An mga nabawtismohan sugad nga mga Saksi ni Jehova pero diri na nagsasangyaw ha iba, bangin ngani waray na makig-upod ha ira mga igkasi-tumuroo, diri ginsasalikway. Ngani, ginbubuligan namon hira nga maibalik an ira espirituwalidad.

 Diri namon awtomatiko nga ginpapaiwas ha kongregasyon an usa nga nakabuhat hin seryoso nga sala. Pero kon nabatasan na han usa nga bawtismado nga Saksi an pagtalapas han prinsipyo ha Biblia ha moral ngan diri nagbabasol, isasalikway hiya o papaiwason ha kongregasyon. An Biblia klaro nga nasiring: “Paiwasa tikang ha iyo an maraot nga tawo.”—1 Corinto 5:13.

 Ano man kon ginpaiwas ha kongregasyon an usa nga bana pero an iya asawa ngan mga anak mga Saksi ni Jehova la gihapon? An iya relasyon ha espirituwal ha iya pamilya mauutod, pero an ira relasyon sugad nga pamilya magpapadayon. An relasyon sugad nga mag-asawa ngan an gugma ngan an pagtratar ha usa kag usa sugad nga pamilya magpapadayon.

 An mga ginpaiwas ha kongregasyon mahimo umatender ha amon mga katirok. Kon karuyag nira, mahimo liwat hira makakarawat hin espirituwal nga sagdon tikang ha mga tigurang ha kongregasyon. Katuyoan hito nga buligan an kada indibiduwal basi magin kwalipikado utro nga magin usa han mga Saksi ni Jehova. An mga ginpaiwas ha kongregasyon nga umundang na ha maraot nga binuhatan ngan nagpapakita hin sinsero nga hingyap nga magkinabuhi uyon ha mga suruklan ha Biblia kakarawaton utro sugad nga mga Saksi ni Jehova.