Diri kulto an mga Saksi ni Jehova. Lugod, mga Kristiano kami nga ginhihimo an amon pinakamaopay para sundon an ehemplo ni Jesu-Kristo ngan magkinabuhi uyon ha iya mga katutdoan.

 Iba-iba an kahulogan han pulong nga “kulto” para ha iba-iba nga tawo. Pero, pansina an duha nga komon nga panhunahuna parte ha mga kulto ngan kon kay ano nga ito nga mga panhunahuna diri aplikado ha amon.

•   Ginhuhunahuna han iba nga an kulto bag-o o naiiba nga relihiyon. An mga Saksi ni Jehova waray maghimo-himo hin bag-o nga relihiyon. Ha kabaliktaran, ginsusunod namon an paagi han pagsingba han siyahan-siglo nga mga Kristiano nga an ehemplo ngan an mga katutdoan iginrekord ha Biblia. (2 Timoteo 3:16, 17) Natoo kami nga an Baraan nga Kasuratan an dapat magin basihan ha kon ano an ginkakarawat nga paagi han pagsingba.

•   Ginhuhunahuna han iba nga an kulto peligroso nga sekta han relihiyon nga may-ada tawhanon nga lider. Diri ginkikilala han mga Saksi ni Jehova an bisan hin-o nga tawo sugad nga ira lider. Lugod, ginsusunod namon an suruklan nga ginhatag ni Jesus ha iya mga sumurunod han hiya nagsiring: “Usa la an iyo Lider, an Kristo.”—Mateo 23:10.

 Kabaliktaran ha pagin peligroso nga kulto, an mga Saksi ni Jehova nagpapahimulos ngan an iba ha komunidad tungod han ira mga ginbubuhat ha ira relihiyon. Pananglitan, an amon pagsangyaw nakabulig ha damu nga tawo nga malamposan an ira nakakadaot nga mga bisyo, sugad han pag-abuso ha droga ngan de-alkohol nga irimnon. Dugang pa, may-ada kami mga klase ha pagbasa ngan pagsurat ha bug-os nga kalibotan nga nakabulig ha yinukot. Ngan aktibo kami nga nabulig ha panahon han kalamidad. Naniningkamot kami nga magin maopay nga impluwensya ha iba, sugad han ginsugo ni Jesus ha iya mga sumurunod.—Mateo 5:13-16.