Hi Bryn nga taga-North Carolina, U.S.A., usa nga membro han Hospital Liaison Committee didto, nga nakikigkooperar ha mga hospital ha pag-asikaso han mga panginahanglan han mga pasyente nga Saksi ni Jehova.

 Tungod han COVID-19 nga pandemya, damu nga hospital an diri nagpapasulod hin mga bisita. Gintawagan ni Bryn an direktor han pastoral care ha usa nga hospital ha ira lugar basi mahibaroan kon paonan-o hiya makakabulig ha mga pasyente nga Saksi.

 Nakaistorya ni Bryn ha telepono an asistant han direktor. Tungod kay diri puydi an pagbisita, naghangyo hi Bryn kon puydi ihatag an iya numero ha telepono ha mga pasyente nga Saksi basi makaistorya niya hira. Inuyon hito an asistant.

 Katapos, nahunahuna ni Bryn an mga staff ha hospital. Nagsiring hiya ha asistant nga gin-aapresyar niya an ginbubuhat han mga staff ha hospital ngan unta maopay an ira kahimsog. Nagsiring liwat hiya nga may-ada hiya nabasa nga an mga tawo bisan diin, labi na an mga nagtatrabaho ha hospital, naiistres gud tungod han pandemya.

 An asistant nagsiring nga tungod han COVID-19, nagin nakakaistres gud an kinabuhi ha hospital.

 Katapos, nagsiring hi Bryn: “An amon website may-ada impormasyon nga makakabulig ha mga tawo nga makaya an istres. Kon makadto ka ha jw.org, i-type an ‘istres’ ha Search box, ngan may makikita ka nga mga artikulo nga makakabulig ha iyo mga staff.”

 Samtang nag-iistorya hira, ginkita han asistant an website, gin-type an pulong nga “istres” ha Search box, ngan iya nakita an mga artikulo nga may kalabotan ha istres. Nagsiring hiya, “Wow! Ipapakita ko ini ha direktor. Makakabulig ini ha amon mga staff ngan ha iba. Magpi-print ako hini ngan ihahatag ha ira.”

 Paglabay hin pipira ka semana, nakaistorya ni Bryn an direktor, nga nagsumat ha iya nga nag-access hira han website ngan nagpa-print hin mga kopya han mga artikulo ha istres ngan iba pa nga topiko may kalabotan hito. Iginhatag nira ito ha mga nars ngan ha iba pa nga staff ha hospital.

 Hi Bryn nagsiring: “Ginpasalamatan ako han direktor tungod han aton buruhaton ngan ha mag-opay nga mga artikulo. Siring niya nga daku an naibubulig hito.”