Usa ka adlaw, hi Eliso, nga usa nga babaye nga Saksi ni Jehova, nagdudumara hin pag-aram ha Biblia ha balay han usa nga interesado nga babaye. Samtang nag-aaram hira, may inabot nga diri ginlalaoman nga mga bisita. Usa nga klero, kaupod an iya asawa, an nakada ha purtahan. Nahibaroan ni Eliso nga ini nga mag-asawa bag-o pa la nga namatayan han ira usa la nga anak.

 Han hi Eliso nagsiring nga nasusubo hiya ha kamatay han ira anak, an klero ngan an iya asawa nagtikang pagtangis. Katapos, nasisina nga nagsiring an klero: “Diri ko maintindihan kon kay ano nga gintugotan han Dios nga mahitabo ini! Kay ano nga ginkuha niya an akon nag-uusahan la nga anak? Bainte otso ka tuig na ako nga nagsiserbi ha Dios ngan damu na nga mag-opay nga butang an akon ginbuhat, katapos, ini an iya ibabalos ha akon! Kay ano nga ginpatay han Dios an akon anak?”

 Iginsaysay ni Eliso ha mag-asawa nga waray kuhaa han Dios an ira anak. Iginsaysay liwat niya an mga topiko sugad han lukat, pagkabanhaw, ngan an mga rason kon kay ano nga gintutugotan han Dios nga mahitabo an magraot nga butang. An klero ngan an iya asawa nagsiring kan Eliso nga an iya mga iginsaysay amo gud an mga baton han ira mga pag-ampo.

 Han sumunod nga semana, an klero ngan an iya asawa inapi ha pag-Bible study nira Eliso ngan han babaye. An ira ginhihisgotan amo an kapitulo nga an ulohan, “Totoo nga Paglaom Para ha Imo Namatay nga mga Hinigugma” ha libro nga Ano Gud ba an Igintututdo han Biblia? An mag-asawa may kadasig nga nagpartisipar ha pag-aram.

 Ha urhi, hira nga duha inatender ha espesyal nga kombensyon han mga Saksi ni Jehova ha Tbilisi, Georgia, ngan naimpres gud hira han gugma ngan pagkaurosa nga ira nakita—mga kalidad nga maiha na nga ira ginpinangalimbasogan nga igtutdo ha mga membro han ira relihiyon, pero waray maopay nga resulta.