Sayop: An mga Saksi ni Jehova diri natoo ha mga doktor salit diri hira nagpapatambal.

 Tinuod: Namimiling kami han pinakamaopay nga paagi han pagtambal para ha amon kalugaringon ngan ha amon pamilya. Kon nagkakasakit kami, nakonsulta kami ha mga doktor nga eksperto ha pagtambal ngan pag-opera nga diri nagamit hin dugo. Nalilipay kami ha pag-uswag ha mga paagi han pagtambal. Ngani, an mga pagtambal nga diri nagamit hin dugo nga nakabulig ha Saksi nga mga pasyente mahimo na mapahimulosan ngan ngatanan. Ha damu nga nasud, an bisan hin-o nga pasyente mahimo na makalikay ha kadelikadohan tungod ha pagpaabuno hin dugo, sugad han sakit, komplikasyon, ngan sayop nga pag-abuno hin dugo.

Sayop: Natoo an mga Saksi ni Jehova nga matatambal an sakit han usa pinaagi han pagtoo.

 Tinuod: Diri kami nagbubuhat hin faith healing.

Sayop: Mahal hinduro an pagpatambal nga diri nagpapaabuno hin dugo.

 Tinuod: Mas barato an pagpatambal nga diri nagpapaabuno hin dugo. a

Sayop: Damu nga Saksi, upod na an kabataan, an namamatay kada tuig tungod ha pagdumiri nga magpaabuno hin dugo.

 Tinuod: Waray gud ito basihan. An mga doktor regular nga naghihimo hin komplikado nga mga operasyon sugad han pag-opera ha kasingkasing, pag-opera ha tul-an, ngan organ transplant nga diri nag-aabuno hin dugo. b An mga pasyente, upod na an kabataan, nga waray magpaabuno hin dugo kasagaran nga nakakarekober o mas madagmit pa ngani makarekober kay hadton nagpaabuno hin dugo. c Anoman an kahimtang, waray makakasiring nga an usa nga pasyente mamamatay tungod la kay waray hiya magpaabuno hin dugo o maghihilawig an iya kinabuhi tungod kay nagpaabuno hiya.

 An amon relihiyoso nga gintotoohan amo an nangunguna nga hinungdan. An Daan ngan Bag-o nga Tugon klaro nga nagsusugo ha aton nga maglikay ha dugo. (Genesis 9:4; Levitico 17:10; Deuteronomio 12:23; Buhat 15:28, 29) Ngan para ha Dios, an dugo nagrirepresentar ha kinabuhi. (Levitico 17:14) Salit ginlilikyan namon an dugo diri la basi sundon an Dios kondi tungod han amon respeto ha iya sugad nga an Humaratag han Kinabuhi.

 Hadto, an mga doktor naghuhunahuna nga delikado gud ngan pagpakamatay pa ngani an pagtambal nga diri nagamit hin dugo, pero nagbag-o ito hinin naglabay la nga katuigan. Pananglitan, han 2004, usa nga artikulo nga iginpublikar ha usa nga journal parte ha medisina an nagsiring nga “damu nga technique nga ginagamit ha mga pasyente nga Saksi ni Jehova an gagamiton na hin agsob ha maabot nga katuigan.” d Nagsiring an usa nga artikulo ha journal nga Heart, Lung and Circulation han 2010 nga an “‘pag-opera nga diri nagamit hin dugo’ diri la dapat eksklusibo ha [mga Saksi ni Jehova] kondi dapat magin bahin na han mga operasyon nga ginhihimo kada adlaw.”

 Ha bug-os nga kalibotan, yinukot na nga doktor an nagamit hin iba-iba nga technique ha komplikado nga mga operasyon nga waray pag-abuno hin dugo. An sugad nga mga pamaagi ginagamit liwat bisan han pobre nga mga nasud ngan karuyag han damu nga pasyente nga diri mga Saksi ni Jehova.