Diri, tungod kay an pagsingba ha Dios usa nga personal nga desisyon. (Roma 14:12) Gintututdoan han mga Saksi ni Jehova an ira mga anak han mga prinsipyo ha Biblia, pero kon dumaku na an ira mga anak, an mga anak na an magdidesisyon kon karuyag nira magin usa han mga Saksi ni Jehova.—Roma 12:2; Galacia 6:5.

 Pariho ha kadam-an nga kag-anak, karuyag han mga Saksi ni Jehova an pinakamaopay para ha ira mga anak. Gintututdoan nira an ira mga anak han mga butang nga makakabulig ha ira, sugad han praktikal nga mga skill, mga prinsipyo ha moral, ngan mga gintotoohan ha relihiyon. An mga Saksi ni Jehova natoo nga an Biblia nagtututdo han pinakamaopay nga paagi han pagkinabuhi, salit nangangalimbasog hira nga itutdo ha ira mga anak an mga prinsipyo hito pinaagi hin pag-aram han Biblia kaupod nira ngan urosa nga pag-atender ha Kristiano nga mga katirok. (Deuteronomio 6:6, 7) Kon dumaku na an mga anak, hira an maghihimo hin desisyon kon susundon nira an gintotoohan han ira mga kag-anak.

•  Ginbabawtismohan ba han mga Saksi ni Jehova an gudtiay pa nga mga bata?

•  Ginsasalikway ba han mga Saksi ni Jehova an ira mga anak nga nadiri magpabawtismo?

•  Kay ano nga gin-uupod han mga Saksi ni Jehova an ira mga anak ha pagsangyaw?

•  Nagsiselebrar ba an mga Saksi ni Jehova hin mga kapiyestahan o iba pa nga selebrasyon?

•  Ano an masisiring han pipira nga ginpadaku ha Saksi nga pamilya?

 Diri. Waray itutdo ha Biblia an pagbawtismo ha gudtiay pa nga mga bata. Pananglitan, ginpapakita hito nga antes mabawtismohan an siyahan-siglo nga mga Kristiano, nabatian nira an mensahe, “malipayon nga nagkarawat” hito, ngan nagbasol. (Buhat 2:14, 22, 38, 41) Salit basi mabawtismohan an usa, kinahanglan aada na hiya ha sakto nga edad basi maintindihan an igintututdo han Biblia, toohan ito, ngan magdesisyon nga magkinabuhi uyon ha mga igintututdo hito. Diri ini mabubuhat han gudtiay pa nga mga bata.

 Samtang nagdadaku an mga bata, bangin umabot an panahon nga magdesisyon hira nga magpabawtismo. Pero basi mabuhat ito, kinahanglan masabtan nira kon ano kaseryoso ito nga desisyon.

 Diri. Bisan kon an Saksi nga mga kag-anak nasusubo kon an ira anak diri natoo han ira gintotoohan, hinigugma la gihapon nira an ira anak ngan diri gin-uutod an ira relasyon ha iya tungod la kay nadiri hiya nga magin Saksi.

 Gin-uupod namon an amon mga anak ha amon pagsangyaw nga buruhaton tungod han damu nga rason. a

•   Ginsasagdonan han Biblia an mga kag-anak nga tutdoan an ira mga anak parte ha Dios ngan buligan hira nga singbahon hiya. (Efeso 6:4) Tungod kay an pagsingba nag-uupod ha pagpahayag hin pagtoo ha publiko, an pagsangyaw usa nga importante nga bahin ha pagtutdo ha anak parte ha Dios.—Roma 10:9, 10; Hebreo 13:15.

•   An Biblia espisipiko nga nagdadasig ha mga batan-on nga “pagdayawon nira an ngaran ni Jehova.” (Salmo 148:12, 13, An Baraan nga Kasuratan) An usa nga importante nga paagi ha pagdayaw ha Dios amo an pag-istorya ha iba parte ha iya. b

•   An mga anak nagpapahimulos ha praktikal nga paagi pinaagi ha pagsangyaw kaupod an ira mga kag-anak. Pananglitan, nahibabaro hira nga makiistorya ha ngatanan nga klase hin tawo, ngan nagkakaada hira han importante nga mga kalidad sugad han pagpaid, pagkabuotan, respeto, ngan pagin diri makikalugaringon. Mas nagigin pamilyar liwat hira ha mga Kasuratanhon nga basihan han ira gintotoohan.

 An mga Saksi ni Jehova diri naapi ha mga relihiyoso nga kapiyestahan o iba pa nga mga selebrasyon nga diri gin-uuyonan han Dios. c (2 Corinto 6:14-17; Efeso 5:10) Pananglitan, diri kami nagsiselebrar hin birthday o Pasko, mga selebrasyon nga diri tikang ha mga Kristiano.

 Bisan pa hito, nag-i-enjoy kami nga makaupod an amon pamilya ngan malipayon nga naghahatag ha amon mga anak. Imbes nga kalendaryo an magbuot han amon reunion sugad nga pamilya ngan ha paghatag hin regalo, nagtuturotarampo kami ngan diri naghuhulat hin espisipiko nga petsa basi maghatag hin mga regalo.