Sayop nga ideya: Diri nagsiselebrar hin Easter an mga Saksi ni Jehova tungod kay diri hira mga Kristiano.

 Kamatuoran: Natoo kami nga hi Jesu-Kristo an aton Paratalwas, ngan ginhihimo namon an ngatanan basi “sundon . . . hin maopay an iya mga pitad.”—1 Pedro 2:21; Lucas 2:11.

 Sayop nga ideya: Diri kamo natoo nga ginbanhaw hi Jesus.

 Kamatuoran: Natoo kami han pagkabanhaw ni Jesus; ginkikilala namon ito sugad nga usa han pinakaimportante nga katutdoan han mga Kristiano ngan ginpapabug-atan namon ito ha amon pagsangyaw.—1 Corinto 15:3, 4, 12-15.

 Sayop nga ideya: Diri niyo karuyag nga maeksperyensyahan han iyo mga anak an kalipay ha pagselebrar han Easter.

 Kamatuoran: Hinigugma namon an amon mga anak. Ngani, ginhihimo namon an ngatanan basi bansayon hira ngan buligan nga magin malipayon.—Tito 2:4.

•   Diri basado ha Biblia an pagselebrar hin Easter.

•   Nagsugo hi Jesus nga hinumdoman an iya kamatayon, diri an iya pagkabanhaw. Kada tuig, ginsasaurog namon an Memoryal ha paghinumdom han anibersaryo han iya kamatayon sumala han lunar nga kalendaryo han Biblia.—Lucas 22:19, 20.

•   Natoo kami nga an mga kustomre han Easter nagtikang ha kadaan nga mga rituwal han pagkamabungahon, salit diri ito kinakarawat han Dios. Karuyag han Dios nga ihatag naton ha iya an “eksklusibo nga debosyon,” ngan diri hiya nalilipay han pagsingba nga gin-uupdan hin mga buhat nga diri niya gin-uuyonan.—Exodo 20:5; 1 Hadi 18:21.

 Natoo kami nga an amon desisyon nga diri magselebrar hin Easter basado gud ha Biblia, nga nag-aaghat nga gamiton an “praktikal nga kinaadman ngan an abilidad ha paghunahuna” imbes nga magsinunod la ha mga tradisyon han tawo. (Proberbios 3:21; Mateo 15:3) Kon ginpapakianhan kami han iba parte han Easter, iginsusumat namon an amon gintotoohan pero ginrirespeto namon an katungod han kada tagsa nga magdesisyon kon ano an iya bubuhaton.—1 Pedro 3:15.