An mga Saksi ni Jehova padayon nga ginti-train ha ngatanan nga bahin han ira kinabuhi sugad nga Kristiano, upod na an ira pagministeryo ha publiko. Ini nga ministeryo amo an buruhaton nga iginsugo ni Jesus ha iya mga sumurunod—an pagsangyaw ngan pagtutdo han maopay nga sumat han Ginhadian han Dios. (Mateo 24:14; 28:19, 20) Ginti-train kami ha amon sinemana nga mga katirok ngan tinuig nga mga kombensyon ngan asembleya. An mga Saksi ni Jehova nga may mga responsabilidad ha kongregasyon o ha organisasyon nakakakarawat hin dugang nga training ha espesyal nga mga Bible school.

Hini nga artikulo

•  Ano nga training an nakakarawat han mga Saksi ni Jehova?

•  Mga Bible school para ha mga Saksi ni Jehova

•  Diin iginbase an training nga ginhahatag ha mga Saksi?

•  Nagbabayad ba an mga Saksi ni Jehova para ha ira training?

•  Paonan-o nagpapahimulos an mga Saksi ni Jehova ha ira training?

 Mga katirok han kongregasyon. Kada semana, nagkakatirok kami ha amon lugar han pagsingba nga gintatawag nga Kingdom Hall. An usa nga katirok agsob nga ginhihimo ha butnga han semana o midweek; an usa naman ha kataposan han semana o weekend. Abrido ito ha publiko ngan waray pangolekta hin kwarta.

•   Katirok ha midweek. Gintututdoan kami dinhi kon paonan-o papauswagon an amon pagbasa, pakiistorya, pagyakan ha publiko, ngan pagsangyaw ngan pagtutdo. Ginhihimo an training pinaagi hin mga pahayag, pakighisgot, pasundayag, ngan video. Nabulig ito ha amon nga magin mas epektibo ha pagsumat ha iba han mensahe han Biblia ngan pag-Bible study ha mga interesado. An ngatanan nga naatender ha mga katirok nagpapahimulos hini nga training. Labaw ha ngatanan, an mga katirok nagpaparig-on han amon pagtoo ha Dios ngan han amon gugma ha iya ngan ha amon igkasi-tumuroo.

•   Katirok ha weekend. Inin duha ka bahin nga katirok nagtitikang pinaagi hin pahayag nga basado ha Biblia para ha publiko. An ikaduha nga bahin amo an pakiana ngan baton nga pakighisgot ha usa nga artikulo ha aradman nga edisyon han An Barantayan. a An mga artikulo naghihisgot ngan nagsasaysay hin mga topiko ngan prinsipyo ha Biblia nga nabulig ha amon pagministeryo ngan pagkinabuhi kada adlaw.

 Mga asembleya ngan kombensyon. Kada tuig, nagkakaada kami hin tulo nga dagku nga katirok nga gin-aatenderan hin damu nga kongregasyon. Inin makalilipay nga mga okasyon nakapokus ha espisipiko nga tema nga basado ha Biblia ngan may-ada ito mga pahayag, pasundayag, interbyu, ngan video. Pariho han amon mga katirok ha kongregasyon, an mga asembleya ngan kombensyon nabulig ha amon nga mahibaro hin dugang ha Biblia ngan magin mas maopay nga ministro han maopay nga sumat. Abrido liwat ito ha publiko ngan waray pangolekta hin kwarta.

 Para hin dugang nga training, an pipira nga Saksi ni Jehova gin-iimbitar nga umiskwela ha iba-iba nga eskwelahan. Ano ito nga mga eskwelahan? Ano an katuyoan ngan kaihaon hito? Ngan hin-o an puydi umiskwela?

Pioneer Service School

•   Katuyoan: Mag-train hin bug-os panahon nga mga ministro, nga gintatawag nga mga payunir, b basi magin mas epektibo ha pagsangyaw ngan pagtutdo nga buruhaton. May-ada ini mga pakighisgot, pasundayag, pahayag, ngan workshop.

•   Kaihaon: Unom ka adlaw.

•   An puydi umiskwela: An mga payunir hin usa ka tuig gin-iimbitar nga umiskwela. An mag-iha na nga payunir nga waray makaeskwela han naglabay nga lima ka tuig puydi imbitaron nga umiskwela utro.

School for Kingdom Evangelizers

•   Katuyoan: Basi maghatag hin espesyal nga training ha eksperyensyado nga bug-os-panahon nga mga ministro. Ginpapauswag pa han mga estudyante an ira skill ha pagsangyaw ngan pagtutdo, ngan gin-uusisa gud nira hin maopay an mga topiko ha Biblia. Damu nga naggradwar dinhi an ginpapadara ha mga lugar nga nagkikinahanglan hin mas damu nga ebanghelisador.

•   Kaihaon: Duha ka bulan.

•   An puydi umiskwela: Puydi mag-aplay an mga payunir nga nakaabot han mga kwalipikasyon ngan aada ha kahimtang ha pag-alagad ha bisan diin nga may panginahanglan.

School for Congregation Elders

•   Katuyoan: Basi buligan an mga tigurang c nga matuman an ira mga responsabilidad ha kongregasyon, sugad han pagtutdo ngan pag-ataman, ngan basi pahilarumon an ira gugma ha Dios ngan ha ira igkasi-tumuroo.—1 Pedro 5:2, 3.

•   Kaihaon: Lima ka adlaw.

•   An puydi umiskwela: An mga bag-o nga ginpili sugad nga tigurang pati na an eksperyensyado nga mga tigurang nga waray pa makaeskwela han naglabay nga lima ka tuig gin-iimbitar nga umiskwela.

School for Circuit Overseers and Their Wives

•   Katuyoan: Basi mag-train hin nagbibiyahe nga mga ministro, nga gintatawag nga mga paramangno han sirkito, d para matuman hin mas epektibo an ira mga responsabilidad. (1 Timoteo 5:17) An kurikulum nabulig liwat hinin Kristiano nga mga tigurang ngan ha ira asawa nga magkaada mas hilarom nga pagsabot han Kasuratan.

•   Kaihaon: Usa ka bulan.

•   An puydi umiskwela: An bag-o nga mga paramangno han sirkito ngan an ira asawa gin-iimbitar nga umiskwela paglabay hin usa ka tuig ha ira toka. Katapos, iimbitaron utro hira kada lima ka tuig.

Kingdom Ministry School

•   Katuyoan: Basi buligan an mga tigurang ngan ministeryal nga mga surugoon e nga matuman an ira mga responsabilidad ha kongregasyon uyon ha sitwasyon ngan mga panginahanglan. (2 Timoteo 3:1) Ini nga klase ginhihimo ha kada paglalabay hin pipira ka tuig.

•   Kaihaon: Depende, kasagaran usa ka adlaw.

•   An puydi umiskwela: Mga paramangno han sirkito, tigurang, ngan ministeryal nga surugoon.

Bethel Service School

•   Katuyoan: Basi buligan an mga membro han Bethel f nga magin epektibo ha ira trabaho ngan pahilarumon an ira gugma ha Dios ngan ha ira mga kaupod.

•   Kaihaon: Lima ngan tunga ka adlaw.

•   An puydi umiskwela: An bag-o nga mga membro han Bethel kinahanglan umiskwela. An mag-iha na nga membro nga waray makaeskwela han naglabay nga lima ka tuig puydi imbitaron nga umiskwela utro.

Watchtower Bible School of Gilead

•   Katuyoan: Basi buligan an mga estudyante nga magkaada mas hilarom nga apresasyon ha Pulong han Dios ngan buligan hira nga iaplikar an ira nahibaroan. (1 Tesalonica 2:13) An hamtong ha espirituwal nga mga Kristiano nga naeskwela ha Gilead nagigin daku gud nga bulig ha organisasyon ni Jehova ngan ha bug-os-kalibotan nga pagpanutdo nga buruhaton tikang ha Biblia. An mga naggradwar puydi i-asayn ha field o ha branch office, ha iba nga nasud o ha ira lugar.

•   Kaihaon: Lima ka bulan.

•   An puydi umiskwela: An mga Branch office nagpipili hin bug-os-panahon nga mga ministro basi imbitaron nga mag-aplay. An klase ginhihimo ha United States ha Watchtower Educational Center ha Patterson, New York.

School for Branch Committee Members and Their Wives

•   Katuyoan: Basi i-train an mga membro han Branch Committee g ha pagpanguna ha mga buruhaton han branch office ngan ha mga buruhaton han mga Saksi ni Jehova ha ira nasud o ha mga nasud nga sakop han ira branch office.

•   Kaihaon: Duha ka bulan.

•   An puydi umiskwela: An World Headquarters han mga Saksi ni Jehova nagpipili hin mga membro han Branch Committee ngan han ira asawa basi imbitaron nga umiskwela. Ginhihimo ito ha Watchtower Educational Center ha Patterson, New York.

 An Biblia amo pirme an nangunguna nga libro nga ginagamit ha training para ha mga Saksi ni Jehova. Natoo kami nga an Biblia giniyahan han Dios ngan nagsusulod ito han pinakamaopay nga instruksyon kon paonan-o magkikinabuhi sugad nga Kristiano.—2 Timoteo 3:16, 17.

 Diri. Libre la an training. An mga buruhaton han mga Saksi ni Jehova ginsusuportaran han boluntaryo nga mga donasyon.—2 Corinto 9:7.