Naobserbaran namon nga damu han may-ada na relihiyon an nalilipay pakiistorya ha mga topiko nga ginhihisgotan han Biblia. Syempre, ginrirespeto namon an katungod han usa ha pagkaada relihiyon nga iba han amon, ngan diri namon iginpipirit an amon mensahe.

 Kon nakikiistorya kami ha iba mahitungod ha relihiyon, nangangalimbasog kami nga ig-aplikar an sagdon han Biblia nga buhaton ito “ha malumo nga paagi ngan may daku nga respeto.” (1 Pedro 3:15) Maaram kami nga may-ada diri makarawat han amon mensahe. (Mateo 10:14) Pero, diri kami maaram kon ano an magigin reaksyon han mga tawo kon diri pa namon hira makaistorya. Maaram liwat kami nga nagbabag-o an kahimtang han mga tawo.

 Pananglitan, bangin ha usa nga higayon diri makiistorya an amon ginsasangyawan tungod kay okupado hiya, kondi ha iba nga higayon, maruyag na hiya pakiistorya ha amon. Ngan an mga tawo mahimo magkaada bag-o nga problema o magbag-o an sitwasyon nga mag-aaghat ha ira nga mamati ha mensahe han Biblia. Salit nangangalimbasog kami nga makiistorya ha mga tawo diri la hin usa ka beses.