Diri. An mga Saksi ni Jehova diri nakontra ha pagpabakuna. Personal nga desisyon han tagsa nga Kristiano an pagpabakuna. Damu ha mga Saksi ni Jehova an nagdidesisyon nga magpabakuna.

 Karuyag namon an maopay nga paagi ha pagtambal ngan ginpapabilhan namon an pag-uswag ha syensya basi malikyan an grabe nga mga sakit. Gin-aapresyar namon an pangalimbasog han mga propesyonal ha medisina, labi na ha panahon han krisis.

 Ginsusunod han mga Saksi ni Jehova an mga public health official. Pananglitan, han nagtikang an COVID-19 nga pandemya, an mga Saksi ni Jehova padayon nga nagpublikar hin mga pahinumdom hini nga website ha ginatos ka yinaknan, nga gin-aaghat an mga tawo nga sundon an mga safety protocol ha ira lugar. Nag-uupod ini han physical distancing ngan pagsunod ha mga regulasyon bahin ha pagturotarampo, pag-quarantine, paghunaw, ngan pagsul-ot hin face mask ngan face shield ngan iba pa nga ginpapatuman o ginrirekomendar han mga awtoridad.—Roma 13:1, 2.

 Ha sulod hin damu ka tuig na, ginpapabug-atan han mga publikasyon han mga Saksi ni Jehova an masunod nga mga prinsipyo:

•   An pagpatambal usa nga personal nga desisyon.—Galacia 6:5.

   “[Ini nga magasin] diri nagrirekomenda nga an bisan ano nga medisina o therapy mas maopay kay ha iba ngan diri ini naghahatag hin sagdon ha pagtambal. An katuyoan hini amo an paghatag la hin tinuod nga mga impormasyon ngan aada na ha mga magbarasa an paghimo hin desisyon.”—Awake!, Pebrero 8, 1987.

   “Personal nga desisyon kon mapabakuna ka ngan an imo mga anak.”—Awake!, Agosto 22, 1965.

•   Nagpapatambal kami tungod kay ginpapabilhan gud namon an kinabuhi.—Buhat 17:28.

   “An mga Saksi nakadto ha mga propesyonal ha medisina basi magpatambal. Karuyag nira mabuhi ngan ginbubuhat nira an bisan ano nga makatadunganon ngan Kasuratanhon nga paagi basi mapahilawig an kinabuhi.”—An Barantayan, Hulyo 1, 1975.

   “An mga Saksi ni Jehova nakarawat hin medisina ngan mga paagi ha pagtambal. Karuyag nira magpabilin nga mahimsog ngan mapahilawig an ira kinabuhi. Ngani, pariho han Kristiano ha siyahan nga siglo nga hi Lucas, an iba han mga Saksi ni Jehova mga doktor. . . . Gin-aapresyar gud han mga Saksi ni Jehova an pangalimbasog han mga doktor. Mapasalamaton liwat hira nga nag-oopay hira tungod hini nga mga indibiduwal.”—Ang Bantayan, Pebrero 1, 2011.