LECCIÓN 5
Ka daina saba sina Jeoba obonea?
1. Katukeme Jeoba ka daina nonae?
Jeoba ka daina nonae oko tai arai ubamejerei. Jeoba Adán Eva tane nonakore, Jeoba tatuma nonanatanae najamutu eku jamejerei. Ebe Dio mejokojituma nonae najamutu eku jamejerei (Job 38:4, 7). Jeoba nibora awajiabara jobaji yakeraja awai Edén eku abanae (Awajiabara 2:15-17). Arakate, Jeoba obonoae Adán anobotomo isiko jobaji arai are jamejerei. Anona 17:26; 1 Juan 2:17 teribu.
Tamaja jobaji yakeraja awai Edén ka daina akari sanuka jae. Dio Adán Eva tane kajotabuae nobotomo eraja jamejerei tuatane jobaji kuatakitane (Awajiabara 1:28). Ka daina are bajete, tiame daina arai warao are jate. Mateo 5:5 teribu.
2. Katukeme ama ka daina yakerena?
Adán Eva tane Dio aribu nokonatanae tiji, Dio tatuma Edén ekumo webotonae. Tiame, tamaja jobaji yakeraja dijanae, warao jisakarakate daisa jobaji yakeraja Edén monuka nonakomoni. Dio akarata dibia “warao asiraja jakutai, imasibumo jakutai tane atae asiraja kwarika ejobate” (2 Timoteo 3:13). Roma 5:18 teribu.
Jeoba oriaobonobu iabanae waraotuma saba jakutai? Iabanaja, Jeoba taerajawitu, tai kokotuka dibiakutai are nonaya (Isaías 45:18). Dio jobaji airamo jakore ya jisaka eku utirajawituana o jakewitu, Dio awajiabara atukamo obonoaekutai waraotuma saba tai eku abate. Roma 8:21.
3. Katukane ka daina yakeraja jate?
Dio a Reino airamo awai Jesú, ka daina yakeraja inamonite. Tai mejokojituma yakeraja isiko, Dio amusabena jakutai ekorate orikuba awai Armagedón eku. Satanás, mejokoji asirajawitu, Adán Eva tane imasibuaekutai Dio aribu nokonajamejerei, Jesú tai emojojutate joira 1000 isia. Dio awaraotuma wabanatate, Jesú tatuma yorote, tatuma jobaji yakeraja arai are jate. Emusabataja 20:1-3; 21:3, 4 teribu.
4. Katukakore ka sanamata ekorate?
Katukakore Dio asiraja jakutai ekorate? Jesú ka inaminae katukane oko naminakuna ka daina eku asirajakutai ayaju awere jakore. Ama asira kwayabayakutai etuaranajakore waraotuma wabakuna, tamaja emija ya jisaka eku utirajawituana o jakewitu Dio ka sanamata ekorate. 2 Timoteo 3:1; Lucas 21:7-14 teribu.
Jesú jobaji airamo tate najamutu atamo joira 1000 eku, tamatikamo ka isanayakutai ekorate (Isaías 9:6, 7; 11:9). Jesú airamorone saserote airamowitu tate tiame Jesú warao Dio oboneakutai aobojona asiraja berete. Dio Jesú sabasabaya, nobara kokotuka waba tane ekorate, arakate iramo tanakamejerei. Isaías 33:24; 1 Corinto 15:26 teribu.
5. Sinatuma daina yakeraja arai jate?
Jeoba arewaramo aorikuare nakanoko eku iji warao Dio oboneakutai mite, arakate tatuma naminakitane obonea Dio aobojona nonakitane
Warao Dio aribu eku abayakutai daina yakeraja arai jate (1 Juan 2:17). Jesú anebu kajotabuae warao obojona yakera jakutai najabumejerei, tatuma inaminakitane katukane nonakitane ja Dio araisa takitane. Ama, Jeoba warao eraja inaminaya daina yakeraja arai jamejerei (Juan 6:45). Warao eraja Jeoba arewaramo aorikuare nakanoko ata naria naminakitane, katukane nibora yakera, tira yakera, rimatuma yakera jakitane. Nobotomo rimatuma tane dibu yakeraja Dio akarata ekumo naminaya yakera jakitane. Emusabataja 15:4 teribu.
