An gin-iihap namon sugad nga mga Saksi ni Jehova adton aktibo la nga nagsasangyaw han maopay nga sumat han Ginhadian han Dios kada bulan. (Mateo 24:14) Nag-uupod ito han bawtismado na nga mga Saksi sugad man han diri pa mga bawtismado pero kwalipikado na makigbahin ha pagsangyaw nga buruhaton.

 Diri. Diri kinahanglan an donasyon basi iupod an usa nga tawo ha ihap han mga Saksi o magkaada hiya bisan ano nga toka o pribilehiyo ha amon organisasyon. (Buhat 8:18-20) Ha pagkamatuod, kadam-an han mga nagdudonar diri nagpapakilala. An tagsa nga Saksi naghahatag han iya panahon, kusog, ngan mga panag-iya para ha amon bug-os-kalibotan nga buruhaton depende ha iya karuyag ngan kahimtang.​—2 Corinto 9:7.

 Kada bulan, iginrireport han mga Saksi ha ira lokal nga kongregasyon an ira pagsangyaw nga buruhaton. Ini nga report boluntaryo nga ginhihimo.

 An mga report ha kongregasyon gin-iihap ngan an mga total hito ginpapadara ha lokal nga sanga nga opisina. Iginpapadara han sanga nga opisina an mga total han tagsa nga nasud o teritoryo ngadto ha amon world headquarters.

 Ha kada kataposan han tuig han pag-alagad, a nahibabaroan an pinakahitaas nga kadamu han mga Saksi ha tagsa nga tuna hito nga tuig. Ini nga mga total gintatarampo basi mahibaroan an kadamu han mga Saksi ha bug-os nga kalibotan. An detalyado nga mga report han tagsa nga nasud makikita ha amon website ha seksyon nga “Bug-os nga Kalibotan.” Nadadasig kami hini nga mga report, sugad la nga nadasig liwat an siyahan nga mga Kristiano han puropariho nga mga report.​—Buhat 2:41; 4:4; 15:3.

 Bisan kon diri namon hira gin-aapi ha ihap han mga Saksi, welcome hira ha amon mga kongregasyon. Kadam-an ha ira natambong ha tinuig nga Memoryal han kamatayon han Kristo, salit mahibabaroan an ira ihap kon ig-iiban an kadamu han mga Saksi ha kadamu han tinambong hito nga katirok. Han 2023, an tinambong ha Memoryal inabot hin 20,461,767.

 Damu ha mga diri natambong ha amon mga katirok an nakakapahimulos ha libre nga programa han pag-aram ha Biblia ha balay. Han 2023, an aberids han amon gindumarahan hin pag-aram ha Biblia kada bulan inabot hin 7,281,212; an iba hito gindumara ha pipira nga indibiduwal hin durungan.

 Kasagaran nga nahibabaroan han ahensya han sensus han gobyerno an kadamu han membro han usa nga relihiyon pinaagi ha pagpakiana ha mga tawo kon ano an ira relihiyon. Pananglitan, an U.S. Census Bureau nasiring nga katuyoan han ira surbey nga “hibaroan kon an ira mga ginpapakianhan nag-aangkon nga kaapi hira hin usa nga relihiyon,” ngan nagsiring pa ito nga an ira nakuha nga ihap “iginbasar ha personal nga mga opinyon, diri ha kon ano an tinuod.” Ha kabaliktaran, an gin-aapi namon ha ihap sugad nga mga Saksi ni Jehova adton nagsasangyaw ha iba ngan nagrireport hito nga buruhaton, diri adton nag-aangkon la nga mga Saksi hira.