Ginbuligan ni Yanmei, nga usa nga Saksi ha Asia, an usa nga buta nga babaye nga hi Mingjie ha pagtabok ha kalsada. a Ginsidngan hiya ni Mingjie: “Salamat. Bendisyonan ka unta han Dios!” Katapos, ginpakianhan ni Yanmei hi Mingjie kon karuyag ba niya nga magkaistorya utro hira basi paghisgotan an Biblia. Ha urhi, hi Mingjie nagsiring nga kada adlaw nag-iinampo hiya nga giyahan hiya ngadto ha tinuod nga kongregasyon han Dios. Kay ano nga igin-iinampo niya ito?

 Hi Mingjie nagsiring nga han 2008 ginkarawat niya an imbitasyon han iya buta nga sangkay nga sumingba ha usa nga singbahan para ha mga may depekto ha panlawas. Katapos magpinamati han sermon, ginpakianhan ni Mingjie an padi kon ano nga libro an iya ginkuhaan han iya sermon. Ginsidngan hiya han padi nga tikang ito ha Biblia, an masasarigan nga Pulong han Dios. Karuyag gud ni Mingjie nga basahon ito. Salit naningkamot hiya nga magkaada hin Biblia ha Chinese braille ngan ginbasa niya an 32 ka volume ha sulod hin mga unom ka bulan. Ha pagbinasa ni Mingjie ha iya Biblia, nakasiring hiya nga diri ngay-an totoo an doktrina nga Trinidad nga igintututdo han singbahan nga iya gin-inatenderan, ngan an Dios may ngay-an ngaran, hi Jehova.

 Waray pag-iha, nalainan hi Mingjie ha panggawi han mga membro hito nga singbahan. Nasantop niya nga diri nira ginbubuhat an iya nababasa ha Biblia. Pananglitan, salin la nga mga pagkaon an iginhahatag ha mga buta, pero ha diri mga buta, bag-o nga mga linuto an iginhahatag ha ira. Nasubo gud hi Mingjie hiton diri patas nga pagtratar, salit nagbiling hiya hin iba nga singbahan ha ira lugar. Ito an rason kon kay ano nga nag-inampo hi Mingjie nga mabilngan an tinuod nga Kristiano nga kongregasyon.

 Tungod han pagin buotan ni Yanmei, naruyag hi Mingjie magpa-Bible study. Waray pag-iha, inatender hi Mingjie ha katirok han mga Saksi ni Jehova. Hi Mingjie nagsiring: “Diri ko gud makakalimtan an siyahan ko nga pag-atender. Mahigugmaon nga gin-abiabi ako han mga kabugtoan. Nabantad gud ako hito. Bisan kon buta ako, inabat ko didto an waray ginpapaurog nga gugma.”

 Nag-uswag gud hi Mingjie, ngan regular na hiya nga naatender ha mga katirok. Nag-i-enjoy gud hiya pagkinanta han mga Kingdom song, pero nakukurian hiya kay waray pa songbook ha Chinese braille. Salit ha bulig han kongregasyon, naghimo hi Mingjie han iya kalugaringon nga songbook. Inabot hin 22 ka oras tubtob nga natapos niya an 151 nga kanta! Han Abril 2018, nagtikang hi Mingjie umupod ha pagsangyaw, ngan kada bulan 30 ka oras hiya nga nagsasangyaw.

 Basi mabuligan hi Mingjie nga makapangandam para ha bawtismo, naghimo hi Yanmie hin audio rekording han mga pakiana ngan mga teksto ha Biblia ha libro nga Organisado ha Pagbuhat han Kaburut-on ni Jehova. Han Hulyo 2018, nabawtismohan hi Mingjie. Hiya nagsiring: “Nabantad ako han gugma nga iginpakita han mga kabugtoan didto ha kombensyon. Nakatangis ako tungod han kalipay kay nagin bahin gihapon ako han tinuod nga kongregasyon han Dios.” (Juan 13:34, 35) Yana, determinado hi Mingjie nga ipakita ha iba an gugma nga iya nakarawat, salit nag-aalagad hiya sugad nga bug-os-panahon nga ebanghelisador.