Jehovah Witness no de do birthday because we believe say this kind celebration no de make God happy. Na true say Bible no talk direct say make we no celebrate birthday, but e help us understand wetin God de think about that kind celebration. Make we see four things wey Bible talk about this kind celebration.

1.   Birthday celebration connect with idol worship. The book Funk & Wagnalls Standard Dictionary of Folklore, Mythology, and Legend talk say, people start to celebrate birthday because they believe say, “wicked spirit fit attack person for e birthday” and say “if e friends come the birthday and wish the person good things, this one go protect the person.” The book wey the title na, The Lore of Birthdays talk say for past, the day wey they born person de always dey “important to know how the person future go be when them de check the position of the sun, the moon and the star.” The book still talk say, “people believe say birthday candle fit make the wish of the person happen.”

    But Bible warn say make we no practice magic, use power of the spirits to know about the future, do things with demons, or “anything like this.” (Deuteronomy 18:14; Galatians 5:​19-​21) One reason why God destroy the city of Babylon that time, na because the people de use sun, moon and star to talk about the future and this one na another way wey people de use power from the spirits to know the future. (Isaiah 47:​11-​15) Jehovah Witness people no dey against all celebration because of how they start; but when Bible give any clear direction about any celebration, them de take-am serious.

2.   Christians for the time of the apostles no celebrate birthdays. The World Book Encyclopedia talk say “Christians for the time of the apostles believe say birthday celebration come from lie-lie religion.” Bible show say the apostles and other people wey Jesus teach set example for other Christians to follow.​​—2 Thessalonians 3:⁠6.

3.   The only celebration wey Bible tell Christians to do na to remember the death of Jesus. (Luke 22:​17-​20) This one make sense because Bible talk say “the day wey person die better pass the day wey they born person.” (Ecclesiastes 7:⁠1) When Jesus dey this earth, e really do wetin God want, so this one make the day wey e die dey important pass the day wey they born-am.​​—Hebrews 1:⁠4.

4.   Bible no talk say any servant of God celebrate birthday. No be say people wey write Bible forget to talk about-am, because they talk about two birthday wey people wey no be servants of Jehovah do. But na bad thing happen for this two birthday wey Bible talk about.​​—Genesis 40:​20-​22; Mark 6:​21-​29.

 Papa and mama wey be Jehovah Witness de show their pikin love everyday. Some ways wey them de show this love na to buy different-different gift for them and de do party for them. They try to follow the fine example of God, wey de always give e children better gift. (Matthew 7:​11) Wetin this young people for down de talk show say they no de feel say them de miss anything at all:

•  

•   “Even though say my papa and mama no de give me gift for my birthday, them de give me gift for other times. I like-am like that because na surprise.”​​—Gregory, 11 years old.

•   “You think say to use ten minutes, chop small-small cake, and sing song na party? If you want see real party come my house!”​​—Eric, 6 years old.