Hi Desicar, nga solo nga nanay, karuyag magpahaluag han iya ministeryo pinaagi ha pagregular payunir. Naukoy hiya ha Venezuela, diin grabe an problema ha ekonomiya. Pero determinado la gihap hiya nga magpayunir, ngan ito gud an iya ginbuhat. Nag-enjoy hiya hito, pero nagtikang an COVID-19 nga pandemya.

 Ha tinikangan han COVID-19 nga pandemya, nakurian hi Desicar nga i-adjust an iya ministeryo ha bag-o nga kahimtang. Para ha iya, makuri an letter writing. Dugang pa, diri hiya nakakagamit hin videoconferencing ha iya ministeryo tungod kay mahal hinduro an Internet ha ira lugar. “Nanluya ako,” siring niya. “Tigda la nga diri na ako nakakagsangyaw pariho han akon ginbubuhat hadto. Inabat ko nga diri ako epektibo sugad nga regular payunir.”

 Pero han Enero 2021, gin-aprobaran han branch office han mga Saksi ni Jehova ha Venezuela an usa nga espesyal nga kampanya ha pagsangyaw. Naghimo hin kahikayan nga ibrodkast han mga 60 nga estasyon han radyo ngan 7 nga channel ha TV an pinili nga basado ha Biblia nga mga pahayag publiko ha sulod hin lima ka weekend hito nga bulan. Gindasig an mga Saksi nga imbitaron an mga interesado nga magkita ngan mamati. Naghatag liwat an branch hin mga pakiana ngan mga teksto nga konektado ha tagsa nga pahayag nga magagamit han kabugtoan ha ira pag-letter writing ngan pag-phone witnessing. Dugang pa, gindasig han branch an kabugtoan nga magsangyaw pinaagi hin text—usa nga bag-o nga paagi han pagsangyaw para ha damu nga Saksi ha Venezuela.

 Eksayted hi Desicar nga makigbahin hini nga kampanya. Bisan kon waray pa gud hiya makasangyaw pinaagi hin text, nagdesisyon hiya nga testingan ito. Pero kinahanglan niya hin bulig. “Diri ako hiara paggamit hin mga gadyet,” siring ni Desicar. Salit nagpatutdo hiya ha iya anak nga babaye, ngan waray la pag-iha, hi Desicar andam na makigbahin ha kampanya.

 Pinaagi hin pag-text, damu an naimbitar ni Desicar nga iya kakilala nga mamati ha nakarekord nga mga pahayag. Nalipay gud hiya ha mga resulta. Damu han gin-imbitar ni Desicar an namati ha mga pahayag ngan namakiana. An iba waray makakita o makapamati pero ginpakianhan nira hi Desicar kon ano an ginhisgotan ha mga pahayag. “Nag-andam ako hin sumaryo han akon mga nota ngan iginpadara ito ha ira,” siring ni Desicar. “Waray pa gud ako magkaada sobra 5 nga pagbalik-bisita ha sulod hin usa ka bulan, pero ha kataposan han kampanya, nagkaada ako 112!” a

 Gin-imbitar liwat ni Desicar an iya diri tumuroo nga bugto nga babaye, nga naukoy sapit han iya gin-uukyan, basi mamati ha mga pahayag ha radyo. “Diri ako makatoo nga umuyon an akon bugto,” siring ni Desicar. “Kada Domingo han alas-8 han aga, napakadto ako ha iya apartment, ngan magkaupod kami nga namamati. Damu an iya pakiana samtang namamati kami ngan bisan kon tapos na an programa.” Umatender liwat an bugto ni Desicar ha Memoryal han kamatayon ni Jesus pinaagi hin videoconferencing, ngan sumige hiya nga gamiton ni Desicar an iya Internet ha pagministeryo.

 “Mapasalamaton gud ako kan Jehova,” siring ni Desicar. “Mapasalamaton liwat ako ha mga tigurang ha amon kongregasyon kay ira ako gindasig. Ginbuligan nira ako nga maibalik an akon kalipay ha ministeryo.” (Jeremias 15:16) Hi Desicar padayon nga nagpayunir ngan ginbalik-bisita an mga interesado nga iya nabilngan pinaagi hin pag-text.