Na love for God and love for neighbor de make Jehovah Witness people de enjoy to preach Bible message to everybody, even to people wey don tell them before say “I no want hear.” (Matthew 22:​37-​39) Love for God de make us to obey im Son command “to really preach well.” (Acts 10:42; 1 John 5:⁠3) To fit do this one, we de preach Bible message to people more than once, just as God prophets that time do-am. (Jeremiah 25:⁠4) Because of the love wey we get for our neighbors, we de try to share the message wey de save life wey be the “good news of the Kingdom” with everybody, even to people wey don first talk before say them no want hear.​—Matthew 24:⁠14.

 When we go back to the house of people wey don first show say them no want hear, we still de meet some people wey like our message. Make we see three reasons why e be like that:

•   People de change where them de stay.

•   Other people for the house de like to hear our message.

•   People de change. Things wey de happen for the world or for the life of people de make some of them to come “need God for their life” pass before and to want hear the message wey dey Bible. (Matthew 5:⁠3) Even people wey no like our message before fit change their mind just like apostle Paul.​—1 Timothy 1:​13.

 The truth be say, we no de force anybody to listen to our message. (1 Peter 3:​15) We believe say na everybody go decide for imself for matter wey concern worship.​—Deuteronomy 30:​19, 20.