Iginbase namon ha mga katutdoan han Biblia an amon panhunahuna ngan ginbubuhat parte ha lamay ngan paglubong, upod hini an masunod:

•   Normal la nga masubo tungod ha kamatyi hin hinigugma. An mga disipulo ni Jesus nagtaguminatay ha kamatay han ira hinigugma. (Juan 11:33-35, 38; Buhat 8:2; 9:39) Salit para ha amon, an lamay ngan paglubong diri panahon ha pagkalipay. (Eclesiastes 3:1, 4; 7:1-4) Lugod, panahon ito ha pagpakita hin pagpaid ha namatayan.—Roma 12:15.

•   An mga patay waray sarabotan. Anoman an amon gintikangan nga lahi o kultura, ginlilikyan namon an mga kustomre o mga buhat nga basado ha diri Kasuratanhon nga pagtoo nga an mga patay may sarabotan ngan mahimo makaimpluwensya ha mga buhi. (Eclesiastes 9:5, 6, 10) Nag-uupod ini hin mga kustomre sugad han pagbantay ha patay, magarbo nga selebrasyon ha paglubong ngan anibersaryo han patay, paghalad ha mga patay, pakiistorya ngan paghangyo ha mga patay, ngan rituwal ha kabalo. Ginlilikyan namon ito ngatanan nga kustomre ngan buhat, tungod kay ginsusugot namon ini nga sugo han Biblia: “Bulag kamo, . . . ngan ayaw na kamo kapot han mahugaw nga butang.”—2 Corinto 6:17.

•   May paglaom para ha mga patay. Gintututdo han Biblia nga may pagkabanhaw ngan maabot an panahon nga waray na kamatayon. (Buhat 24:15; Pahayag 21:4) Ini nga paglaom nabulig ha amon nga malikyan an pagpakita hin sobra nga pagtaguminatay, sugad la nga nakabulig ito ha siyahan nga mga Kristiano.—1 Tesalonica 4:13.

•   Nagsasagdon an Biblia nga magin mapainubsanon. (Proberbios 11:2) Diri kami natoo nga an paglamay ngan paglubong higayon basi ‘iparayaw’ an estado ha kinabuhi han usa. (1 Juan 2:16) Diri kami naghihikay hin magarbo nga paglamay ngan paglubong nga para la ha kaliawan o para magpaimpres ha mga nagkikita pinaagi hin mahal hinduro nga mga lungon ngan pagsul-ot hin magarbo nga mga bado.

•   Diri namon ginpipirit ha iba an amon mga gintotoohan parte ha lamay ngan paglubong. Uyon hini, ginsusunod namon ini nga prinsipyo: “An tagsa ha aton magkakaada baratunon ha Dios.” (Roma 14:12) Pero kon magkaada kami higayon, nangangalimbasog kami nga isaysay an amon gintotoohan “nga may pagkamalumo ngan daku nga respeto.”—1 Pedro 3:15.

 Lokasyon: Kon an pamilya magdesisyon nga magkaada pahayag ha lubong, puydi ito himoon ha lugar nga ira pipilion, sugad ha Kingdom Hall, ha punerarya, ha balay, ha crematorium, o ha sementeryo.

 Pahayag ha lubong: May pahayag basi liawon an namatayan pinaagi ha pagsaysay ha ginsisiring han Biblia parte ha kamatayon ngan ha paglaom nga pagkabanhaw. (Juan 11:25; Roma 5:12; 2 Pedro 3:13) Bangin unabihon dida hito an mag-opay nga kalidad han tawo nga namatay, ngan pabug-atan an makapadasig nga mga leksyon tikang ha iya maopay nga ehemplo.—2 Samuel 1:17-27.

 Puydi liwat kantahon an usa nga kanta nga basado ha Kasuratan. (Colosas 3:16) An pahayag tatapuson pinaagi hin nakakaliaw nga pag-ampo.—Filipos 4:6, 7.

 Bayad o pangolekta: Diri kami nagpapabayad ha bisan ano nga ginbubuhat ha amon relihiyon, upod na hito an pahayag ha lubong, ngan diri liwat kami nangungolekta hin kwarta ha amon mga katirok.—Mateo 10:8.

 An puydi umatender: Puydi makaatender an diri Saksi ha pahayag ha lubong nga hihimoon ha usa nga Kingdom Hall. Pariho han amon iba nga mga katirok, abrido ito ha publiko.

 An tagsa nga Saksi an magdidesisyon, basado ha iya nabansay ha Biblia nga konsensya. (1 Timoteo 1:19) Pero, diri kami nakikigbahin ha mga seremonya han relihiyon nga para ha amon diri uyon ha Biblia.—2 Corinto 6:14-17.