An mga Saksi ni Jehova diri nagsiselebrar hin birthday kay natoo kami nga ini nga selebrasyon diri nakakapalipay ha Dios. Bisan kon waray direkta nga igdiri han Biblia an pagselebrar hin birthday, nabulig ito ha aton nga masabtan kon ano an panhunahuna han Dios mahitungod hini nga selebrasyon. Kitaon naton kon ano an ginsisiring han Biblia.

1.   An pagselebrar hin birthday may pagano nga gintikangan. Sumala ha Funk & Wagnalls Standard Dictionary of Folklore, Mythology, and Legend, ini nga selebrasyon nagtikang ha patootoo nga ha birthday han usa nga tawo, “mahimo atakehon han maraot nga mga espiritu ngan iba nga pwersa an nagbi-birthday” ngan “an presensya han kasangkayan ngan an mag-opay nga mensahe nakakahatag hin proteksyon ha nagbi-birthday.” An libro nga The Lore of Birthdays nasiring nga ha kadaan nga panahon, an rekord han mga adlaw nga natawhan “ginkikinahanglan basi matagan ka hin horoscope” nga iginbasar ha “mistiko nga syensya han astrolohiya.” Ini nga libro nagsiring pa nga an “mga kandila ha birthday, uyon ha patootoo, may-ada espesyal nga madyik nga maghahatag han imo gin-aaro.”

    Kondi ginkukondenar han Biblia an paggamit hin madyik, panigo, espiritismo, o “bisan ano nga pariho hito.” (Deuteronomio 18:14; Galacia 5:19-21) Ngani, an usa nga rason kon kay ano nga ginkondenar han Dios an kadaan nga syudad han Babilonya tungod kay an mga umurukoy hito nakikigbahin ha astrolohiya, nga usa nga klase hin panigo. (Isaias 47:11-15) Diri gin-uusisa han mga Saksi ni Jehova an gintikangan han tagsa nga kustomre; pero kon may matin-aw nga instruksyon an Kasuratan parte hito, diri namon ito ginbabalewaray.

2.   An siyahan nga mga Kristiano diri nagsiselebrar hin birthday. An The World Book Encyclopedia nasiring nga “para ha ira, pagano nga kustomre an pagselebrar han katawo han bisan hin-o.” Iginpapakita han Biblia nga an mga apostol ngan an iba pa nga direkta nga natutdoan ni Jesus mga ehemplo nga angay subaron han ngatanan nga Kristiano.—2 Tesalonica 3:6.

3.   An selebrasyon la nga iginpapabuhat ha mga Kristiano amo an paghinumdom han kamatayon ni Jesus. (Lucas 22:17-20) Diri kita angay mahipausa hini, kay an Biblia nasiring nga “an adlaw han kamatay mas maopay kay han adlaw han katawo.” (Eclesiastes 7:1) Han namatay hi Jesus ha tuna, nakahimo na hiya hin maopay nga ngaran ha Dios, tungod hito an adlaw han iya kamatayon mas importante kay ha adlaw han iya katawo.—Hebreo 1:4.

4.   An Biblia waray gud mag-unabi hin surugoon han Dios nga nagselebrar hin birthday. Diri ito kay nalikatan la, tungod kay an Biblia may rekord hin duha ka tawo nga diri nag-aalagad ha Dios nga nagselebrar hin birthday. Pero pariho may nahitabo nga diri maopay hiton duha nga selebrasyon.—Genesis 40:20-22; Marcos 6:21-29.

 Pariho han ngatanan nga maopay nga kag-anak, iginpapaabat han mga Saksi an ira gugma ha ira mga anak ha bug-os nga tuig, upod hito an paghatag ha ira hin mga regalo ngan pagkaada makalilipay nga turotarampo. Ginpapaningkamotan nira nga sundon an perpekto nga susbaranan han Dios, nga pirme naghahatag hin mag-opay nga butang ha iya mga anak. (Mateo 7:11) Diri inaabat han mga anak han mga Saksi nga may kulang ha ira, sugad han iginpapakita hini nga mga komento:

•   “Mas makalilipay makakarawat hin regalo kon diri mo ito ginlalaoman.”—Tammy, 12 anyos.

•   “Bisan kon diri ako nakakakarawat hin mga regalo ha akon birthday, ginpapalitan la gihapon ako hin regalo han akon mga kag-anak ha iba nga okasyon. Mas karuyag ko ito kay nasusurprisa ako.”—Gregory, 11 anyos.

•   “Matatawag mo ba nga parti an 10 minutes, pipira nga cupcake, ngan kanta? Pakadto ha balay para makita mo kon ano an tinuod nga parti!”—Eric, 6 anyos.