Kasagaran nga simple ngan may dignidad an seremonya han kasal han mga Saksi ni Jehova ngan may halipot nga pahayag ito nga basado ha Biblia. Puydi sundan an seremonya hin pagturotarampo o resepsyon, nga bangin may pangaon. a Umatender hi Jesus ha sugad nga pagturotarampo ha syudad han Cana ha tinikangan han iya ministeryo.—Juan 2:1-11.

•  Ano an nahitatabo ha seremonya han kasal?

•  Diin ginkakasal an mga Saksi ni Jehova?

•  Hin-o an puydi umatender?

•  Ano an dapat isul-ot han mga maatender?

•  Puydi ba magregalo?

•  Puydi ba mag-toast ha resepsyon han kasal?

•  Puydi ba magsabrag hin bugas o confetti?

•  May-ada ba pagkaon ngan irimnon?

•  May-ada ba musika o sarayaw?

•  Nagsiselebrar ba an mga Saksi ni Jehova hin anibersaryo han kasal?

 An nangunguna nga bahin amo an pahayag nga mga 30 minutos an kaihaon ngan ginpipresenta han usa nga ministro han mga Saksi ni Jehova. Ginpapabug-atan hito nga makapadasig ngan makaparig-on nga pahayag kon paonan-o an Biblia makakabulig ha magpadis nga magkaada marig-on ngan malipayon nga pag-asawa ngan magpakita hin gugma ha usa kag usa.—Efeso 5:33.

 Ha damu nga nasud, gintatagan han gobyerno hin awtoridad an mga ministro han mga Saksi ni Jehova nga magkasal. Kon sugad an kahimtang, ha kataposan han pahayag, an magpadis magsasaad ha usa kag usa. Puydi liwat hira magsul-otay hin singsing. Katapos, ipapahibaro han ministro nga mag-asawa na hira.

 Ha iba nga nasud, gin-oobligar han balaud nga usa nga opisyal han gobyerno an magkasal ha magpadis. Ha sugad nga kahimtang, hihimoon nira ini antes han pahayag ha kasal. Kon an karaslon waray pa maghimo hin saad ha usa kag usa han ginkasal hira han opisyal han gobyerno, puydi nira ito buhaton ha kataposan han pahayag. Pero kon naghimo na hira hin saad ha usa kag usa, puydi nira ito buhaton utro, pero magamit hin mga pulong nga nagpapakita nga ginhimo na nira ito. An pahayag tatapuson pinaagi hin pag-ampo nga naghahangyo ha Dios nga bendisyonan an bag-o nga ginkasal.

 Ginpipili han damu nga Saksi nga igkasal hira ha Kingdom Hall kon waray iba nga nagamit hito. b Kon an magpadis may resepsyon katapos han ira kasal, magpipili hira hin iba nga lokasyon para hito.

 Kon an kasal hihimoon ha usa nga Kingdom Hall, kasagaran nga puydi umatender an bisan hin-o—Saksi man o diri. Kon an magpadis may-ada resepsyon, pipilion nira kon hin-o an ira iimbitaron.

 Bisan kon waray espisipiko nga pamado nga gin-oobligar ha mga kasal ha Kingdom Hall, nangangalimbasog an mga Saksi ni Jehova nga sundon an giya han Biblia nga mamado hin desente ngan nagpapakita hin respeto. Gin-aapresyar nira kon ginbubuhat liwat ito han iba. (1 Timoteo 2:9) Syempre, ito gihap nga prinsipyo an naaaplikar kon may resepsyon.

 Gin-aaghat kita han Biblia nga magin mahinatagon. (Salmo 37:21) Nalilipay an mga Saksi ni Jehova nga maghatag ngan kumarawat hin mga regalo ha kasal. (Lucas 6:38) Pero, diri nangangaro hin regalo an mga Saksi o ginpapahibaro ha publiko an mga ngaran han nagregalo. (Mateo 6:3, 4; 2 Corinto 9:7; 1 Pedro 3:8) Labot la nga diri ito igintututdo han Biblia, an pagbuhat hito mahimo magresulta nga umabat hin kaarawdan an mga naatender.

 Diri. An mga Saksi ni Jehova diri nagtu-toast, tungod kay ito nga buhat nagtikang ha kustomre han buwa nga pagsingba. c Ginpapahayag han mga Saksi an ira kalipay ha bag-o nga ginkasal ha iba nga paagi.

 Diri. Ha pipira nga lugar, an mga tawo nagsasabrag hin bugas, confetti, o puropariho hini ha bag-o nga ginkasal. Natoo hira nga maghahatag ito hin swerte, kalipay, ngan hilawig nga kinabuhi ha bag-o nga ginkasal. Pero ginlilikyan han mga Saksi ni Jehova an mga buhat nga konektado ha mga patootoo. Nag-uupod ini hin paghingyap hin swerte nga nakontra ha mga prinsipyo ha Biblia.—Isaias 65:11.

 Waray pagkaon o irimnon ha kasal ha Kingdom Hall. An iba nga magpadis nagdidesisyon nga magkaada resepsyon katapos han ira kasal diin may pangaon o isnak. (Eclesiastes 9:7) Kon magserbi hira hin de-alkohol nga irimnon, kinahanglan siguruhon nira nga sakto la an kadamu hito ngan para la ito ha may husto nga edad ha pag-inom.—Lucas 21:34; Roma 13:1, 13.

 Kon may resepsyon, puydi magdesisyon an magpadis nga magkaada hin musika ngan sarayaw. (Eclesiastes 3:4) Puydi nira pilion an musika nga ira naruruyagan, pero kinahanglan nira siguruhon nga maopay ito pamation han iba ngan uyon ha kultura. An kasal ha Kingdom Hall kasagaran nga may musika nga basado ha kasuratan.

 Tungod kay waray ginsisiring an Biblia parte ha anibersaryo han kasal, an magpadis nga Saksi an magdidesisyon kon magsiselebrar hira han ira anibersaryo o diri. Kon magdesisyon hira nga magselebrar, puydi nira ito buhaton nga hira la nga duha o kaupod an ira kasangkayan ngan pamilya.