“Igin-anak ako ha pamilya nga nag-aalagad kan Jehova,” siring ni Rachel, nga naukoy yana ha Dominican Republic. “Makasurubo, han syete anyos ako, umundang hi Papa pakig-upod ha katawohan ni Jehova ngan madarahog nga kumontra ha kamatuoran. Ginhimo niya nga makuri para ha akon an pagsingba kan Jehova. Pananglitan, nangalimbasog hiya nga paundangon ako ha pag-alagad kan Jehova kabalyo han mga butang nga iya ihahatag ha akon—celfon, pamasyada ha Disneyland, o credit card pa ngani! Danay ginkakastigo niya ako basi umundang ako pag-alagad kan Jehova. Nagsiring hiya nga kon diri ako makakayakan o makakalakat, diri na ako makakatambong ha mga katirok. Waray gud ito makapugong ha akon. Pirme ako determinado nga tumambong ha mga katirok.

 “Diri ako ginkakastigo ni Papa kon aada hi Mama. Nagsiring hiya ha akon nga pasasakitan niya hi Mama kon isusumat ko nga ginkakastigo niya ako. Naghihimo hiya hin mga palusot parte ha akon mga bun-og, nasiring hiya nga tungod ito kay gintututdoan niya ako hin karate.

 “Bata pa gud ako ngan nahahadlok gud nga isumat kan Mama an mga nahitatabo. Salit kan Jehova ko ito iginsusumat. Nagbabaktas ako hin hirayo ha kakahoyan ha luyo han amon balay ha Maryland, U.S.A. Didto, may daku nga oak tree nga akon ginsasaka, ngan ha komportable nga sanga, didto ako nakikiistorya kan Jehova. Iginsusumat ko ha iya an akon mga inaabat ngan an akon bubuhaton para ha iya pagdaku ko—basta buligan la niya ako nga padayon nga mabuhi. Iginsusumat ko liwat ha iya an akon bubuhaton ha tiarabot nga bag-o nga kalibotan, an pamilya nga karuyag ko, ngan an kamurayawan ngan kalipay nga akon aabaton kon waray na kasakit ngan kahadlok.

 “Kon ginsusuholan o ginkakastigo ako ni Papa para diri na ako mag-alagad ha Dios, pirme ko gin-aabat an pagliaw ngan pagparig-on ni Jehova. Ginbuligan ako han Dios nga magpabilin nga maunungon ngan marig-on.

 “Nabawtismohan ako han dyes anyos ako, ngan nagpayunir paglabay hin duha ka tuig. Ha siyahan, diri maaram hi Papa parte hito. Pero han nahibaroan niya ito, ginsuntok niya ako ngan na-dislocate an akon panga.

 “May pipira nga nag-aghat ha akon nga umundang pagpayunir kay bata pa gud ako, naghunahuna hira nga diri ko nasasabtan an pagkaseryoso han akon desisyon. Samtang nalabay an panahon, damu an akon nakita nga batan-on nga Saksi ha amon lugar nga diri nakapokus ha pag-alagad kan Jehova. Busy hira ha pag-party ngan paglipay. Ngan an ira ginbubuhat baga hin makaruruyag! Danay karuyag ko buhaton an ira ginbubuhat. Nahuhunahuna ko, ‘Kay ano nga diri na la ako maglipay-lipay pariho han ginbubuhat han akon mga kaedad imbes nga magsinangyaw?’ Pero kon naabat ako hin sugad hito, iginsusumat ko ito kan Jehova.

 “Han mga 15 anyos ako, ginkontak ako hin kilala nga agency han mga model. Nag-offer hira ha akon hin daku nga sweldo kon magtatrabaho ako ha ira ha Milan, Italy. Maopay ha pag-abat nga ginsidngan ka nga puydi ka magin model, makita ha mga magasin, ngan magsul-ot hin marahalon nga bado ha mga fashion show. Haros tulo ka tuig na ako nga regular payunir, salit nahunahuna ko, ‘Ini nga trabaho makakasuporta ha akon ha pagpayunir hin maiha-iha!’ Ginbayaan kami ni Papa, salit nahunahuna ko liwat nga an kwarta makakabulig kan Mama ha mga gastuson.

 “Igin-ampo ko ito. Iginsumat ko ito kan Mama, nga maiha na nga payunir, ngan ha usa nga mahigugmaon ngan respetado nga tigurang. Sugad han pirme ko ginbubuhat, sumaka na liwat ako ha oak tree ngan nag-ampo utro. Ginbaton ni Jehova an akon mga pag-ampo pinaagi hin teksto ha Biblia nga iginpabasa ha akon han tigurang. Ito an Eclesiastes 5:4, nga nasiring: ‘Ha kada mo pagsasaad ha Dios, tumana ito. Kon ano an imo iginsaad, tumana ito.’ Nagsaad ako nga bug-os ako nga mag-aalagad kan Jehova, ngan nahadlok ako nga ito nga trabaho makadaot han akon relasyon ha iya. Salit waray ko ito karawata.

 “Nalamposan ko an makasurubo nga nahitabo ha akon han bata pa ako! Yana, malipayon ako kaupod an akon bana nga hi Jaser, ngan an amon anak nga hi Connor, nga noybe anyos. Hi Jaser usa nga tigurang, ngan hi Connor diri-bawtismado nga magwarali. Haros 27 ka tuig na ako nga nag-aalagad hin bug-os-panahon.

 “Agsob ko mahunahuna an higlaba nga pakiistorya ko kan Jehova tikang ha oak tree ha luyo han amon balay. Nakimalooy ako kan Jehova nga buligan ako, ngan ginbuhat niya ito ha urusahon nga paagi. Ginparig-on niya ako, ginliaw, ngan gin-giyahan. Ha bug-os ko nga kinabuhi, pauroutro nga ginpakita ni Jehova kon ano kamaopay hiya nga amay. Malipayon ako nga nagdesisyon ako nga mag-alagad ha iya ha akon bug-os nga kasingkasing. Ito an pinakamaaramon nga desisyon nga akon ginbuhat.”