Ano an Panhunahuna han mga Saksi ni Jehova ha Diborsyo?

I-PLAY

Ginsusunod namon an panhunahuna han Biblia parte ha pag-asawa ngan pagdiborsyo. Katuyoan han Dios nga an pag-asawa magin permanente nga pag-upod hin lalaki ngan babaye. An Kasuratanhon nga basihan la para ha pagdiborsyo amo an seksuwal nga imoralidad.—Mateo 19:5, 6, 9.

Ginbubuligan ba han mga Saksi an magpadis nga may problema ha ira pag-asawa?

Oo, ha damu nga paagi:

Publikasyon. An amon mga publikasyon regular nga nag-uunabi hin mga impormasyon nga nakakaparig-on ha pag-asawa, bisan adton baga hin waray na paglaom an ira relasyon. Pananglitan, kitaa an mga artikulo nga “Manatiling Tapat sa Inyong Sumpaan Bilang Mag-asawa,” “Kung Paano Magpapatawad,” ngan “Kung Paano Maibabalik ang Tiwala.”
Katirok. Ginhihisgotan namon an praktikal nga mga sagdon han Biblia parte ha pag-asawa ha amon mga katirok ha kongregasyon, asembleya, ngan kombensyon.
Tigurang. An mga tigurang ha kongregasyon personal nga nabulig ha mga mag-asawa, nga gin-gagamit an mga teksto sugad han Efeso 5:22-25.

Kinahanglan ba aprobaran han mga tigurang ha kongregasyon an pakigdiborsyo han usa nga Saksi?

Diri. Bisan kon an mga tigurang ginhahangyo nga buligan an magpadis ha ira problema ha pag-asawa, waray hira katungod ha pagsiring kon ano an dapat buhaton han magpadis. (Galacia 6:5) Pero, an usa nga nagdesisyon nga makigdiborsyo nga waray Kasuratanhon nga mga basihan waray kagawasan nga mag-asawa utro sumala ha Kasuratan.—1 Timoteo 3:1, 5, 12.

Ano an panhunahuna han mga Saksi ha pagbulag?

Gindadasig han Biblia an mga mag-asawa nga magpabilin nga magkaupod bisan ha diri mag-opay nga kahimtang. (1 Corinto 7:10-16) Damu nga problema an masusulbad pinaagi ha sinsero nga pag-ampo, pag-aplikar han mga prinsipyo ha Biblia, ngan pagpakita hin gugma.—1 Corinto 13:4-8; Galacia 5:22.

Kondi an pipira nga Kristiano nagdesisyon nga makigbulag ha ira padis tungod han masunod nga grabe nga mga sitwasyon:

Tinuyo nga diri pagsuporta.—1 Timoteo 5:8.
Grabe nga pag-abuso ha pisikal.—Salmo 11:5.
Pameligro gud ha espirituwalidad. Pananglitan, bangin pwersahon an usa nga Saksi han iya padis nga talapason an mga sugo han Dios, ngan bangin magdesisyon hiya nga makigbulag tungod kay ito na la an paagi basi “sugton . . . an Dios sugad nga magmarando imbes nga an mga tawo.”—Buhat 5:29.