, binalhin ha Las Vegas an duha han akon bugto nga babaye nga Saksi na ni Jehova. Bisan kon waray ko karawta an mga literatura nga ira iginhahatag, inuyon ako nga basahon an akon Biblia kaupod nira. Ha akon Biblia, nakaimprinta hin pula an mga ginsiring ni Jesus. Tungod kay natoo ako ha ngatanan nga ginsiring ni Jesus, ito an iginpakiistorya ha akon han akon kabugtoan. Ginbasa ko liwat an Biblia nga nag-uusahan la ako.

 Nahipausa ako ha damu nga butang nga akon nabasa. Pananglitan, hi Jesus nagsiring: “Ha iyo pag-ampo, ayaw pag-ulit-ukit hin waray polos nga mga pulong sugad han mga pagano nga naghuhuna-huna nga pamamatian hira tungod han damu nga mga pulong.” (Mateo 6:7, An Baraan nga Biblia) Pero may usa nga padi nga naghatag ha akon hin retrato ni Jesus ngan nagsiring hiya nga kon mag-aampo ako ha retrato hin napulo nga Amay Namon ngan napulo nga Maghimaya Ka Maria, ihahatag han Dios an bisan pira nga kwarta nga akon kinahanglan. Pero nahunahuna ko nga kon bubuhaton ko ito, diri ba uliuli, o pauroutro, ko nga ginyayakan an amo gihapon nga mga pulong? Nabasa ko liwat an ginsiring ni Jesus: “Ayaw pagngaran dinhi ha kalibutan hin iyo amay; usa gud la an iyo Amay ha langit.” (Mateo 23:9, An Baraan nga Biblia) Salit nahunahuna ko liwat, ‘Kay ano nga gintatawag namon nga mga Katoliko an amon padi nga “Father”?’

 Han nabasa ko an libro han Biblia nga Santiago, ito gud an nakaaghat ha akon nga hunahunaon hin maopay kon ano an akon ginbubuhat ha akon kinabuhi. Ha kapitulo 4, hi Santiago nagsurat: “Diri ba kamo maaram nga an paghigugma han kalibutan amo in pakig-away sa Dios? Sanglit, an karuyag humigugma han kalibotan nahihimo nga kaaway han Dios.” (Santiago 4:4, An Baraan nga Biblia) Mas nabantad pa gud ako han bersikulo 17: “Sanglit, usa nga kasal-anan an pagsabot han angay buhaton kundi diri naman ginbubuhat.” Katapos, gintawagan ko an akon duha nga bugto nga babaye ngan ginsidngan ko hira nga mabaya na ako ha casino hotel tungod kay aada hito an mga butang nga nahibaroan ko nga diri tama, upod na an paghuygo ngan kahakog.

 Karuyag ko nga magin mas maopay an akon relasyon ha Dios pati ha akon mga kag-anak ngan kabugtoan. Salit nagdesisyon ako nga pasimplihon an akon kinabuhi. Pero diri masayon an paghimo hin mga pagbag-o. Pananglitan, gintanyagan ako hin mas hitaas nga posisyon ha casino hotel nga doble o triple an sweldo kay han akon sweldo han una. Pero igin-ampo ko ito, ngan nagdesisyon ako nga diri ko na karuyag an sugad nga klase hin kinabuhi. Salit binaya ako ha akon trabaho, ngan binalhin ako ha garahe ni Nanay ngan ginhimo ko ito nga pwesto para ha akon gutiay nga negosyo nga pag-laminate hin mga menu han restawran.

 Bisan kon nakabulig ha akon an Biblia nga maghimo hin mas maopay nga mga desisyon ha kinabuhi, waray la gihapon ako umatender ha mga katirok han mga Saksi ni Jehova. Ginpakianhan ako han akon duha nga bugto nga babaye kon ano an akon nadidirian ha mga Saksi. Binaton ako: “Ginbuburublag han iyo Dios nga hi Jehova an mga pamilya. Pasko ngan birthday la an panahon nga mahimo ko makaupod an aton pamilya, ngan diri kamo nagsiselebrar hito.” An usa ko nga bugto nagtangis ngan nagpakiana ha akon: “Hain ka ha iba nga mga adlaw han tuig? Karuyag ka namon makaupod bisan san-o. Pero karuyag mo la makigkita ha amon durante hito nga mga selebrasyon—ngan tungod la kay inaabat mo nga obligado ka.” Nakadulot gud ha akon kasingkasing an iya mga ginsiring, ngan nagtangis liwat ako.

 Han nasabtan ko nga hinigugma gud han mga Saksi ni Jehova an ira pamilya—ngan sayop ako—nagdesisyon ako nga umatender ha usa han ira mga katirok ha Kingdom Hall ha amon lugar. Didto, nakilala ko hi Kevin nga usa nga eksperyensyado nga magturutdo han Biblia ngan gindumarahan niya ako hin pag-aram ha Biblia.

 Hi Kevin ngan an iya asawa nagkikinabuhi hin simple basi magamit nira an ira daku nga panahon ha pagbulig ha iba nga masabtan an Biblia. Tikang ha ira kità, may-ada liwat hira nagagamit nga panggasto para makabiyahe ngadto ha Aprika ngan Sentral Amerika, diin nabulig hira ha pagtukod han mga sanga nga opisina han mga Saksi. Malipayon gud hira, ngan hinigugma nira an usa kag usa. Naghunahuna ako, ‘Ini nga klase hin kinabuhi an akon gud karuyag.’

 May ginpakita ha akon hi Kevin nga usa nga video mahitungod ha kalipay nga resulta han pag-alagad sugad nga misyonero, ngan nagdesisyon ako nga ito an karuyag ko buhaton. Han 1995, katapos ko pag-adman hin maopay an Biblia ha sulod hin unom ka bulan, nagpabawtismo ako sugad nga Saksi ni Jehova. Imbes nga mag-ampo ha Dios nga magin riko ako, ini lugod an akon igin-ampo: “Ayaw ako tagi hin kapobrehan o hin karikohan.”—Proberbios 30:8.

 Yana, riko na gud ako—diri ha pinansyal, kondi ha espirituwal. Nakilala ko an akon mahusay nga asawa, hi Nuria, ha Honduras, ngan magkaupod kami nga nag-alagad sugad nga misyonero ha Panama ngan Mexico. Totoo gud ini nga ginsisiring han Biblia: “An bendisyon ni Jehova an nagpapariko ha usa nga tawo, ngan diri Niya ito gindudugangan hin kasakit”!—Proberbios 10:22.