First Corinthians 16:1-24
16 Now as for the contribution for the holy ones, una fit follow the things wey I say make the congregations for Ga·la′ti·a do.
2 For the first day of every week, make each of una keep something according to wetin e get, so that no be when I come una go de collect the contributions.
3 But when I come there, I go send the men wey una letters show say una choose to carry the gifts wey una give from una heart go Jerusalem.
4 But if I see say I need to go there too, them go go there with me.
5 But I go come meet una when I don pass Mac·e·do′ni·a, because I go pass inside Mac·e·do′ni·a.
6 And maybe I go stay or even spend the cold season with una, so that una fit escort me small to the place wey I de go.
7 No be just as I de pass I want see una, since I hope to stay with una for some time, if Jehovah allow-am.
8 But I go still dey for Eph′e·sus until the Festival of Pentecost,
9 because big door to do more work don open for me, but many people dey against us.
10 Now if Timothy come, make una make sure say e no get anything to fear as e dey with una, because e de do the work of Jehovah just as I de do.
11 So, make nobody treat-am like say e be nothing. Make e dey safe as una de send-am come, so that e fit come meet me, because I de wait for-am together with the brothers.
12 Now as for A·pol′los our brother, I really encourage-am to come meet una with the brothers. E no plan to come now, but e go come when e see the chance.
13 Make una dey awake, stand strong for the faith, get strong heart, and dey powerful.
14 Make una de do everything with love.
15 My brothers, now I de encourage una: Una know say na the people for the house of Steph′a·nas be the first disciples* for A·cha′ia, and say them really use all their heart de help the holy ones.
16 Make una still continue to put unaself under this kind people and everybody wey de work as one and wey de work hard.
17 But I really de happy as Steph′a·nas and For·tu·na′tus and A·cha′i·cus dey here with me, because them de do the work wey una for help me do if to say una dey here.
18 Them don make me and una* strong again. So, make una de respect this kind men.
19 The congregations for Asia say make I greet una. Aq′ui·la and Pris′ca together with the congregation for their house de greet una with all their heart as people wey de follow the Lord.
20 All the brothers de greet una. Make una greet each other with holy kiss.
21 Na me Paul de write this letter with my own hand to greet una.
22 If anybody no love the Lord, make e be person wey them don curse. O our Lord, make you come!
23 Make the special favor of the Lord Jesus dey with una.
24 Make my love dey with all of una as people wey be one with Christ Jesus.
