Dio Abrahán anobotomo isia ina jisaka iyakaratae, arakate kajotabu eraja tatuma moae. Dio tamaja ina arao awai Israel abanae, tatuma Dio aribu eku abakitane arakate yatomanetekitane jaubuae (Roma 9:4). Tiame ina arao kokotuka Israel arao kuare yakera ejobakuna. Anona 3:25 teribu.

Dio israel awarao nisanae arewaramo jamejerei. Deje nobo tamaja ina isia ka emia oko Dio akajotabu eku abakore yakera jate (Deuteronomio 4:6). Tatuma sabasabaya warao daisa Dio nomewitu isia naminakuna. Isaías 43:10, 12 teribu.

Ina israel arao Dio aribu nokonatanae, tiame Jeoba ina daisa nisanae congregación kiritiana (Mateo 21:43; 23:37, 38). Tiame amawitu kiritianotuma nomewitu Jeoba saba yaotaya arewaramo monuka israeltuma yana. Anona 15:14, 17 teribu.

Jesú tai iamo anarumo iyakaratae Dio aribu isia dewarakitane anebu tane abakitane jobaji kokotukanea (Mateo 10:7, 11; 24:14; 28:19, 20). Ama tamaja asinarija ayaju eku Dio aribu isia dewarayaja ja. Amawitu Jeoba warao eraja ina arao kokotuka kawanamo orikuare abayaja ja religión nomewitu eku jamejerei (Emusabataja 7:9, 10). Kiritianotuma nomewitu oriyakaratabuae jame orisanetaya dibu yakera oridibuya. Dakate tatuma kokotuka aorikuare nakanoko eku dibu tai jese nokoya Dio akarata ekumo. Ebereo 10:24, 25 teribu.

Joiratuma 1870 awerea Dio akarata ateribumo erayana Dio akarata teribubuae. Ebeateje Dio akarata isimo nome ebewitu dijisa jatanaekutai isia tatuma naminabuae. Tatuma naminayajae Jesú congregación kiritiana iyakaratae Dio aribu isia dewarakitane, tiame tatuma rakate ina kokotukanea dewara Dio a Reino isia inaminabuae. Joira 1931 eku tatuma awai Jeoba arewaramo tane oriabanae. Anona 1:8; 2:1, 4, 11; 5:42 teribu.

Jesú wabakore nokabuka airamotuma (Cuerpo Gobernante Central) jae. Tatuma congregaciontuma kiritiana jobaji kokotuka ekumo sanetabuae, tatuma Jesú congregación kiritiana akua naminabuae (Anona 16:4, 5). Monukajase ama Jeoba arewaramo airamotuma ja, Dio aribu isia kuana naminayaja, tatuma sucursaletuma ina kokotukanea eku jakutai mia sanetakitane. Tamaja sucursaletuma eku karatatuma Dio akarata ekumo jonoribu 600 isia jabataya waraotuma deisa moakitane arakate. Tamaja cuerpo gobernante dibu yakera congregaciontuma 100 mil kuarika saba dibuya sanetakitane. Arakate congregación eku airamotuma daisa ja. Tatuma Dio aobejatuma yakera yaoroya. 1 Pedro 5:2, 3 teribu.

Jeoba arewaramo oriyakaratabuae tiaja ja deje yakeraja Dio akarata dibuyakutai dewarakitane arakate Jesú anebu tane abakitane. Apostoltuma monuka janokoya dewarayaja ja (Anona 20:20). Arakate Jeoba arewaramo waraotuma nome obonoyakutai inaminakitane obonoya. Oko Jeoba arewaramo oriwarao ka Rima yakerajawitu ja taisi kuare oriobonoyaoko (2 Tesalónica 1:3). Jeoba awarao oriyakaratane Dio eoriwakakitane daisama sanetakitane, tiame oko oriwarao oriwakayawitu ja jobaji arai. 1 Pedro 2:9; Anona 20:35 teribu.