An mga Saksi ni Jehova naggamit hin iba-iba nga mga hubad ha ira pag-aram ha Biblia. Pero mas karuyag namon gamiton an Bag-o nga Kalibotan nga Hubad han Baraan nga Kasuratan ha linggwahe nga may-ada ito tungod ha paggamit hito han ngaran han Dios, ha pagin husto, ngan masayon masabtan.

•   Paggamit han ngaran han Dios. An pipira nga nagpublikar han Biblia waray magpasidungog ha Awtor hito. Pananglitan, usa nga hubad hin Biblia an may nakalista nga mga ngaran han sobra 70 ka tawo nga nakabulig ha paghimo hito. Pero hito liwat nga Biblia, gintanggal an ngaran ni Jehova nga Dios nga amo an Awtor hito!

   Ha kabaliktaran, ginbalik han Bag-o nga Kalibotan nga Hubad an ngaran han Dios ha yinukot nga teksto diin ito orihinal nga makikita, pero an komite nga naghubad hini nga Biblia waray magpakilala.

•   Pagin husto. Diri ngatanan nga hubad husto nga nagsusumat han orihinal nga mensahe han Biblia. Pananglitan, ha usa nga Biblia, ini an pagkahubad han Mateo 7:13: “Sulod kamo han haligot nga aragian; kay haluag an aragian ngan masayon an dalan tipakadto ha impyerno.” Pero ha orihinal nga teksto, gin-gamit an pulong nga “kabungkagan,” diri “impyerno.” Bangin ginbutang han mga parahubad an pulong nga “impyerno” tungod kay natoo hira nga an magraot ginpapasakitan ha waray kataposan ha naglalaga nga impyerno. Pero ito nga ideya waray itutdo ha Biblia. Salit, ha Bag-o nga Kalibotan nga Hubad husto nga mababasa ini: “Sulod kamo pinaagi ha haligot nga ganghaan, kay haluag an ganghaan ngan hilapad an dalan tipakadto ha kabungkagan.”

•   Masayon masabtan. An maopay nga hubad diri la dapat husto, kondi klaro liwat ngan masayon masabtan. Pansina ini nga ehemplo. Ha Roma 12:11, gin-gamit han Kristiano nga hi apostol Pablo an mga pulong nga literal nga nangangahulogan nga “ha pagkaladkad han espiritu.” Tungod kay ini nga mga pulong makuri masabtan ha moderno nga Ingles, iginhubad han Bag-o nga Kalibotan nga Hubad ini nga teksto ha paagi nga masayon masabtan. Nagsiring ito nga an mga Kristiano dapat magin “madasigon gud . . . pinaagi han espiritu.”

 Labot la ha paggamit hito han ngaran han Dios, pagin husto, ngan masayon masabtan, an Bag-o nga Kalibotan nga Hubad naiiba liwat tungod kay ginpapanaltag ito nga waray bayad. Sugad nga resulta, minilyon an nakakabasa han Biblia ha ira kalugaringon nga yinaknan—bisan adton diri kaya makapalit hin Biblia.