After Zarina baptize as one of Jehovah Witness, e leave Russia and go back to e country for Central Asia. E don decide to teach e two daughters about Jehovah. But because Zarina no too get money, e and e pikin them de stay for one room with e papa, mama, e brother and e wife. E papa and mama talk say make e no teach e children Bible. They still tell the girls say make they no discuss anything about Bible with their mama.

 Zarina think deep about how e fit help e two girls learn about Jehovah. (Proverbs 1:8) So e pray to Jehovah with all e heart and beg Jehovah for help and good sense. To fit succeed for the thing wey e de pray for, Zarina go take e two girls go stroll, and as them de stroll, e go de talk to them about the fine things wey Jehovah don make. This small-small stroll really help the girls to start to like the Person wey make all this fine things.

 After, Zarina think of how e fit de teach the girls more with the book What Does the Bible Really Teach? a E go copy some paragraphs and questions from the book and write-am inside small-small paper. E still add some small explanation for the paper to help e girls understand wetin dey for the book. Then e go hide the small-small paper, and pencil, under the washing machine wey dey for bathroom. When e daughters enter the room, they go read the paragraphs and write their answers.

 With that style, Zarina don fit study two chapters from the Bible Teach book with e daughters before three of them come see another place to live. For their new house, e come dey free to teach e girls about Jehovah wey nobody go disturb them. For October 2016, the two girls baptize. Them dey happy say their mama don use good sense to teach them about God.