Hi Marta, nga usa han mga Saksi ni Jehova ha Guatemala, nag-aaram han Kekchi nga linggwahe basi masumatan niya han mensahe han Biblia an mga tawo nga nagyayakan hito nga linggwahe. Usa ka adlaw, may nakita hiya nga lalaki nga tigawas ha hospital. Tungod han hitsura hito nga lalaki, naghunahuna hi Marta nga tikang hiya ha usa nga baryo nga nagyayakan hin Kekchi, usa nga bukiron nga lugar nga talagsa la masangyawan han mga Saksi ni Jehova. Gindaop niya ito nga lalaki ngan nakiistorya hiya gamit an pipira nga Kekchi nga mga pulong nga iya nahibabaroan.

 Gintanyagan ni Marta an lalaki hin pag-aram ha Biblia. Malipayon nga ginkarawat ito han lalaki pero ginsidngan niya hi Marta nga waray hiya kwarta nga ibabayad para hito. Iginsaysay ni Marta nga an mga Saksi ni Jehova nagdudumara ha mga tawo hin libre nga pag-aram ha Biblia. Ginsidngan liwat hiya ni Marta nga puydi hiya mag-aram pinaagi ha celfon ngan puydi liwat umapi an bug-os niya nga pamilya. Naruyag an lalaki. Tungod kay an lalaki nakakayakan ngan nakakabasa hin Spanish, gintagan hiya ni Marta hin Bag-o nga Kalibotan nga Hubad han Baraan nga Kasuratan ha Spanish nga linggwahe. Iya liwat gintagan ito nga lalaki hin libro nga ginagamit ha pag-aram nga Ano Gud ba an Igintututdo han Biblia? ha Kekchi nga linggwahe. Pagkasunod nga semana, an lalaki, an iya asawa, ngan an ira duha nga anak nagtikang magpa-Bible study kan Marta pinaagi ha celfon. Nagba-Bible study hira duha ka beses ha usa ka semana. “Tungod kay diri ako masyado maaram mag-Kekchi,” siring ni Marta, “Spanish an amon gin-gamit ha pag-aram, ngan gin-interpret ito han lalaki para ha iya asawa. An ira mga anak nakakaintindi han Spanish.”

 Ito nga lalaki usa nga pastor han ira singbahan. Nagtikang niya itutdo ha iya mga membro an iya mga nahibabaroan ha iya pag-Bible study. Naruyagan ito han iya mga membro, ngan ginpakianhan hiya kon diin hiya nahibaro hito nga bag-o nga mga katutdoan. Han ginsumatan niya hira mahitungod ha iya pag-Bible study, inapi hira ha pag-aram. Waray pag-iha, mga 15 ka tawo an nagtitirirok kada semana basi mag-aram pinaagi ha celfon kaupod ni Marta. Ha urhi, nagbutang hira hin mikropono hirani han celfon basi makabati hira ngatanan.

 Han iginsumat ni Marta ha mga tigurang ha ira kongregasyon an mahitungod hini nga pag-aram ha Biblia, usa nga tigurang an binisita ha baryo nga gin-uukyan han mga Bible study. Gin-imbitar niya hira nga umatender ha usa nga pahayag publiko nga ipipresenta han paramangno han sirkito a nga hihimoon ha usa nga baryo nga an kahirayo usa ka oras nga pagbiyahe pinaagi ha awto ngan katapos magbabaktas pa hin duha ka oras. Naruyag an mga Bible study, ngan 17 ha ira an tinambong.

 Paglabay hin pipira ka semana, an paramangno han sirkito ngan an pipira nga iba pa nga Saksi nakig-upod hin upat ka adlaw ha mga Bible study. Kon aga, nagkikita hira hin mga video nga basado ha Biblia ha jw.org ha Kekchi nga linggwahe, ngan nag-aaram hira han brosyur nga Hin-o an Nagbubuhat han Kaburut-on ni Jehova Yana? Kon kulop, nagkikita hira hin mga video ha JW Broadcasting. Naghikay liwat an paramangno han sirkito nga an tagsa nga Bible study magkaada personal nga magturutdo ha Biblia.

 Hito nga upat ka adlaw, an mga Saksi nagsangyaw liwat ha kahirani nga mga baryo nga nagyayakan hin Kekchi, ngan gin-imbitar nira an mga tawo para ha usa nga espesyal nga katirok. Hito nga katirok, 47 an tinambong, ngan gin-imbitar hira han kabugtoan nga magpa-Bible study. Onse nga pamilya an kinarawat hito.

 Paglabay hin pipira ka bulan, naghikay an mga tigurang nga magkaada katirok ha baryo han lalaki kada kataposan han semana. Yana, mga 40 an regular nga naatender ha mga katirok. Ngan han nagdumara didto an kabugtoan han Memoryal han kamatayon ni Jesus, nalipay hira nga 91 an inatender.

 Ha paghinumdom kon paonan-o nagtikang ini nga eksperyensya ngan kon paonan-o ito nagkaada maopay nga resulta, hi Marta nagsiring: “Mapasalamaton gud ako kan Jehova. Usahay, inaabat ko nga diri damu an akon mahihimo. Pero puydi kita gamiton han Dios ha pagbulig ha iba. Maaram hiya kon ano an aada ha kasingkasing hito nga mga taga-baryo, ngan iya hira iginpahirani ha iya katawohan. Hinigugma hira ni Jehova.”