Han 2005, hi Sowbhagya nga taga-India namatayan han iya hinigugma nga bana. Hiya ngan an iya tres anyos nga anak nga babaye nga hi Meghana gin-ataman hin maopay han iya bana. Yana, nakukurian hi Sowbhagya nga mamiling hin kwarta basi makasuporta ha iya ngan ha iya anak.

 Ngan an mas makuri pa, hi Sowbhagya diri ginkakarawat han iba. Sugad hin makililimos an pagtratar han ira pamilya ha ira nga magnanay, ngan pauroutro nga ginsidngan hiya nga pabug-at hiya ha ira. Namiling hi Sowbhagya hin pagliaw, salit nagtikang hiya pagsingba ha usa nga singbahan ha ira lugar, pero gintamay hiya han mga tawo didto kay pobre hiya. Hi Sowbhagya namiling hin trabaho basi makasuporta ha iya ngan ha iya anak. Kondi bisan pa han iya paniguro, diri hiya nakakabiling hin trabaho.

 Hi Sowbhagya nagsiring: “Nawad-an ako hin paglaom, salit nagdesisyon ako nga magpakamatay. Pero maaram ako nga kon waray ako, maatubang hin damu nga problema an akon anak. Salit nagdesisyon ako nga tapuson na la an amon kinabuhi.” Tungod han pag-abat hin kawaray-pulos ngan pagin diri hinigugma, lumakat hi Sowbhagya basi pumalit hin hilo.

 Samtang hi Sowbhagya nagbibiyahe tipauli sakay hin tren, dumaop ha iya hi Elizabeth nga usa nga Saksi ni Jehova ngan nakiistorya ha iya. Iginsumat ni Sowbhagya nga waray hiya trabaho, ngan may pagkabuotan nga nagsiring hi Elizabeth nga bubuligan hiya pamiling hin trabaho. Nagsiring liwat hi Elizabeth nga tikadto hiya ha usa nga Bible study. Nahipausa hini hi Sowbhagya kay bisan kon nakasingba na hiya ha damu nga singbahan, waray pa gud hiya makabati hin mga tawo nga nag-aaram han Biblia. Gin-imbitar ni Elizabeth hi Sowbhagya nga bisitahon hiya basi mahibaro hin dugang mahitungod ha pag-aram ha Biblia.

 Han nakauli hi Sowbhagya, nagpaplano la gihap hiya magpakamatay. Kondi hi Meghana igin-upod ha pamasyada hin usa nga paryente, salit nagdesisyon hi Sowbhagya nga hulaton an iya anak nga makauli antes buhaton an iya plano.

 Samtang waray pa makakauli an iya anak, ginbisita niya hi Elizabeth, nga malipayon nga nag-abiabi ha iya. Hito nga pagbisita, iginpakita ha iya ni Elizabeth an libro nga Ano Gud ba an Igintututdo han Biblia? Nainteres hi Sowbhagya ha kapitulo nga “Hain an mga Patay?” tungod kay bag-o pa la namatay an iya bana. Hito mismo nga adlaw, nagpa-Bible study hi Sowbhagya.

 Gin-imbitar ni Elizabeth hi Sowbhagya nga tumambong ha kombensyon nga paghihimoon sunod nga semana, ngan ginkarawat ito ni Sowbhagya. Napagios gud hiya han programa, salit nagdesisyon hiya nga karuyag niya magin Saksi ni Jehova. Pag-uli niya tikang ha kombensyon, may nag-offer ha iya hin trabaho.

 Iginpadayon ni Sowbhagya an iya pag-Bible study. Yana, imbes nga maghingyap nga tapuson an iya kinabuhi, may-ada na hiya rason nga mabuhi. Nabawtismohan hiya, ngan ha urhi, an iya anak nga hi Meghana nabawtismohan liwat. Yana, pariho hira regular payunir, ngan hi Meghana nagtatrabaho sugad nga remote volunteer ha usa han mga translation office ha India.

 Mapasalamaton gud hira Sowbhagya ngan Meghana nga gindaop ni Elizabeth hi Sowbhagya ha tren, nagpakita hin sinsero nga interes, ngan nakig-istorya ha iya mahitungod han kamatuoran! Daku liwat an ira pagpasalamat kan Jehova. Hi Meghana nagsiring: “Maiha na unta kami nga iginlubong kon waray namon hibaroi an kamatuoran hito nga adlaw. Yana, malipayon gud kami. Ginhuhulat gud namon ni Mama an panahon nga mahangkopan utro hi Papa, tutdoan mahitungod kan Jehova, ngan sumatan kon paonan-o gintalwas ni Jehova an amon kinabuhi.”