One man come from Eritrea to Norway as refugee for 2011. When Jehovah Witness for Norway come preach to the man, e tell them say e be don first meet Jehovah Witness people for e country. E talk say when e be dey for military, e don see plenty Jehovah Witness wey dey for prison because them de serve God and they no gree make the government force them to join army, even when they really suffer them.

 Something come happen to the man, and just like that, e too land for prison. For the prison wey e dey, e meet three other Jehovah Witness​—Paulos Eyasu, Negede Teklemariam, and Isaac Mogos. They don dey for prison since 1994 because them de serve God.

 This man see-am clear when e dey prison say Jehovah Witness them de do wetin them de preach. E see say they no de lie and they even share thier food with other prisoners. E see how other prisoners wey be Jehovah Witness de study Bible together every day and de invite others to join them. Even when they tell the Jehovah Witness prisoners say they go release them if they sign paper say they no go be Jehovah Witness again, they no de gree sign the paper.

 This thing wey the man see for prison about Jehovah Witness really touch e heart. After e comot for prison, and pack go Norway, e really want know why Jehovah Witness people de get that kind strong faith. So when the Witness them come preach to the man, quick-quick, e start to study Bible with them and go their meetings.

 For September 2018, the man baptize as one of Jehovah Witness. Now e de use any chance wey e get to preach to people wey come from Eritrea and Sudan wey de talk e language, and e de encourage them to study Bible and get strong faith.