Ginsusunod han mga Saksi ni Jehova an sagdon han Biblia nga diri bumaton ha ngatanan nga akusasyon ngan mga pagtamay. Pananglitan, usa nga teksto ha Biblia an nasiring: “An tawo nga nagtatadong hin paratamay makakakarawat hin kaarawdan.” (Proberbios 9:7, 8; 26:4) Imbes nga makig-away tungod han sobra nga kabaraka ha sayop nga mga akusasyon, nagpupokus kami ha pagpalipay ha Dios.—Salmo 119:69.

 Syempre, “may panahon han paghilom ngan may panahon han pagyakan.” (Eclesiastes 3:7) Nabaton kami hadton sinsero nga mga tawo nga interesado nga mahibaro han kamatuoran, pero ginlilikyan namon an waray pulos nga mga argumento. Ginsusunod namon an mga katutdoan ngan ehemplo ni Jesus ngan han siyahan nga mga Kristiano.

•   Waray bumaton hi Jesus han sayop nga gin-akusaran hiya ha atubangan ni Pilato. (Mateo 27:11-14; 1 Pedro 2:21-23) Sugad man, waray bumaton hi Jesus ha mga akusasyon nga usa hiya nga parainom ngan malamon. Lugod, ginpakita han iya mga buhat nga sayop an mga akusasyon ha iya, nga uyon hini nga prinsipyo: “An kinaadman napapamatud-an nga husto pinaagi han mga resulta hito.” (Mateo 11:19, footnote) Pero kon ginkikinahanglan, maisugon nga nabaton hiya hadton nagpapakaraot ha iya.—Mateo 15:1-3; Marcos 3:22-30.

   Gintutdoan ni Jesus an iya mga sumurunod nga diri manluya tungod han sayop nga mga akusasyon. Hiya nagsiring: “Malipayon kamo kon an mga tawo nagpapakaalo ha iyo, nagtitimaraot ha iyo, ngan nagyayakan han ngatanan nga klase han buwa ngan magraot nga mga butang kontra ha iyo tungod ha akon.” (Mateo 5:11, 12) Pero, nagsiring liwat hi Jesus nga kon ito nga mga akusasyon maghatag hin higayon nga makagsangyaw an iya mga sumurunod, tutumanon niya ini nga iya saad: “Tatagan ko kamo hin mga pulong ngan kinaadman nga diri makukontra o maririwa han mga nakontra ha iyo bisan pa han ira urosa nga pangalimbasog.”—Lucas 21:12-15.

•   Hi apostol Pablo nagsagdon ha mga Kristiano nga likyan an waray pulos nga mga diskusyon ha mga parakontra ngan iginhulagway niya ito nga mga argumento sugad nga “waray . . . maopay nga resulta ngan waray pulos.”—Tito 3:9; Roma 16:17, 18.

•   Gin-aghat ni apostol Pedro an mga Kristiano nga depensahan an ira pagtoo kon posible. (1 Pedro 3:15) Pero maaram hiya nga kasagaran mas maopay himoon ini pinaagi ha buhat imbes nga pinaagi ha pulong. Hiya nagsurat: “Pinaagi han pagbuhat hin maopay mapahilom niyo an waray pulos nga iristorya han diri makatadunganon nga mga tawo.”—1 Pedro 2:12-15.