No. Jehovah Witness no dey against vaccine. Na each Christian go decide whether e go take vaccine or e no go take. Plenty Jehovah Witness de decide to take vaccine.

 We want the best treatment and we like-am as science people de better more-more as them de find treatment to reduce serious sickness. We dey happy for the hard work wey doctors and nurse them de do especially for this time wey things don really bad.

 Jehovah Witness de follow the advice wey doctors de give. For example, since coronavirus start to spread, Jehovah Witness don de encourage people make they continue to do wetin government talk say make they do to dey safe. Them de do this one for plenty language for their website. Some of the things wey them de encourage people to do na to stand far from other people, and follow wetin government talk say make people de do when they gather together, make they no comot for house when them de sick, make them de wash their hands, make them de wear face mask, and make them de do other things wey government say make people de do to dey safe.—Romans 13:1, 2.

 For plenty years, the books of Jehovah Witness don talk about this points for down:

•   Na each person go decide the kind treatment wey e want.—Galatians 6:5.

   “[This book] no de talk say one type of medicine better pass another one and e no de give advice for treatment. We just de write about how things really be. Na the person wey de read this book go decide which kind treatment e go take.”—Awake!, February 8, 1987.

   “Na you go decide whether you and your children go collect vaccine.”—Awake!, August 22, 1965.

•   We de like to get treatment because life really dey important to us.—Acts 17:28.

   “Jehovah Witness de go meet doctors to help them when them de sick. They like life and they ready to do anything wey they fit do to continue to live as far as e no dey against wetin Bible talk.”—The Watchtower, July 1, 1975.

   “Jehovah Witness no de reject medicine and treatment. They want get strong body and live long. In fact, like Luke for the time of the apostles, some Jehovah Witness na doctors. . . . Jehovah Witness really value the hard work wey doctors and nurse them de do. They still like-am when this people help them to feel better when them de sick.”—The Watchtower, February 1, 2011.