•  Paonan-o nahibabaroan han mga Saksi ni Jehova kon an usa nga kapiyestahan ginkakarawat han Dios?

•  Bisan kon an mga Saksi ni Jehova diri nagsiselebrar hin pipira nga kapiyestahan, hinigugma la ba gihap nira an ira pamilya?

•  Ginsisidngan ba han mga Saksi ni Jehova an iba nga diri magselebrar hin pipira nga kapiyestahan?

 Gin-uusisa anay han mga Saksi ni Jehova an Biblia antes magdesisyon kon magsiselebrar hin usa nga kapiyestahan. An pipira nga kapiyestahan ngan selebrasyon klaro nga nakontra ha mga prinsipyo ha Biblia. Kon ito an kahimtang, diri nakikigbahin an mga Saksi ni Jehova. May kalabotan ha iba nga mga kapiyestahan, an tagsa nga Saksi an nagdidesisyon, nga nangangalimbasog nga “magkaada limpyo nga konsensya ha atubangan han Dios ngan han mga tawo.”—Buhat 24:16.

 Ini an pipira nga iginpapakiana han mga Saksi ni Jehova ha ira kalugaringon antes magdesisyon kon magsiselebrar hin usa nga kapiyestahan. a

•   An kapiyestahan ba iginbase ha usa nga katutdoan nga diri uyon ha Kasuratan?

   Prinsipyo ha Biblia: “‘Gawas kamo tikang ha ira, ngan bulag kamo,’ nasiring hi Jehova, ‘ngan ayaw na kamo kapot han mahugaw nga butang.’”—2 Corinto 6:15-17.

   Basi bug-os nga bumulag ha mga katutdoan nga mahugaw, karuyag sidngon, nakontra ha ginsisiring han Biblia, an mga Saksi ni Jehova diri nagsiselebrar hin mga kapiyestahan nga nag-uupod han masunod.

   Mga kapiyestahan nga iginbase ha pagtoo o pagsingba ha iba nga mga dios. Hi Jesus nagsiring: “Hi Jehova nga imo Dios an kinahanglan mo singbahon, ngan hiya gud la an kinahanglan mo tagan hin sagrado nga pag-alagad.” (Mateo 4:10) Ha pagsunod hito nga sagdon, an mga Saksi ni Jehova diri nagsiselebrar han Pasko, Easter, o May Day, kay ini nga mga kapiyestahan iginbase ha pagsingba ha iba nga mga dios imbes kan Jehova. Dugang pa, diri hira naapi pagselebrar ha mga kapiyestahan sugad han masunod.

  •  Kwanzaa. An ngaran nga Kwanzaa “tikang ha Swahili nga mga pulong nga matunda ya kwanza, nga nangangahulogan nga ‘siyahan nga mga bunga’ ngan iginpapakita [hini] nga ini nga kapiyestahan iginbase ha siyahan nga mga selebrasyon han pangani nga nakarekord ha kasaysayan han Africa.” (Encyclopedia of Black Studies) Bisan kon para ha iba, an Kwanzaa usa nga selebrasyon nga diri konektado ha relihiyon, iginpariho ito han Encyclopedia of African Religion ha usa nga piyesta ha Africa diin an siyahan nga mga bunga “iginhahalad ha mga dios ngan ha mga kaapoy-apoyan sugad nga paagi han pagpasalamat ha ira,” ngan ito nagdugang: “An Kwanzaa, nga usa nga selebrasyon han mga taga-Africa ngan taga-America iginbasar dida hito.”

  •  Mid-Autumn Festival. Usa ini nga “piyesta ha pagpasidungog ha diosa han bulan.” (Holidays, Festivals, and Celebrations of the World Dictionary) Nag-uupod ini hin rituwal diin “an mga babaye ha panimalay nayukbo, nga ha Chinese gintatawag nga kowtow, ha atubangan han diosa.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Ini nga piyesta nagtikang ha relihiyon nga Zoroastrianism ngan usa han pinakabaraan nga mga adlaw ha kadaan nga Zoroastrian nga kalendaryo. . . . An Espiritu han Udto, nga gintatawag nga [Rapithwin], nga ginhunahuna nga ginpwersa han Espiritu han Kathagkot nga magpailarom ha tuna ha panahon han mahagkot nga mga bulan, gin-abiabi utro pinaagi hin mga selebrasyon durante han udto ha adlaw han Nowruz uyon ha Zoroastrian nga tradisyon.”—United Nations Educational, Scientific and Cultural Organization.

  •  Shab-e Yalda. Ini nga selebrasyon han winter solstice “konektado gud ha pagsingba kan Mithra,” an dios han kalamrag, sumala ha libro nga Sufism in the Secret History of Persia. Ginhuhunahuna liwat nga ini nga kapiyestahan bangin konektado ha pagsingba ha mga dios han adlaw han mga Romano ngan Griego. b

  •  Thanksgiving. Pariho ha Kwanzaa, ini nga kapiyestahan iginbase ha kadaan nga mga selebrasyon ha pangani nga nagpapasidungog ha iba-iba nga dios. Paglabay han panahon, “ini nga kadaan nga tradisyon han mga tawo ginkarawat han Kristiano nga mga relihiyon.”—A Great and Godly Adventure—The Pilgrims and the Myth of the First Thanksgiving.

   Mga kapiyestahan nga iginbase ha mga patootoo o ha pagtoo ha swerte. An Biblia nasiring nga ‘kaupod hadton nabaya kan Jehova’ an mga “nag-aandam hin lamesa para ha dios han Swerte.” (Isaias 65:11) Salit diri ginsiselebrar han mga Saksi ni Jehova an masunod nga mga kapiyestahan:

  •  Ivan Kupala. “An mga tawo nasiring nga ha adlaw han [Ivan Kupala], an palibot nagpapagawas hin damu nga pwersa han madyik, nga puydi makuha kon maisugon ka ngan maswerte,” siring han libro nga The A to Z of Belarus. Ha tinikangan, usa ini nga pagano nga kapiyestahan diin ginsiselebrar an summer solstice. Pero sumala ha Encyclopedia of Contemporary Russian Culture, “iginsalakot ito ha kapiyestahan han Singbahan [an “adlaw han santo” nga hi Juan Bawtista] katapos karawaton han mga pagano an Kristianidad.”

  •  Lunar New Year (Chinese New Year o Korean New Year). “Hini nga panahon han tuig, an pinakaimportante ha pamilya, magsarangkay, ngan magpararyente amo an pagsiguro nga magin swerte, pagpasidungog ha mga dios ngan espiritu, ngan pagkaada maopay nga kinabuhi ha maabot nga tuig.” (Mooncakes and Hungry Ghosts—Festivals of China) Ha pariho nga paagi, an Korean New Year “nag-uupod hin pagsingba ha mga kaapoy-apoyan, mga rituwal basi paiwason an magraot nga espiritu ngan siguruhon nga magin swerte ha Bag-o nga Tuig, ngan pagtigo kon ano an mahitatabo ha Bag-o nga Tuig.”—Encyclopedia of New Year’s Holidays Worldwide.

   Mga kapiyestahan nga iginbase ha ideya nga an kalag diri namamatay. Matin-aw nga iginsusumat han Biblia nga an kalag namamatay. (Ezekiel 18:4) Salit an mga Saksi ni Jehova diri nagsiselebrar han masunod nga mga kapiyestahan, nga nag-aaghat hin pagtoo nga an kalag diri namamatay:

  •  Piyesta han mga Patay (Adlaw han mga Patay). Adlaw ini ha “paghinumdom han tanan nga matinumanon nga nagkamatay,” sumala ha New Catholic Encyclopedia. “Tikang han mga 500 C.E. tubtob han mga 1500 C.E, damu nga tawo an natoo nga an mga kalag ha purgatoryo mahimo magpakita hini nga adlaw sugad nga multo, aswang, pakla, ngan iba pa, ha mga tawo nga maraot an pagtratar ha ira han buhi pa hira.”

  •  Qingming Festival (Ch’ing Ming) ngan Hungry Ghost Festival. Ini nga duha nga piyesta ginsasaurog ha pagpasidungog ha mga kaapoy-apoyan. Ha panahon han Ch’ing Ming, siring han libro nga Celebrating Life Customs Around the World—From Baby Showers to Funerals, “nagsusunog hin pagkaon, irimnon, ngan papel nga kwarta basi masiguro nga an mga patay diri gugutumon o uuhawon ngan diri mauubosan hin kwarta.” An libro nasiring liwat nga “ha panahon han Hungry Ghost Month, labi na ha gab-i han kadayaw, [an mga nagsiselebrar natoo nga] mas makusog an koneksyon han mga patay ngan mga buhi kay ha iba nga mga gab-i, salit kinahanglan himoon an tanan basi pakalmahon an mga patay ngan pasidunggan an mga kaapoy-apoyan.”

  •  Chuseok. Ini nga piyesta, siring han The Korean Tradition of Religion, Society, and Ethics, nag-uupod han “paghalad hin pagkaon ngan bino ha kalag han mga patay.” Ito nga mga halad iginbase ha “pagtoo nga an kalag padayon nga nabubuhi katapos mamatay an lawas.”

   Mga kapiyestahan nga konektado ha espiritismo. An Biblia nasiring: “Bisan hin-o nga nagbubuhat hin panigo, bisan hin-o nga nagbubuhat hin madyik, bisan hin-o nga namimiling hin mga tigaman, barangan, bisan hin-o nga paralumay, bisan hin-o nga nakonsulta hin espiritista o hin parapanigo, o bisan hin-o nga napakiana ha patay . . . mangil-ad kan Jehova.” (Deuteronomio 18:10-12) Basi makalikay ha bisan ano nga espiritismo—upod na an astrolohiya (usa nga klase hin panigo)—an mga Saksi ni Jehova diri nagsiselebrar han Halloween o han masunod nga mga kapiyestahan:

  •  Sinhala ngan Tamil New Year. “An tradisyonal nga mga rituwal nga konektado hini nga selebrasyon . . . nag-uupod han paghimo hin pipira nga buruhaton ha espisipiko nga mga panahon nga para ha mga astrologo magdadara hin swerte.”—Encyclopedia of Sri Lanka.

  •  Songkran. An ngaran hini nga piyesta nga ginsasaurog ha Asia “ginkuha tikang ha Sanskrit nga pulong . . . nga nangangahulogan hin ‘pagkiwa’ o ‘pagbag-o,’ ngan [an piyesta] tigaman nga an adlaw nagtitipakadto ha Aries nga konstelasyon han zodiac.”—Food, Feasts, and Faith—An Encyclopedia of Food Culture in World Religions.

   Mga selebrasyon nga konektado ha pagsingba ilarom han Mosaiko nga Balaud, nga natapos pinaagi han halad ni Jesus. An Biblia nasiring: “Ha Kristo natapos an Balaud.” (Roma 10:4) Mapulsanon la gihapon ha mga Kristiano an mga prinsipyo han Mosaiko nga Balaud nga iginhatag ha kadaan nga Israel. Kondi diri nira ginsiselebrar an mga piyesta hito, labi na an may kalabotan ha pag-abot han Mesias, nga gintotoohan han mga Kristiano nga inabot na. “Ito nga mga butang lambong han tiarabot nga mga butang,” siring han Biblia, “pero an reyalidad kanan Kristo.” (Colosas 2:17) Tungod hini, ngan tungod kay an pipira nga piyesta ginsalaktan hin mga kustomre nga diri uyon ha Kasuratan, an masunod upod han mga piyesta nga diri ginsiselebrar han mga Saksi ni Jehova:

  •  Hanukkah. Piyesta ini han paghinumdom han pagdedikar utro han templo han mga Judio ha Jerusalem. Kondi an Biblia nasiring nga hi Jesus nagin Hitaas nga Saserdote han “mas importante ngan mas perpekto nga tolda [o, templo] nga diri hinimo han mga kamot, karuyag sidngon, diri bahin hini nga linarang.” (Hebreo 9:11) Para ha mga Kristiano, ito nga espirituwal nga templo an iginsaliwan ha literal nga templo ha Jerusalem.

  •  Rosh Hashanah. Ini an siyahan nga adlaw han tuig han mga Judio. Ha kadaan nga panahon, ini nga piyesta nag-uupod han paghalad ha Dios hin espesyal nga mga halad. (Numeros 29:1-6) Kondi sugad nga Mesias, ginpaundang ni Jesu-Kristo “an halad nga hayop ngan an halad sugad nga regalo,” salit ha panhunahuna han Dios waray na ito kapulsanan.—Daniel 9:26, 27.

•   An kapiyestahan ba nag-aaghat hin interfaith?

   Prinsipyo ha Biblia: “Paonan-o an tumuroo magkakaada kaparihoan ha diri tumuroo? Ngan paonan-o magkakaangay an templo han Dios ngan an mga idolo?”—2 Corinto 6:15-17.

   Bisan kon an mga Saksi ni Jehova nangangalimbasog nga magkinabuhi hin mamurayawon upod han ira mga igkasi-tawo ngan narespeto ha katungod han kada usa nga pumili han iya gintotoohan, ginlilikyan nira an mga selebrasyon nga nag-aaghat hin interfaith ha masunod nga mga paagi.

   Mga selebrasyon parte ha mga persona o panhitabo nga konektado ha relihiyon nga nag-aaghat hin urosa nga pagsingba ha mga tawo nga iba-iba an relihiyon. Han gin-giyahan han Dios an iya katawohan ha kadaan nga panahon ngadto ha bag-o nga tuna diin an mga naukoy may iba nga mga relihiyon, ginsidngan niya hira: “Ayaw paghimo hin kasabotan ha ira o ha ira mga dios. . . . Kon mag-aalagad [kamo] ha ira mga dios, sigurado nga magigin usa ito nga bitik ha [iyo].” (Exodo 23:32, 33) Salit an mga Saksi ni Jehova diri nakikigbahin ha mga kapiyestahan sugad han masunod.

  •  Loy Krathong. Hini nga piyesta ha Thailand, “an mga tawo naghihimo hin mga yahong-yahong nga dahon, ginbubutangan ito hin mga kandila o mga istik nga insenso, ngan ginpapaanod ito ha tubig. Gintotoohan nga gindadara hito pahirayo an malas. Ha pagkatinuod, ini nga piyesta naghihinumdom han baraan nga marka han tamak han Budha.”—Encyclopedia of Buddhism.

  •  National Repentance Day. An mga nakikigbahin hini “nauyon [ha] nangunguna nga mga katutdoan han Kristiano nga pagtoo,” sumala ha usa nga opisyal han gobyerno nga ginkotar ha The National, usa nga dyaryo ha Papua New Guinea. Hiya nagsiring nga ini nga adlaw “nabulig para iaghat ha nasud an mga prinsipyo han mga Kristiano.”

  •  Vesak. “Ini an pinakabaraan ha baraan nga mga adlaw han mga Budhista, diin ginsiselebrar an kanan Budha katawo, pagkaada kinaadman, ngan kamatayon, o pakadangat ha Nirvana.”—Holidays, Festivals, and Celebrations of the World Dictionary.

   Mga pagsaurog nga iginbase ha mga tradisyon han relihiyon nga diri gintututdo han Biblia. Ginsidngan ni Jesus an mga lider han relihiyon: “Ginhimo niyo nga waray pulos an pulong han Dios tungod han iyo tradisyon.” Nagsiring liwat hiya parte ha ira nga an ira pagsingba waray pulos kay gintututdo nira an “mga sugo han mga tawo sugad nga mga doktrina.” (Mateo 15:6, 9) Tungod kay ginsusunod han mga Saksi ni Jehova ini nga pahamangno, damu nga selebrasyon may kalabotan ha relihiyon an diri nira ginsiselebrar.

  •  Epiphany (Three Kings’ Day, Timkat, o Los Reyes Magos). Ginhihinumdom han mga nagsiselebrar hini an pagbisita han mga astrologo kan Jesus o an bawtismo ni Jesus. Hini nga piyesta, “ginhimo nga Kristiano nga selebrasyon an pipira nga pagano nga piyesta ha katsaringsing, nga nagpapasidungog ha mga dios han naagos nga tubig, mga salog, ngan mga sapa.” (The Christmas Encyclopedia) An Timkat, nga konektado hini nga piyesta, “iginbase gud ha mga tradisyon.”—Encyclopedia of Society and Culture in the Ancient World.

  •  Piyesta han Pagsaka ha Langit han Birhen Maria. Hini nga piyesta, ginsiselebrar an pagtoo nga an nanay ni Jesus sumaka ha langit nga may pisikal nga lawas. “Ini nga pagtoo,” siring han Religion and Society—Encyclopedia of Fundamentalism, “waray mahibaroi han siyahan nga mga Kristiano ngan waray ito unabiha ha Kasuratan.”

  •  Piyesta han Imaculada Concepcion. “An Imaculada Concepcion [ni Maria] diri igintututdo ha Kasuratan . . . [Ito] nga katutdoan ginhimo han singbahan.”—New Catholic Encyclopedia.

  •  Kwaresma. Sumala ha New Catholic Encyclopedia, ini nga panahon han pagpenitensya ngan pagpuasa gintikangan “ha ikaupat ka siglo,” sobra 200 ka tuig katapos makompleto an Biblia. May kalabotan ha siyahan nga adlaw han Kwaresma, ini an siring han encyclopedia: “An kustomre nga pamuring ha mga tumuroo kon Ash Wednesday nagin komon la tikang han Synod of Benevento han 1091.”

  •  Meskel (o, Maskal). Hini nga piyesta ha Etiopia, ginsiselebrar “an kabilngi han Tinuod nga Krus (an krus diin ginraysang an Kristo), pinaagi ha paghimo hin mga tap-ong ngan pagsayaw ha palibot hito,” siring han Encyclopedia of Society and Culture in the Medieval World; hira an nagbutang han parenteses. Pero an mga Saksi ni Jehova diri nagamit hin krus ha ira pagsingba.

•   An kapiyestahan ba nagpapasidungog ha usa nga tawo, organisasyon, o simbolo han nasud?

   Prinsipyo ha Biblia: “Ini an siring ni Jehova: ‘Maghikaraot an tawo nga nasarig ha mga tawo la, nga nasarig ha gahum han tawo, ngan an tawo nga an kasingkasing napahirayo kan Jehova.’”—Jeremias 17:5.

   Bisan kon iginpapahayag han mga Saksi ni Jehova an ira apresasyon ha ira igkasi-tawo ngan igin-aampo pa ngani hira, an mga Saksi ni Jehova diri naapi ha masunod nga mga okasyon o selebrasyon:

   Mga kapiyestahan nga nagpapasidungog ha usa nga magmarando o iba pa nga kilala nga tawo. Ini an siring han Biblia: “Para ha iyo mismo kaopayan, ayaw na kamo pagsarig ha tawo, nga gininhawa la ha mga buho han iya irong. Kay ano man nga tatagdon hiya?” (Isaias 2:22) Salit sugad nga pananglitan, an mga Saksi ni Jehova diri nagsiselebrar han birthday han usa nga hadi o rayna.

   Mga selebrasyon para ha bandera han usa nga nasud. An mga Saksi ni Jehova diri nagsiselebrar han Flag Day. Kay ano? Tungod kay an Biblia nasiring: “Bantayi an iyo kalugaringon tikang ha mga idolo.” (1 Juan 5:21) An iba nga mga tawo yana diri naghuhunahuna nga an bandera usa nga idolo—butang nga ginsisingba—pero an historyador nga hi Carlton J. H. Hayes nagsurat: “An nasyonalismo sugad hin relihiyon nga an nangunguna nga simbolo ngan ginsisingba amo an bandera.”

   Mga kapiyestahan o selebrasyon nga nagpapasidungog ha usa nga santo. Ano an nahitabo han an usa nga lalaki nga may kahadlok ha Dios yinukbo kan apostol Pedro? An Biblia nasiring: “Ginpabuhát hiya ni Pedro, nga nasiring: ‘Buhát; tawo la liwat ako.’” (Buhat 10:25, 26) Tungod kay hi Pedro ngan an iba pa nga apostol waray kumarawat hin espesyal nga pagpasidungog o pagsingba, an mga Saksi ni Jehova diri naapi ha mga okasyon nga nagpapasidungog ha ginhuhunahuna nga mga santo, sugad han masunod nga mga selebrasyon:

  •  Todos los Santos. “Usa nga piyesta nga nagpapasidungog ha ngatanan nga santo . . . Diri sigurado an gintikangan hini nga piyesta.”—New Catholic Encyclopedia.

  •  Piyesta han Our Lady of Guadalupe. Ini nga piyesta nagpapasidungog ha “santo nga nagpuprotektar ha Mexico,” nga gintotoohan han iba nga amo hi Maria, nga nanay ni Jesus. Gintotoohan nga milagroso nga nagpakita hiya ha usa nga parag-uma han 1531.—The Greenwood Encyclopedia of Latino Literature.

  •  Name Day. “An name day amo an adlaw han piyesta han santo diin ginkuha an ngaran han usa nga bata ha panahon han bunyag o han kompirmasyon,” siring han libro nga Celebrating Life Customs Around the World—From Baby Showers to Funerals. Ito nagdugang nga hito nga adlaw an mga tawo nagbubuhat hin mga butang nga konektado ha relihiyon.

   Mga selebrasyon parte ha kagiosan ha politika o ha sosiedad. “Mas maopay nga umayop kan Jehova,” siring han Biblia, “kay ha sumarig ha mga tawo.” (Salmo 118:8, 9) Tungod kay karuyag ipakita han mga Saksi ni Jehova nga nasarig hira ha Dios ha pagsulbad han mga problema ha kalibotan imbes nga ha mga tawo, diri hira naapi ha pagselebrar han Youth Day o Women’s Day, nga nasuporta ha mga kampanya ha politika o sosiedad. Ito liwat an rason kon kay ano nga diri hira naapi ha Emancipation Day o ha puropariho nga mga selebrasyon. Lugod, nasarig hira nga an Ginhadian han Dios an magsusulbad han mga problema tungod han diskriminasyon han lahi ngan pagin diri patas.—Roma 2:11; 8:21.

•   An kapiyestahan ba nagpapahitaas han usa nga nasud o lahi?

   Prinsipyo ha Biblia: “An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.”—Buhat 10:34, 35.

   Bisan kon naruruyagan han damu nga Saksi ni Jehova an ira natawhan nga nasud, ginlilikyan nira an mga selebrasyon nga nagpapahitaas han mga nasud o lahi sugad han masunod.

   Mga okasyon nga nagpapasidungog ha militar. Imbes nga iaghat an pakiggirra, ginsidngan ni Jesus an iya mga sumurunod: “Padayon nga higugmaa an iyo mga kaaway ngan ig-ampo an mga nagtitimaraot ha iyo.” (Mateo 5:44) Salit an mga Saksi ni Jehova diri nagsasaurog hin mga selebrasyon nga nagpapasidungog ha mga sundalo, upod na an masunod:

  •  Anzac Day. “An Anzac nangangahulogan hin Australian and New Zealand Army Corps,” ngan “ha kamaihaan, an Anzac Day nagin adlaw han paghinumdom han mga namatay ha girra.”—Historical Dictionary of Australia.

  •  Veterans Day (Remembrance Day, Remembrance Sunday, o Memorial Day). Ini nga mga kapiyestahan nagpapasidungog ha “mga beterano nga sundalo ngan hadton namatay ha mga girra han ira nasud.”—Encyclopædia Britannica.

   Mga selebrasyon han kasaysayan o kagawasan han usa nga nasud. Ini an siring ni Jesus parte ha iya mga sumurunod: “Diri hira bahin han kalibotan, sugad la nga diri ako bahin han kalibotan.” (Juan 17:16) Bisan kon nalilipay an mga Saksi ni Jehova ha paghibaro parte ha kasaysayan han usa nga nasud, diri hira nakikigbahin ha mga okasyon sugad han masunod:

  •  Australia Day. Sumala ha Worldmark Encyclopedia of Cultures and Daily Life, ini nga kapiyestahan naghihinumdom “ha adlaw han 1788 diin gin-alsa han Ingles nga mga sundalo an ira bandera ngan gindeklara an Australia nga usa nga bag-o nga kolonya.”

  •  Guy Fawkes Day. Usa ini nga “adlaw diin an nasud nagsiselebrar ngan naghihinumdom [han] pakyas nga plano ni Guy Fawkes ngan han iba pa nga nasuporta ha Katoliko basi patayon hi King James I ngan an mga membro han Parliamento [han England] han 1605.”—A Dictionary of English Folklore.

  •  Independence Day. Ha damu nga lugar, usa ini nga “adlaw diin an mga tawo nagsiselebrar han anibersaryo han pagin independente han ira nasud tikang ha iba nga nasud.”—Merriam-Webster’s Unabridged Dictionary.

•   An kapiyestahan ba nag-uupod hin waray kontrol nga panggawi o imoral nga buhat?

   Prinsipyo ha Biblia: “An panahon nga naglabay igo na para ha iyo ha pagbuhat han kaburut-on han mga nasud han ginhihinimo niyo an mga buhat nga nagpapakita han mapasiparahon nga panggawi, diri mapugngan nga hingyap ha sayop nga mga butang, sobra nga pag-inom, mga karisyohan nga waray kontrol, padamuay ha pag-inom, ngan mga idolatriya nga kontra ha balaud.”—1 Pedro 4:3.

   Uyon hini nga prinsipyo, ginlilikyan han mga Saksi ni Jehova an mga selebrasyon nga nag-uupod hin sobra nga pag-inom ngan karisyohan nga waray kontrol. An mga Saksi ni Jehova nalilipay nga makaupod an ira kasangkayan, ngan mahimo hira magdesisyon nga uminom hin makahurubog nga mga irimnon ha kasadangan la, kon mainom man hira. Ginhihimo nira an ira pinakamaopay basi sundon ini nga sagdon han Biblia: “Nakaon man kamo o nainom o nagbubuhat hin bisan ano, buhata an ngatanan nga butang para ha himaya han Dios.”—1 Corinto 10:31.

   Salit an mga Saksi ni Jehova diri naapi ha mga karnabal o puropariho nga mga piyesta nga nag-aaghat hin diri desente nga panggawi nga ginkukondenar ha Biblia. Upod hini an Purim nga piyesta han mga Judio. Bisan kon an Purim maiha na ginbubuhat sugad nga paghinumdom han katalwasan han mga Judio han ikalima ka siglo B.C.E., mahimo na ito yana “ihulagway sugad nga bersyon han mga Judio han Mardi Gras o Karnabal,” siring han libro nga Essential Judaism. Para ha damu nga nagsiselebrar hito, “nag-uupod ito hin pagsul-ot hin kostyum (kasagaran nga an mga lalaki nagsusul-ot hin panbabaye nga bado), waray kontrol nga panggawi, sobra nga pag-irignom, ngan pag-inaringasa.”

 Oo. Gintututdoan han Biblia an mga tawo nga higugmaon ngan respetuhon an ngatanan nira nga kapamilya, anoman an ira gintotoohan. (1 Pedro 3:1, 2, 7) Syempre, kon an usa nga Saksi ni Jehova diri na naapi ha pipira nga selebrasyon, an iba han iya mga paryente bangin masina, masakitan, o umabat pa ngani nga gintraydor hira. Salit damu nga Saksi ni Jehova an nangangalimbasog nga pasarigon an ira mga paryente nga hinigugma nira hira, isaysay hin mataktika an mga rason han ira mga desisyon, ngan bisitahon an ira mga paryente ha iba nga mga panahon.

 Diri. Natoo hira nga an kada usa an dapat magdesisyon. (Josue 24:15) An mga Saksi ni Jehova ‘nagpapasidungog ha ngatanan nga klase hin tawo,’ anoman an ira relihiyon.—1 Pedro 2:17.