“Waray ko gud maimadyin nga makakag-alagad ako kan Jehova ha sugad hini nga paagi.” Ini an siring ni Gwen nga taga-England, mahitungod ha iya pag-alagad ha lugar nga mas daku an panginahanglan ha Albania. a

 Usa hi Gwen ha damu nga Saksi nga binalhin ha Albania basi bumulig ha pagtirok han “presyoso nga mga butang han ngatanan nga nasud.” (Hagai 2:7) Ano an nakaaghat hini nga mga ebanghelisador? Ano nga mga pagbag-o an ira ginhimo basi hira makabalhin? Ngan ano an nakabulig ha ira nga makapailob bisan pa han mga problema?

 An ngatanan nga magwarali nga binalhin ha Albania basi bumulig may-ada pariho nga rason: Hinigugma nira hi Jehova ngan karuyag nira buligan an iba nga makilala hiya.

 Antes bumalhin, naghimo hira hin mga pagbag-o basi makag-alagad hira kan Jehova ha bag-o nga mga paagi, ngan nakabulig ini ha ira nga maatubang an mga problema ha pag-alagad ha iba nga nasud. Hi Gwen nagsiring: “Nag-join anay ako ha usa nga grupo nga nagyayakan hin Albanian ha amon lugar. Katapos, kinadto ako ha Albania para ha usa nga kombensyon. Ha urhi, binalik ako didto hin madaliay basi mas mahibaro han linggwahe.”

 Han 23 anyos hi Manuela, binalhin hiya ha iba nga lugar han ira nasud ha Italy basi bumulig ha gutiay nga kongregasyon. Hiya nagsiring: “Nag-alagad ako didto hin upat ka tuig. Katapos, nahibaroan ko nga damu ngay-an an buruhaton ha Albania. Salit nagpayunir ako didto hin pipira ka bulan.”

 Syete anyos pa la hi Federica han nabatian niya ha usa nga kombensyon an report tikang ha Albania. Hiya nagsiring: “An brother nga naghatag hin report nagsiring nga an mga magwarali ha Albania nakagtikang na hin damu nga Bible study ngan ito nga mga interesado naatender na ha mga katirok. Ginsumatan ko an akon mga kag-anak nga karuyag ko kumadto ha Albania. Nahipausa hira han akon hingyap pero an akon tatay nagsiring, ‘Ig-ampo ito, ngan kon kaburut-on ito ni Jehova, mamamati hiya.’ Paglabay hin pipira ka bulan, gin-imbitar an amon pamilya nga mag-alagad ha Albania!” Paglabay hin damu ka tuig, nagin asawa ni Federica hi Orges. Bug-os-panahon hira nga nag-aalagad ha Albania.

 Han nagretiro hi Gianpiero, binalhin hiya ha Albania kaupod an iya asawa nga hi Gloria. Hiya nagsiring: “Ginpadaku namon an amon 5 nga anak nga lalaki ha Italy. An tulo ha ira binalhin ha iba nga nasud basi mag-alagad diin may panginahanglan. Nabantad an amon kasingkasing han usa nga artikulo ha Barantayan nga may ulohan ‘Mahimo Ka ba Kumadto ha Macedonia?’ Ginhunahuna namon kon paonan-o babadyeton an akon pensyon basi makag-alagad ha Albania.”

 An mga need-greater kinahanglan abanse nga magplano hin maopay ngan maghimo hin mga pagbag-o basi makabalhin. (Lucas 14:28) Labot pa hito, kinahanglan nira mamiling hin mga paagi basi masuportaran an ira kalugaringon. Samtang nakadto ha England, hi Gwen nga gin-unabi na, nakiukoy anay ha iya Ate basi makatirok hin kwarta. Hira Sophia ngan Christopher nga taga-England liwat, nagsiring: “Ginbaligya namon an amon awto ngan an pipira nga muwebles. Naglalaom kami nga makaukoy ha Albania hin bisan man la usa ka tuig.” Maopay na la, nakapabilin hira hin mas maiha.

 An iba nga magwarali naukoy ha Albania hin pipira ka bulan, nauli ha ira nasud basi magtrabaho ngan magtirok hin kwarta, ngan katapos nabalik ha Albania. Sugad liwat hini an sitwasyon nira Eliseo ngan Miriam. Hi Eliseo nagsiring: “Hi Miriam tikang ha usa nga lugar ha Italy nga ginbibisita han mga turista salit masayon gud la makabiling hin temporaryo nga trabaho. Napakadto kami hito nga lugar ngan nagtatrabaho hin tulo ka bulan ha summer ngan katapos naukoy ha Albania ha nabibilin nga siyam ka bulan gamit an amon natirok nga kwarta. Ginbuhat namon ito ha sulod hin lima ka tuig.”

 Kon nakabalhin na, an mga need-greater kinahanglan magpahiuyon ha bag-o nga mga kahimtang, pero an sagdon ngan ehemplo han mga Saksi didto nakabulig ha ira nga malamposan an mga problema. Hi Sophia nga gin-unabi na, nagsiring: “Kon winter ha Albania, mas mahagkot ha mga balay kay ha akon nahiaraan ha amon nasud. Nahibaro ako hin iba nga pamado pinaagi ha pag-obserbar han pamado han mga sister didto.” An taga-Poland nga hi Grzegorz ngan an iya asawa nga hi Sona, binalhin ha maopay nga bungto han Prizren, ha Kosovo basi bumulig. b Hi Grzegorz nagsiring: “An mga magwarali didto mapainubsanon gud, buotan, ngan pasensyoso! Ginbubuligan kami nira nga mahibaro han yinaknan ngan ha damu pa. Pananglitan, gintutdoan kami nira kon diin an mga tindahan nga barato an paraliton, ngan ginsumatan nira kami kon paonan-o mamimerkado.”

 An mga binalhin ha iba nga nasud nagpapahimulos ha pagkaada duok nga kasangkayan ha mga Saksi didto ngan mahibaro mahitungod han ira gintikangan. Hi Sona nagsiring: “Nakita ko kon paonan-o an gugma ni Jehova nakakagbag-o han kinabuhi han mga tawo. Naparig-on han kabugtoan an akon pagtoo tungod kay nakita ko kon paonan-o an ira gintotoohan ngan an ira kinabuhi bug-os nga nagbag-o han nahibaro hira mahitungod kan Jehova. Ha kongregasyon, inaabat namon nga ginkikinahanglan kami ngan nakikita namon kon paonan-o kami makakabulig. Nag-aalagad kami kaupod han kabugtoan nga amon nagin kasangkayan.” (Marcos 10:29, 30) Hi Gloria nagsiring: “Damu nga sister an akon kilala nga nag-ilob hin madarahog nga pagkontra tikang ha mga tawo ha komunidad nga nadiri ha mga Saksi. Nakakadasig gud nga makita an ira gugma kan Jehova.”

 An mga need-greater may-ada liwat oportunidad nga mahibaro hin importante nga mga leksyon nga bangin diri nira mahibabaroan kon aadto la hira ha ira lugar. Pananglitan, nakita nira nga naghahatag hin kalipay an pagbuhat hin mga butang nga waray nira mahiarai basi mas damu an ira mahimo para kan Jehova. Hi Stefano nagsiring: “Ha amon lugar, kaurogan nga nagsasangyaw ako pinaagi han intercom, gamit an haglipot nga presentasyon. Pero an mga taga-Albania naruruyag makiistorya hin hilawig, labi na kon nagkakape. Tungod kay awdanon gud ako, ha siyahan naalo ako, ngan diri ako maaram kon ano an akon isisiring. Pero pagtikaiha, nahibaroan ko kon paonan-o magpapakita hin interes ha mga tawo, ngan yana nag-i-enjoy ako ha pakiistorya ha ira. Mas nagin makalilipay gud an akon pagsangyaw.”

 Hi Leah binalhin ngadto ha Albania tikang ha United States kaupod an iya asawa nga hi William. Hiya nagsiring: “An pag-alagad dinhi nagtutdo ha amon hin bag-o nga mga paagi ha panhunahuna ngan pagkinabuhi. Damu gud an amon nahibaroan parte ha pagin maabiabihon, pagrespeto, ngan pakigsangkay! Nahibaro kami hin bag-o nga mga paagi ha pagsangyaw, pangatadongan tikang ha Kasuratan, ngan pakig-istorya.” Hi William nagsiring: “Kadam-an han mga tawo nga nabisita ha Albania naruruyag gud ha mag-opay nga mga baybayon. Karuyag ko naman mag-hiking ha Albanian Alps. Pero an mga tawo dinhi an akon naruruyagan gud! Damu nga baryo ha amon teritoryo an pahapyaw la nga nasangyawan ha panahon han espesyal nga mga kampanya. Kon napakadto kami, danay duha la nga pamilya an amon nakakaistorya ha bug-os nga adlaw.”

 An daku nga kalipay hini nga mga need-greater amo an pagkarawat han mga tawo han maopay nga sumat. (1 Tesalonica 2:19, 20) Hi Laura, usa nga batan-on nga solo nga sister nga binalhin ha Albania, naghatag hin ehemplo: “Nag-alagad ako hin madaliay ha Fier. Ha sulod la hin duha ngan tunga ka tuig, may 120 nga bag-o nga nagin kwalipikado ha pagsangyaw! Ako an nagdumara han pag-aram han 16 ha ira!” An usa liwat nga sister nga hi Sandra, nagsiring: “Nagsangyaw ako ha usa nga babaye nga nagtatrabaho ha merkado. Nagin Saksi hiya ngan binalik ha iya lugar. An urhi ko nga balita, nakagtikang na hiya hin 15 nga Bible study!”

 An pipira nga need-greater nga binalhin ha Albania mga tuig na an naglabay, aadto la gihapon ngan nag-i-enjoy gud han ira pag-alagad. Naiimpres hira kon ira nakikita an mga tawo nga ira nasangyawan hadto ngan ha urhi kinarawat han kamatuoran. (Eclesiastes 11:6) Hi Christopher nga gin-unabi na, nagsiring: “Dumaop ako ha usa nga lalaki nga nagin Bible study ko hadto han siyahan ko nga pagbalhin ha Albania. Nalipay ako han detalyado nga nahinumdoman niya an amon nauna nga mga pag-istorya parte ha Biblia. Yana, hiya ngan an iya asawa bawtismado na nga mga alagad ni Jehova.” Hi Federica nga gin-unabi na, nagsiring: “Ha usa nga kongregasyon, usa nga sister an dumaop ha akon ngan nagpakiana kon nahinunumdoman ko hiya. Siring niya nga nasangyawan ko hiya siyam ka tuig na an naglabay. Katapos ko bumalhin ha iba nga bungto, nagpapa-Bible study na hiya ngan nag-uswag ha pagpabawtismo. Ginhihinunahuna ko hadto nga an amon mga nauna nga tuig ha Albania waray gud magbunga. Sayop ako!”

 An kabugtoan nga binalhin ha Albania o Kosovo mapasalamaton nga ginbendisyonan ni Jehova an ira mga pangalimbasog ngan gintagan hira hin makalilipay nga kinabuhi. Katapos hin damu nga katuigan ha Albania, hi Eliseo nagsiring parte ha iya eksperyensya: “Sugad nga mga tawo, masayon la kita malimbongan nga hunahunaon nga magkakaada kasigurohan an aton kinabuhi kon susundon naton an panhunahuna han kalibotan parte ha pagkaada kasigurohan. Pero ilusyon ito. Ha luyo nga bahin, an mga prinsipyo ni Jehova naghahatag ha aton hin katuyoan ngan kasigurohan. An akon pag-alagad sugad nga need-greater nakakabulig ha akon nga mahinumdoman ito. Inaabat ko nga may pulos ako ngan importante. Napapalibotan ako hin totoo nga kasangkayan nga papriho an amon mga tumong.” Hi Sandra nagsiring: “Han binalhin ako ha lugar nga mas daku an panginahanglan, inabat ko nga gintagan ako ni Jehova hin oportunidad nga matuman an maiha ko na nga ginhihingyap—an magin misyonero. Waray gud ako magbasol nga binalhin ako ha Albania. Mas nagin malipayon gud ako.”